ಕೆದಂಬಾಡಿಯಲ್ಲಿ ಸಾವಯವ ಕೃಷಿ ತರಬೇತಿ ಉದ್ಘಾಟನೆ

ಪುತ್ತೂರು : ಕೃಷಿಯನ್ನು ಮಜಾಕ್ಕಾಗಿ ಅಲ್ಲ ನೆಮ್ಮದಿಗಾಗಿ ಮಾಡಬೇಕು ಪ್ರತೀ ಕೃಷಿಕನೂ ಕೃಷಿ ವಿದ್ಯಾರ್ಥಿಯೇ, ಪ್ರತೀ ದಿನವೂ ಅನುಭವ ಸಿಗುತ್ತಲೇ ಹೋಗುತ್ತದೆ, ಇಂತಹ ಅನುಭವಗಳ ವಿನಿಮಯವಾಗಬೇಕು ಎಂದು ಕೃಷಿಕ ಕಡಮಜಲು ಸುಭಾಶ್ ರೈ ಹೇಳಿದರು.

ಅವರು ಶನಿವಾರ ಕೆದಂಬಾಡಿಯ ಸನ್ಯಾಸಿ ಗುಡ್ಡೆ ಶ್ರೀರಾಮ ಭಜನಾ ಮಂದಿರದಲ್ಲಿ ಸಾವಯವ ಕೃಷಿ ಪರಿವಾರದ ವತಿಯಿಂದ ಸಾವಯವ ಕೃಷಿ ತರಬೇತಿ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದರು.ಬದುಕಿನಲ್ಲಿ ನಿರಂತರವಾಗಿ ಕೃಷಿ ಚಿಂತನೆ ನಡೆದಾಗ ಕೃಷಿಯಲ್ಲಿ ಯಶಸ್ಸು ಕಾಣಲು ಸಾಧ್ಯ. ಯಾಂತ್ರೀಕರಣ ಕೃಷಿ ಇಂದು ಅನಿವಾರ್ಯವಾದರೂ ಸಾವಯವ ಕೃಷಿಯನ್ನೇ ಬದುಕಾಗಿಸಿದರೆ ಬದುಕು ಕೂಡಾ ಹಸನಾಗಲು ಸಾಧ್ಯವಿದೆ.ಸಾಯುವ ರೈತನನ್ನು ಸಾವಯವ ಕೃಷಿ ಬದುಕಿಸುವುದಕ್ಕೆ ಸಾದ್ಯವಿದೆ, ಅಂದರೆ ನಷ್ಟವಿಲ್ಲದೆ ಯಶಸ್ವೀ ಕೃಷಿ ಸಾಧ್ಯವಾಗುತ್ತದೆ ಎಂದರು.

ಪ್ರಸ್ತಾವಿಕವಾಗಿ ಮಾತನಾಡಿದ ಸಾವಯವ ಕೃಷಿ ಪರಿವಾರದ ಜಿಲ್ಲಾ ಸಂಚಾಲಕ ಪ್ರವೀಣ್ ಸರಳಾಯ,ಸಾವಯವ ತರಬೇತಿ ಹಾಗೂ ಈ ಬಗ್ಗೆ ರಾಜ್ಯದ 174 ತಾಲೂಕುಗಳಲ್ಲಿ ಸಂಘಟನೆಯಾಗುತ್ತಿದೆ.ಸ್ವದೇಶಿ ಚಿಂತನೆಯೊಂದಿಗೆ ಕೃಷಿಕ ಸ್ವಾವಲಂಬಿಯಾಗಬೇಕು, ಇದಕ್ಕಾಗಿ ಸಾವಯವ ಕೃಷಿಯೇ ಪರಿಹಾರ ,ಹೀಗಾಗಿ ಮನೆ ಮನೆಗಳಲ್ಲಿ ಚಿಂತನೆ ಆರಂಭವಾಗಬೇಕು ಎಂದರು. ವೇದಿಕೆಯಲ್ಲಿ ಭಾರತೀಯ ಕಿಸಾನ್ ಸಂಘದ ಪ್ರಮುಖ್ ಮೂಲಚಂದ್ರ , ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಜಿಲ್ಲಾ ಸಹಸೇವಾ ಪ್ರಮುಖ್ ವೆಂಕಟ್ರಮಣ ಹೊಳ್ಳ ಉಪಸ್ಥಿತರಿದ್ದರು.

ಸಾವಯವ ಕೃಷಿ ಪರಿವಾರದ ತಾಲೂಕು ಸಂಚಾಲಕ ವಿಜಯ ಕುಮಾರ್ ರೈ ಸ್ವಾಗತಿಸಿ ನಿರೂಪಿಸಿದರು. ಶ್ರೀರಾಮ ಭಜನಾ ಮಂದಿರದ ಕಾರ್ಯದರ್ಶಿ ಸಂತೋಷ್ ಕುಮಾರ್ ವಂದಿಸಿದರು. 2 ದಿನಗಳ ಕಾಲ ಕೆದಂಬಾಡಿಯ ಸನ್ಯಾಸಿ ಗುಡ್ಡೆ ಶ್ರೀರಾಮ ಭಜನಾ ಮಂದಿರದಲ್ಲಿ ನಡೆಯಲಿದೆ, ಬೆಳಗ್ಗೆ 10 ರಿಂದ ಆರಂಭವಾಗುವ ಕಾರ್ಯಕ್ರಮದಲ್ಲಿ ವಿವಿಧ ಮಾಹಿತಿಗಳನ್ನು ಸಂಪನ್ಮೂಲ ವ್ಯಕ್ತಿಗಳು ನೀಡಲಿದ್ದಾರೆ.

ಪ್ರಮುಖವಾಗಿ ಸಾವಯವ ತರಕಾರಿ ಕೃಷಿಯ ಬಗ್ಗೆ ಶಿವಪ್ರಸಾದ್ ವರ್ಮುಡಿ, ಕೃಷಿಯಲ್ಲಿ ಯಾಂತ್ರೀಕರಣ ಹಾಗೂ ಆಧುನಿಕ ಸಾವಯವ ಕೃಷಿಯ ಬಗ್ಗೆ ರಾಂಕಿಶೋರ್ ಮಂಚಿ, ಹೈನುಗಾರಿಕೆ ಹೋಮಿಯೋ ಪಶುಚಿಕಿತ್ಸೆ ಬಗ್ಗೆ ಡಾ.ಮನೋಹರ ಉಪಾಧ್ಯಾಯ, ಅಂತರ್ಜಾಲದಲ್ಲಿ ಸಾವಯವ ಕೃಷಿ ಮಾಹಿತಿ ಬಗ್ಗೆ ಡಾ.ಮೋಹನ್ ತಲಕಾಲುಕೊಪ್ಪ , ಹೈನುಗಾರಿಕಾ ಕ್ಷೇತ್ರ ವೀಕ್ಷಣೆ , ಗ್ರಾಮವಿಕಾಸ, ಸಾವಯವ ಕೃಷಿ ಬಗ್ಗೆ ಎಪಿ ಸದಾಶಿವ , ಸಾವಯವ ಅಡುಗೆ ಮನೆ, ಮನೆಮದ್ದು ಮಾಹಿತಿ ಬಗ್ಗೆ ಮುಕುಂದ ಶಾಂತಿವನ, ಸಾವಯವ ಕೃಷಿ ಪರಿಹಾರ ಸಂಘಟನೆ ಮತ್ತು ಮಾರುಕಟ್ಟೆ ವ್ಯವಸ್ಥೆಯ ಬಗ್ಗೆ ಅರುಣ್ ಕುಮಾರ್, ಪ್ರಶ್ನೋತ್ತರ ಅವಧಿಯಲ್ಲಿ ಸಾವಯವ ಕೃಷಿ ಪರಿವಾರದ ರಾಜ್ಯ ಸಂಚಾಲಕ ಶ್ರೀವತ್ಸ ಭಾಗವಹಿಸುವರು.ಸಾವಯವ ಕೃಷಿ ತರಬೇತಿಯ ಈ ಕಾರ್ಯಕ್ರಮದ ಭೋಜನ ಮತ್ತು ಉಪಹಾರದ ವ್ಯವಸ್ಥೆಯಲ್ಲಿ ಉಪ್ಪಿನಿಂದ ತೊಡಗಿ ಎಲ್ಲಾ ವಸ್ತುಗಳೂ ಸಾವಯವ ವಸ್ತು ಆಗಿರುವುದು ಗಮನಸೆಳೆಯಿತು.