ಭಾರತ‌, ಪಾಕಿಸ್ಥಾನ ಎರಡೂ ನಮ್ಮ ಪಾಲುದಾರ ರಾಷ್ಟ್ರಗಳು: ಯುಎಸ್

ವಾಷಿಂಗ್ಟನ್: ಭಾರತ ಮತ್ತು ಪಾಕಿಸ್ಥಾನ ಎರಡೂ ಅಮೆರಿಕದ ಪಾಲುದಾರ ರಾಷ್ಟ್ರಗಳಾಗಿವೆ ಎಂದು ಅಮೆರಿಕಾದ ಜೋ ಬೈಡನ್ ಸರ್ಕಾರ ಹೇಳಿದೆ.

ಪಾಕಿಸ್ಥಾನಕ್ಕೆ ಎಫ್-16 ಪ್ಯಾಕೇಜ್ ಅನ್ನು ಅಮೆರಿಕ ನೀಡಿರುವ ಬಗ್ಗೆ ಕೇಂದ್ರ ವಿದೇಶಾಂಗ ವ್ಯವಹಾರಗಳ ಸಚಿವ ಜೈಶಂಕರ್ ಅವರು ಅಸಮಾಧಾನವನ್ನು ಹೊರ ಹಾಕಿರುವ ಬೆನ್ನಲ್ಲೇ ಅಮೆರಿಕ ಈ ಪ್ರತಿಕ್ರಿಯೆ ನೀಡಿದೆ.

ಅಮೆರಿಕಾದಲ್ಲಿ ಸೋಮವಾರ ಭಾರತೀಯ ಸಮುದಾಯವನ್ನು ಉದ್ದೇಶಿಸಿ ಮಾತನಾಡಿದ ಜೈ ಶಂಕರ್ ಅವರು, ಎಫ್-16 ಪ್ಯಾಕೇಜ್ ಅನ್ನು ಪಾಕಿಸ್ತಾನಕ್ಕೆ ನೀಡಿರುವ ಅಮೆರಿಕದ ಉದ್ದೇಶವನ್ನು ಪ್ರಶ್ನಿಸಿದ್ದರು. ಪಾಕಿಸ್ತಾನವು ಈ ವಿಮಾನಗಳನ್ನು ಎಲ್ಲಿ ಮತ್ತು ಯಾರ ವಿರುದ್ಧ ಬಳಸುತ್ತದೆ ಎಂಬುದು ಎಲ್ಲರಿಗೂ ತಿಳಿದಿರುವ ವಿಷಯ ಎಂದು ಹೇಳಿದ್ದರು.

ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಅಮೆರಿಕ, “ಭಾರತ ಮತ್ತು ಪಾಕಿಸ್ಥಾನ ಎರಡೂ ಅಮೆರಿಕದ ಪಾಲುದಾರ ರಾಷ್ಟ್ರಗಳು. ಭಾರತದೊಂದಿಗಿನ ಅಮೆರಿಕಾದ ಬಾಂಧವ್ಯಕ್ಕೆ ವಿಶೇಷ ಸ್ಥಾನವಿದೆ. ಹಾಗೆಯೇ ಪಾಕಿಸ್ತಾನದೊಂದಿಗಿನ ಅಮೆರಿಕದ ಬಾಂಧವ್ಯಕ್ಕೆ ವಿಶೇಷತೆ ಇದೆ” ಎಂದಿದೆ.

ಅಮೆರಿಕಾವು ಪಾಕಿಸ್ತಾನಕ್ಕೆ 450 ದಶಲಕ್ಷ ಡಾಲರ್‌ಗಳ ಎಫ್- 16 ಫೈಟರ್ ಜೆಟ್ ಪ್ಯಾಕೇಜ್ ಒದಗಿಸಿದೆ.

ಹಿಂದಿನ ಡೊನಾಲ್ಡ್ ಟ್ರಂಪ್ ಸರಕಾರವು ಪಾಕಿಸ್ತಾನಕ್ಕೆ ರಕ್ಷಣಾ ನೆರವು ಒದಗಿಸುವುದನ್ನು ರದ್ದು ಪಡಿಸಿತ್ತು. ಆದರೆ ಜೋ ಬೈಡನ್ ಸರ್ಕಾರ ಪಾಕಿಸ್ತಾನಕ್ಕೆ ರಕ್ಷಣಾ ನೆರವು ನೀಡುವುದನ್ನು ಮುಂದುವರಿಸಿದೆ.