ಕೊರೋನಾ ಸೋಂಕಿತರಿಗೆ ವಿಕಿರಣ ಚಿಕಿತ್ಸೆ ಆರಂಭಿಸಲಿದೆ ಬೆಂಗಳೂರಿನ ಎಚ್‌ಸಿಜಿ ಆಸ್ಪತ್ರೆ

ಬೆಂಗಳೂರು: ಕೊರೋನಾ ಸೋಂಕಿತರ ಚಿಕಿತ್ಸೆ‌ಗೆ ಆಮ್ಲಜನಕ ಅವಲಂಬನೆ ಕಡಿಮೆ ಮಾಡಲು ಪೂರಕವಾಗುವಂತ‌ಹ ಲಘು ವಿಕಿರಣ ಚಿಕಿತ್ಸಾ ವಿಧಾನವನ್ನು ಪ್ರಯೋಗ ಮಾಡಲು ಎಚ್‌ಸಿಜಿ ಆಸ್ಪತ್ರೆ ಸಿದ್ಧತೆ ನಡೆಸಿದೆ.

ಈ ಪ್ರಯೋಗ ಯಶಸ್ವಿಯಾದಲ್ಲಿ ಕೊರೋನಾ ಸೋಂಕಿತರ ಚಿಕಿತ್ಸೆಗೆ ಆಮ್ಲಜನಕದ ಅವಲಂಬನೆ ಅರ್ಧಕ್ಕರ್ಧ ಕಡಿಮೆಯಾಗಲಿದೆ. ಪ್ರಸ್ತುತ ಸೋಂಕಿತರಿಗೆ ಸುಮಾರು 6 – 8 ದಿನಗಳ ವರೆಗೆ ಆಕ್ಸಿ‌ಜನ್ ಒದಗಿಸಲಾಗುತ್ತದೆ. ಅಃತಹ ಸೋಂಕಿತರಿಗೆ ಈ ಚಿಕಿತ್ಸೆ ನೀಡಿ ಅವರ ಶ್ವಾಸಕೋಶದ ವೈರಸ್ ನಾಶವಾಗಿ ಹಾನಿ ತಪ್ಪಲಿದೆ. ಜೊತೆಗೆ 2 – 3 ದಿನಗಳ ವರೆಗೆ ಈ ಚಿಕಿತ್ಸೆ ಪಡೆದ ಸೋಂಕಿತರಿಗೆ ಆಮ್ಲಜನಕ ಒದಗಿಸಿದರೆ ವೆಂಟಿಲೇಟರ್ ಅವಲಂಬನೆಯ ಹಂತವನ್ನು ತಡೆಯಬಹುದು ಎಂಬುದು ತಜ್ಞರ ಅಭಿಪ್ರಾಯ.

ಈಗಾಗಲೇ ಈ ಚಿಕಿತ್ಸೆಯನ್ನು ನವದೆಹಲಿ ಏಮ್ಸ್, ಪಾಟ್ನಾ, ಚೆನ್ನೈಗಳಲ್ಲಿಯೂ ನಡೆಸಲಾಗಿದ್ದು 90% ಗಳಷ್ಟು ಪರಿಣಾಮ ಬೀರಿದೆ. ಇದೀಗ ಹುಬ್ಬಳ್ಳಿ, ಬೆಂಗಳೂರು ಎಚ್‌ಸಿಜಿ ಆಸ್ಪತ್ರೆಯಲ್ಲಿ ಈ ಚಿಕಿತ್ಸೆ ಪ್ರಯೋಗಕ್ಕೆ ಎಥಿಕಲ್ ಸಮ್ಮತಿ ದೊರೆತಿದೆ. ಈ ಚಿಕಿತ್ಸೆ‌ಯ ರೇಡಿಯೇಶನ್ ಥೆರಪಿ‌ಗೆ 10 -15 ನಿಮಿಷ ಸಾಕು. ಜೊತೆಗೆ ಇದು ಶ್ವಾಸಕೋಶದ ಮೇಲಿನ ಹಾನಿಯನ್ನು ಸಹ ತಪ್ಪಿಸಲಿದೆ. ಇನ್ನೆರಡು ವಾರಗಳಲ್ಲಿ ಈ ಪ್ರಕ್ರಿಯೆ ಪೂರ್ಣವಾಗಲಿದೆ ಎಂದು ಎಚ್‌ಸಿಜಿ ಆಸ್ಪತ್ರೆ‌ಯ ಮೂಲಗಳು ತಿಳಿಸಿವೆ ಎಂದು ವರದಿಯಾಗಿದೆ.