’ಅಶುದ್ಧಿನಾಶಕ’ದಿಂದ ಮಹಿಳೆಯರು ಪರಿಸರ ಸ್ನೇಹಿಯಾಗಬಲ್ಲರು

ಓರ್ವ ಪುರುಷ ನ್ಯಾಪ್ಕಿನ್‌ಗಳಿಂದ ಮಣ್ಣಿನ ನೈರ್ಮಲ್ಯ ಉಳಿಸಿಕೊಳ್ಳುವುದರ ಬಗ್ಗೆ ಚಿಂತಿಸುವ ಅಗತ್ಯವಾದರೂ ಏನು? ಮತ್ತು ಸುರಕ್ಷಿತ ರೀತಿಯಲ್ಲಿ ಈ ನೈರ್ಮಲ್ಯದ ಸಮಸ್ಯೆ ಪರಿಹರಿಸಲು ವಸ್ತ್ರಗಳನ್ನು (ನ್ಯಾಪ್‌ಕಿನ್) ವಿಲೇವಾರಿಯ ನವೀನ ಯೋಜನೆ ಕಂಡುಹಿಡಿಯುವ ಅಗತ್ಯವಿದೆಯೇ? ಆದರೆ ಇದರಿಂದ ಯಾವುದೇ ಲಾಭ ಇಲ್ಲದಿದ್ದರೂ ನವೀನ ಯೋಜನೆಯೊಂದರಿಂದ ಪರಿಸರ ನೈರ್ಮಲ್ಯದ ಕಾಳಜಿ ವಹಿಸಿಕೊಂಡಿದ್ದಾರೆ.

ಗುಜರಾತ್‌ನ ವಡೋದರಾದ ಶ್ಯಾಮ್‌ಸುಂದರ್ ಬೆಡೇಕರ್ ಅವರು ಗ್ರಾಮೀಣ ಭಾರತದ ಜೀವನ ಶೈಲಿಯನ್ನು ಬದಲಿಸುವ ಸಾಮರ್ಥ್ಯ ಹೊಂದಿರುವ ಅದ್ಭುತ ಯೋಜನೆ ಜಾರಿಗೆ ತಂದಿದ್ದಾರೆ. ಮಹಿಳೆಯರಿಗೆ ನ್ಯಾಪ್‌ಕಿನ್ ವಿಲೇವಾರಿಗೆ ಸಹಾಯಕವಾಗುವಂತೆ ’ಅಶುದ್ಧಿನಾಶಕ’ ಎಂಬ ಪರಿಸರ-ಸ್ನೇಹಿ ಯೋಜನೆಯನ್ನು ಕಡಿಮೆ ವೆಚ್ಚದಲ್ಲಿ ಪಡೆಯುವಂತಹ ಸೌಕರ್ಯ ಒದಗಿಸಿದ್ದಾರೆ.

ಬಿ.ಎಸ್.ಸಿ.ಯಲ್ಲಿ ರಸಾಯನಶಾಸ್ತ್ರ ಪದವಿ ಪಡೆದಿದ್ದ ಶ್ಯಾಮ್‌ಸುಂದರ್, ಬಟ್ಟೆ ಉತ್ಪಾದಕ ಕಾರ್ಖಾನೆಯಲ್ಲಿ ಗುಣಮಟ್ಟ ನಿಯಂತ್ರಣ ಮುಖ್ಯಸ್ಥರಾಗಿ, ನಂತರ ಡೈಸ್ಟಫ್ ಉತ್ಪಾದನಾ ಘಟಕದಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದಾರೆ.

ಅವರ ಪತ್ನಿ ಸ್ವಾತಿ ವಿಜ್ಞಾನ ಶಿಕ್ಷಕಿಯಾಗಿದ್ದು, ಅಲ್ಲಿನ ಬುಡಕಟ್ಟು ಮಹಿಳೆಯರಿಗೆ ಕಡಿಮೆ ವೆಚ್ಚದಲ್ಲಿ ನ್ಯಾಪ್‌ಕಿನ್ ತಯಾರಿಸಲು ಮಹಿಳೆಯರ ಉದ್ಯಮ ರಚಿಸುವ ಮೂಲಕ ಮುಟ್ಟಿನ ನೈರ್ಮಲ್ಯ ನಿರ್ವಹಿಸುವ ಪ್ರಕ್ರಿಯೆಯಲ್ಲಿ ನೆರವಾಗಿದ್ದಾರೆ. ನ್ಯಾಪ್‌ಕಿನ್‌ಗಳ ಸುರಕ್ಷಿತ ವಿಲೇವಾರಿಯನ್ನು ಪರಿಹರಿಸುವುದರ ಜೊತೆಗೆ ಇಂತಹ ನ್ಯಾಪ್‌ಕಿನ್‌ಗಳನ್ನು ತಯಾರಿಸಿ ಈ ಮಹಿಳೆಯರು ಉದ್ಯೋಗ ಪಡೆಯುವಲ್ಲಿ ನೆರವಾಗಿದ್ದಾರೆ.

ಗ್ರಾಮೀಣ ಪ್ರದೇಶಗಳಲ್ಲಿ ಮುಟ್ಟಿನ ಸಂದರ್ಭ ಮಹಿಳೆಯರಿಗೆ ನಗರಗಳಂತೆ ಕಸ ವಿಲೇವಾರಿಗೆ ಅನುಕೂಲ ಇಲ್ಲದಿರುವುದರಿಂದ ನ್ಯಾಪ್‌ಕಿನ್‌ಗಳ ವಿಲೇವಾರಿ ಅಥವಾ ದಹಿಸಲು (ಸುಡಲು) ಈ ಅಶುದ್ಧಿನಾಶಕ ವ್ಯವಸ್ಥೆ ಸುಲಭವಾಗಿದೆ.

ನ್ಯಾಪ್‌ಕಿನ್‌ಗಳ ಶೇಖರಣೆಗೆ ಟೆರಿಕೋಟಾ ಮತ್ತು ಕಾಂಕ್ರೀಟ್ ಮಿಶ್ರಿತ ಶೇಖರಣೆ ಚೇಂಬರ್ ಒಂದನ್ನು ತಯಾರಿಸಿದ್ದಾರೆ. ಈ ಚೇಂಬರ್‌ನ್ನು 2 ಭಾಗವಾಗಿ ವಿಂಗಡಿಸಿದ್ದು, ಜಾಲರಿಯೊಂದರ ಮೇಲೆ ಈ ಚೇಂಬರ್‌ನ್ನು ಕೂರಿಸಲಾಗಿದೆ. ವಿಲೇವಾರಿ ಮಾಡಲಾದ ನ್ಯಾಪ್‌ಕಿನ್‌ಗಳನ್ನು ದಹಿಸಿದ ಬಳಿಕ ಅದರ ಬೂದಿಯು ಕೆಳಭಾಗದಲ್ಲಿ ಶೇಖರಣೆಯಾಗುತ್ತದೆ. ಈ ಬೂದಿಯನ್ನು ರಸಗೊಬ್ಬರವನ್ನಾಗಿಯೂ ಬಳಸಬಹುದು. ಇರುವೆ, ಮತ್ತಿತರ ಜೀವ-ಜಂತುಗಳು ಸೇರದಂತೆ ಚೇಂಬರ್‌ನ ತಳಭಾಗದಲ್ಲಿ ನೀರನ್ನು ತುಂಬಿಸಿಡಲಾಗುತ್ತದೆ. ಜನರು ಇದರತ್ತ ಹೆಚ್ಚು ಗಮನ ಸೆಳೆಯದಂತೆ ನೋಡಿಕೊಳ್ಳುವ ಪ್ರಯತ್ನದೊಂದಿಗೆ ಸಾಮಾನ್ಯ ರೀತಿಯಲ್ಲಿ ಇದನ್ನು ತಯಾರಿಸಿದ್ದಾರೆ.

ಇಂಧನ ಅಥವಾ ವಿದ್ಯುತ್ ಇಲ್ಲದೇ ಬಳಸಬಹುದಾದ ’ಅಶುದ್ಧಿನಾಶಕ’, ಗ್ರಾಮೀಣ ಪ್ರದೇಶದ ಜನರ ಜೀವನದಲ್ಲಿ ಪರಿವರ್ತನೆ ತರಲಿದೆ. 2000 ರೂಪಾಯಿಗೆ ಪಡೆಯಬಹುದಾದ ಈ ಯಂತ್ರವನ್ನು ಸರ್ವ ಶಿಕ್ಷಾ ಅಭಿಯಾನದಡಿಯಲ್ಲಿ ಬರುವ 2000ಕ್ಕೂ ಅಧಿಕ ವಿಶ್ವವಿದ್ಯಾಲಯಗಳು, ಶಾಲೆಗಳು, ಹಾಸ್ಟೆಲ್‌ಗಳಲ್ಲಿ ಇರಿಸಲಾಗಿದೆ.