ಜಮ್ಮು-ಕಾಶ್ಮೀರ: ಸರ್ಕಾರಿ ಯೋಜನೆಯಿಂದ ಬಂಡಿಪೋರಾದಲ್ಲಿ ಅಭಿವೃದ್ಧಿ ಕಾಣುತ್ತಿದೆ ಡೈರಿ ಕ್ಷೇತ್ರ

ಬಂಡಿಪೋರಾ: ಜಮ್ಮು ಮತ್ತು ಕಾಶ್ಮೀರ ಈಗ ಅಭಿವೃದ್ಧಿಯ ಪಥದತ್ತ ಸಾಗುತ್ತಿದೆ. ಬಂಡಿಪೋರಾ ಜಿಲ್ಲೆಯಲ್ಲಿ ಸರ್ಕಾರಿ ಪ್ರಾಯೋಜಿತ ಯೋಜನೆಗಳಿಂದಾಗಿ ಡೈರಿ ಕ್ಷೇತ್ರವು ಅಭಿವೃದ್ಧಿ ಹೊಂದುತ್ತಿದೆ. ಉದಯೋನ್ಮುಖ ಘಟಕಗಳು, ಸ್ಟಾರ್ಟ್‌ಅಪ್‌ಗಳೊಂದಿಗೆ ಡೈರಿ ಕ್ಷೇತ್ರದಲ್ಲಿ ವಿಪುಲ ಅವಕಾಶಗಳು ಲಭ್ಯವಾಗುತ್ತಿದ್ದು, ಹೆಚ್ಚು ಹೆಚ್ಚು ಯುವಕರು ಅದರಲ್ಲಿ ತೊಡಗಿಸಿಕೊಳ್ಳುತ್ತಿದ್ದಾರೆ.

ಬಂಡಿಪೋರಾದ ಮದರ್ ಪ್ರದೇಶದ ತಾಹಿರ್ ಅಹ್ಮದ್ ರಾಥರ್ ಅವರು ಜಿಲ್ಲೆಯ ಪಶುಸಂಗೋಪನೆ ಇಲಾಖೆಯ ಸಹಾಯದಿಂದ 2020 ರಲ್ಲಿ ಡೈರಿ ಫಾರ್ಮ್ ಅನ್ನು ಪ್ರಾರಂಭಿಸಿದ್ದು, ಇಂದು ಅವರು ಎಂಟು ಹಸುಗಳನ್ನು ಹೊಂದಿದ್ದು ಅದು ದಿನಕ್ಕೆ 90-95 ಲೀಟರ್ ಹಾಲು ನೀಡುತ್ತದೆ.

ತಾಹಿರ್ ತಮ್ಮ ತಂದೆ ಬಶೀರ್ ಅಹ್ಮದ್ ರಾಥರ್ ಅವರ ಜೊತೆಗೆ ಫಾರ್ಮ್ ಅನ್ನು ನಿರ್ವಹಿಸುತ್ತಾರೆ, ಬಂಡಿಪೋರಾದಾದ್ಯಂತ ಹಾಲನ್ನು ವಿತರಿಸುತ್ತಾರೆ, ಈ ಮೂಲಕ ಜಿಲ್ಲೆಯ ಜನರ ಹಾಲಿನ ಅವಶ್ಯಕತೆಗಳನ್ನು ಪೂರೈಸುತ್ತಾರೆ.

“ನಾನು 2020 ರಲ್ಲಿ ಈ ಡೈರಿ ಫಾರ್ಮ್ ಅನ್ನು ಪ್ರಾರಂಭಿಸಿದೆ,  ಇದು ನನಗೆ ಜೀವನೋಪಾಯವನ್ನು ಗಳಿಸಲು ಸಹಾಯ ಮಾಡುತ್ತಿದೆ. ಈ ಘಟಕವನ್ನು ಸ್ಥಾಪಿಸಲು ನನಗೆ ಸಹಾಯ ಮಾಡಿದ ಪಶುಸಂಗೋಪನಾ ಇಲಾಖೆಗೆ ನಾನು ಆಭಾರಿಯಾಗಿದ್ದೇನೆ”ಎನ್ನುತ್ತಾರೆ.

ತಾಹಿರ್ ಅವರು ಮತ್ತಷ್ಟು ಯುವಕರು ಈ ಡೈರಿ ಕ್ಷೇತ್ರಕ್ಕೆ ಸೇರಬೇಕೆಂದು ಬಯಸುತ್ತಿದ್ದಾರೆ, ಇದು ತುಂಬಾ ಪ್ರಯೋಜನಕಾರಿ ಎಂಬುದು ಅವರ ಅನುಭವದ ಮಾತು.

“ಈ ಹೈನುಗಾರಿಕೆ ಕ್ಷೇತ್ರವು ತುಂಬಾ ಪ್ರಯೋಜನಕಾರಿಯಾಗಿರುವುದರಿಂದ ಹೆಚ್ಚಿನ ಯುವಕರು ಸೇರಬೇಕೆಂದು ನಾನು ಬಯಸುತ್ತೇನೆ. ಇದಲ್ಲದೆ, ಇತ್ತೀಚಿನ ದಿನಗಳಲ್ಲಿ ಹಳ್ಳಿಗಳಲ್ಲಿ ಮತ್ತು ನಗರಗಳಲ್ಲಿ ಹಸುಗಳನ್ನು ಸಾಕಲು ಹೆಚ್ಚು ಜನರು ಇಲ್ಲ, ಆದ್ದರಿಂದ ಹೆಚ್ಚಿನ ಡೈರಿ ಫಾರ್ಮ್‌ಗಳನ್ನು ಸ್ಥಾಪಿಸಬಹುದು ಇದು ಹೆಚ್ಚು ಪ್ರಯೋಜನಕಾರಿಯಾಗಿರುತ್ತದೆ ಮತ್ತು ಪ್ರತಿ ಮನೆಗೆ ಹಾಲು ತಲುಪಿಸಬಹುದು”ಎಂದು ಅವರು ಹೇಳುತ್ತಾರೆ.

ತಾಹಿರ್ ತನ್ನ ಫಾರ್ಮ್‌ನಲ್ಲಿ ಸ್ವಯಂಚಾಲಿತ  ಹಾಲುಕರೆಯುವ ಯಂತ್ರಗಳಂತಹ ಆಧುನಿಕ ತಂತ್ರಜ್ಞಾನವನ್ನು ಅಳವಡಿಸಿಕೊಂಡಿದ್ದಾರೆ, ಅದು ಉತ್ಪಾದಕತೆಯನ್ನು ಹೆಚ್ಚಿಸುವುದರ ಜೊತೆಗೆ ಅವರ ಸಮಯವನ್ನು ಉಳಿಸುತ್ತದೆ.