ನೇತಾಜಿ 125ನೇ ಜಯಂತಿ: ಬರ್ಲಿನ್‌ನಲ್ಲಿ “ಬೋಸ್ 125” ಪ್ರದರ್ಶನಕ್ಕೆ ಚಾಲನೆ

ನವದೆಹಲಿ: ನೇತಾಜಿ ಸುಭಾಷ್ ಚಂದ್ರ ಬೋಸ್ ಅವರ 125 ನೇ ಜನ್ಮ ವಾರ್ಷಿಕೋತ್ಸವದ ಅಂಗವಾಗಿ ಬರ್ಲಿನ್‌ನಲ್ಲಿರುವ ಭಾರತೀಯ ರಾಯಭಾರ ಕಚೇರಿ ಅವರ ಜೀವನದ ಬಗೆಗಿನ ಪ್ರದರ್ಶನವನ್ನು ಆರಂಭಿಸಿದೆ.

“ಬರ್ಲಿನ್‌ನಲ್ಲಿರುವ ಭಾರತೀಯ ರಾಯಭಾರ ಕಚೇರಿಯು ನೇತಾಜಿ ಸುಭಾಸ್ ಚಂದ್ರ ಬೋಸ್ ಅವರ 125 ನೇ ಜನ್ಮ ವಾರ್ಷಿಕೋತ್ಸವವನ್ನು ಗುರುತಿಸುವ “ಬೋಸ್ 125″ ಶೀರ್ಷಿಕೆಯ ವಿಶೇಷ ಪ್ರದರ್ಶನವನ್ನು ತೆರೆಯುವ ಮೂಲಕ ನಿನ್ನೆ ಪರಾಕ್ರಮ್ ದಿವಸ್ ಆಚರಿಸಿತು” ಎಂದು ಮೂಲಗಳು ಮಾಹಿತಿ ನೀಡಿವೆ.

ನೇತಾಜಿಯವರ ಅಪರೂಪದ, ವೈಯಕ್ತಿಕ ಪತ್ರಗಳು ಮತ್ತು ಸ್ಮರಣಿಕೆಗಳನ್ನು ಒಳಗೊಂಡಿರುವ ಪ್ರದರ್ಶನವನ್ನು ಜರ್ಮನಿಯ ಭಾರತದ ರಾಯಭಾರಿ ಹರೀಶ್ ಪರ್ವತನೇನಿ ಮತ್ತು ನೇತಾಜಿ ಅವರ ಪುತ್ರಿ ಪ್ರೊಫೆಸರ್ ಡಾ ಅನಿತಾ ಬೋಸ್ ಪ್ಫಾಫ್ ಅವರು ರಾಯಭಾರ ಕಚೇರಿಯಲ್ಲಿ ಉದ್ಘಾಟಿಸಿದರು.

ಅನಿವಾಸಿ ಭಾರತೀಯೆ ಆಗಿರುವ ಡಾ ಬೋಸ್ ಪ್ಫಾಫ್ ಅವರು ನೇತಾಜಿಯವರ ಜನ್ಮದಿನದಂದು ಗಣರಾಜ್ಯೋತ್ಸವವನ್ನು ಪ್ರಾರಂಭಿಸುವ ಭಾರತ ಸರ್ಕಾರದ ನಿರ್ಧಾರಕ್ಕೆ ಮೆಚ್ಚುಗೆಯನ್ನು ವ್ಯಕ್ತಪಡಿಸಿದರು ಮತ್ತು ಈ ಸಂತೋಷದಾಯಕ ಸಂದರ್ಭದಲ್ಲಿ ಭಾರತದ ಜನರಿಗೆ ತಮ್ಮ ಶುಭಾಶಯಗಳನ್ನು ತಿಳಿಸಿದರು.

ಸ್ವಾತಂತ್ರ್ಯ ಹೋರಾಟ ಮತ್ತು ಭಾರತದ ಸ್ವಾತಂತ್ರ್ಯದಲ್ಲಿ ನೇತಾಜಿ ಬೋಸ್ ಅವರ ಪಾತ್ರಕ್ಕಾಗಿ ಭಾರತವು ಅವರಿಗೆ ಶಾಶ್ವತವಾಗಿ ಋಣಿಯಾಗಿದೆ ಎಂದು ಭಾರತದ ರಾಯಭಾರಿ ತಮ್ಮ ಹೇಳಿಕೆಯಲ್ಲಿ ತಿಳಿದ್ದಾರೆ.