ಕಾಸರಗೋಡು: ಭಾರತೀಯ ಸಿನಿಮಾರಂಗದಲ್ಲಿ ಮೇರುವ್ಯಕ್ತಿಗಳ ಜೀವನಾಧಾರಿತ ಸಾಕ್ಷ್ಯಚಿತ್ರಗಳಿಗೆ ಹೆಚ್ಚಿನ ಮಹತ್ವವಿದೆ. ಮಾತ್ರವಲ್ಲ ಜನಸಾಮಾನ್ಯರನ್ನು ಆಕರ್ಷಿಸಿ, ಅವರಿಗೆ ಸ್ಪೂರ್ತಿ ತುಂಬಿವೆ. ಕನ್ನಡ ಸಿನಿಮಾರಂಗದಲ್ಲೂ ಇಂತಹ ಕೆಲ ಅತ್ಯುತ್ತಮ ಸಾಕ್ಷ್ಯಚಿತ್ರ ಸಿನಿಮಾಗಳು ನಿರ್ಮಾಣವಾಗಿವೆ. ಕನ್ನಡದ ಪ್ರಥಮ ರಾಷ್ಟ್ರಕವಿ ಎಂದು ಬಿರುದಾಂಕಿತ, ಸಾಹಿತಿಕವಾಗಿ ಸಮಾಜಕ್ಕೆ ಬಹುದೊಡ್ಡ ಕೊಡುಗೆ ನೀಡಿದ ಮಂಜೇಶ್ವರ ಗೋವಿಂದ ಪೈಯವರ ಬದುಕಿನ ಬಗ್ಗೆ ಬೆಳಕು ಚೆಲ್ಲುವ ಮಹಾಕವಿ ಸಿನಿಮಾವನ್ನು ನಟ ರಘು ಭಟ್ ನಿರ್ಮಿಸಲು ಮುಂದಾಗಿದ್ದಾರೆ.
2020 ರ ಮಾರ್ಚ್‌ 23 ರಂದು ಸಿನಿಮಾ ಚಿತ್ರೀಕರಣವನ್ನು ಆರಂಭಿಸಲು ಉದ್ದೇಶಿಸಲಾಗಿತ್ತು. ನಂತರ ಕೊರೊನಾ ಲಾಕ್‌ಡೌನ್‌ ನಿಂದಾಗಿ ಸಿನಿಮಾ ಆರಂಭಿಸಲು ಸಾಧ್ಯವಾಗಿಲ್ಲ. ಶೀಘ್ರದಲ್ಲಿ ಸಿನಿಮಾ ನಿರ್ದೇಶನ ಚಿತ್ರೀಕರಣವನ್ನು ಆರಂಭಿಸಲಾಗುವುದು ಎಂದು ನಿರ್ಮಾಪಕರು ತಿಳಿಸಿದ್ದಾರೆ. ಕಾಸರಗೋಡು ಜಿಲ್ಲೆಯ ಗಡಿಭಾಗದವರಾದ ರಘು ಭಟ್ ಅವರ ಕನಸಿನ ಕೂಸಾಗಿರುವ ಈ ಸಿನಿಮಾವನ್ನು ಕನ್ನಡ ಸಾಹಿತ್ಯ ಲೋಕಕ್ಕೆ ಅಪಾರ ಕೊಡುಗೆ ನೀಡಿದ ಮಹಾನ್‌ ಕವಿಗೆ ಅರ್ಪಿಸಲಾಗುವುದು ಎಂದು ಹೇಳಿದ್ದಾರೆ. ಹಿರಿಯ ಸಿನಿ ಪತ್ರಕರ್ತ, ಸಿನಿಮಾ ವಿಮರ್ಶಕರಾದ ಗಣೇಶ್‌ ಕಾಸರಗೋಡು ಕಥೆ ಸಂಭಾಷಣೆಯನ್ನು ಬರೆದಿದ್ದು ಅಂತಿಮ ಹಂತದಲ್ಲಿದೆ. ಕನ್ನಡ ಚಿತ್ರರಂಗದ ಉತ್ತಮ ತಂಡದೊಂದಿಗೆ ಸಿನಿಮಾವನ್ನು ನಿರ್ದೇಶಿಸಲಾಗುವುದು ಎಂದು ನಿರ್ಮಾಪಕರು ತಿಳಿಸಿದ್ದಾರೆ.
ಸಮಕಾಲೀನ ಜಗತ್ತಿಗೆ ಬಹುಭಾಷಾ ಕೋವಿದ ಮತ್ತು ಸಂಶೋಧಕ ಗೋವಿಂದ ಪೈ ಬಗ್ಗೆ ತಿಳಿಸಬೇಕಿದೆ, ಅದರಿಂದ ಯುವ ಸಮಾಜ, ಸಾಹಿತ್ಯಾಸಕ್ತರು ಸ್ಪೂರ್ತಿ ಪಡೆಯಬೇಕಿದೆ ಎಂದಿರುವ ರಘು ಭಟ್, ಪ್ರಸ್ತುತ ಸಿನಿಮಾ ನಿರ್ಮಾಣದ ಪೂರ್ವಭಾವಿ ಕೆಲಸ ಕಾರ್ಯಗಳ ತಯಾರಿಯಲ್ಲಿದ್ದಾರೆ.
ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆಯ ಪುಟ್ಟ ಪೇಟೆ ಪ್ರದೇಶ ಮಂಜೇಶ್ವರ, ಇಲ್ಲಿ ಹೊಸಬೆಟ್ಟು ಎಂಬ ಗ್ರಾಮದಲ್ಲಿ ಬೆಳೆದ ಗೋವಿಂದ ಪೈ ಬಹುಭಾಷಾ ಪಂಡಿತರಾಗಿ ಸಾಹಿತ್ಯ ಕೃಷಿಯಲ್ಲಿ ತೊಡಗಿದರು. ಲ್ಯಾಟೀನ್‌, ಪಾಲಿ, ಸಂಸ್ಕೃತ ಭಾಷೆಗಳಲ್ಲೂ ಅವರಿಗೆ ಅಗಾಧ ಪಾಂಡಿತ್ಯವಿತ್ತು. ಇವರಿದ್ದ ಕವಿಮನೆಯನ್ನು ಕೇರಳ ಕರ್ನಾಟಕ ರಾಜ್ಯಗಳ ಸಹಯೋಗದಲ್ಲಿ ನವೀಕರಿಸಲಾಗಿದ್ದು, ಸಮುಚ್ಚಯವನ್ನು ಗಿಳಿವಿಂಡು ಎಂದು ಕರೆಯಲಾಗಿದೆ. ರಾಷ್ಟ್ರೀಯ ಸ್ಮಾರಕವಾಗಿರುವ ಕವಿಮನೆಯು ಸಾಹಿತ್ಯಾಸಕ್ತರ ಕೇಂದ್ರಬಿಂದುವಾಗಿದೆ. ಕೇರಳ ಸರಕಾರ ಮೂರು ದಶಕಗಳ ಹಿಂದೆ ಕವಿ ಸ್ಮರಣೆಯಲ್ಲಿ ಗೋವಿಂದ ಪೈ ಸರಕಾರಿ ಸ್ಮಾರಕ ಕಾಲೇಜು ಅನ್ನು ನಿರ್ಮಿಸಿದ್ದು ಕವಿ ಸಂಶೋಧಕನ ಮೇರು ವ್ಯಕ್ತಿತ್ವ ಮತ್ತು ಪಾಂಡಿತ್ಯಕ್ಕೆ ನೀಡಿದ ಗೌರವವಾಗಿದೆ. ಕನ್ನಡ ಸಿನಿರಂಗದಲ್ಲಿ ಕವಿ ಬದುಕಿನ ಮೇಲೆ ತೆರೆ ಮೇಲೆ ರಾರಾಜಿಸಲಿರುವ ಪ್ರಥಮ ಚಿತ್ರ ʼಮಹಾಕವಿʼ ಬಗ್ಗೆ ಸಾಕಷ್ಟು ಧನಾತ್ಮಕ ಅಭಿಪ್ರಾಯಗಳು ಕೇಳಿ ಬರುತ್ತಿವೆ.
ಕನ್ನಡದ ಹೆಸರಾಂತ ಯುವ ನಟ ವಿಜಯ ರಾಘವೇಂದ್ರ ʼಮಹಾಕವಿʼ ಚಿತ್ರದ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಚಿತ್ರವು ಗಡಿನಾಡು ಕಾಸರಗೋಡಿನ ಮಂಜೇಶ್ವರದಲ್ಲಿ ಸೆಟ್ಟೇರಲಿದೆ. ಸಿನಿಮಾ ಚಿತ್ರೀಕರಣವನ್ನು ಕವಿಮನೆಯಲ್ಲಿಯೇ ಆರಂಭಿಸುವ ಇರಾದೆಯೂ ಇದೆ. ಕಳೆದ ವರ್ಷ ಕೊರೊನಾ ಲಾಕ್‌ಡೌನ್‌ಆದ ಕಾರಣ ಸಿನಿಮಾ ಚಿತ್ರೀಕರಣದ ಆರಂಭ ಕೊಂಚ ತಡವಾಗಿದೆ. ಉತ್ತಮ ತಂಡದೊಂದಿಗೆ ಒಂದು ಉತ್ತಮ ಸಿನಿಮಾವನ್ನು ಕನ್ನಡ ಸಿನಿಮಾಸಕ್ತರ, ಸಾಹಿತ್ಯಾಸಕ್ತರ ಮುಂದಿಡಲು ಖುಷಿ ಮತ್ತು ಹೆಮ್ಮೆಯಿದೆ.
ರಘು ಭಟ್
ಮಹಾಕವಿ ನಿರ್ಮಾಪಕ
News13
ಸಮಾಜದ ಉತ್ತಮ ಸುದ್ದಿಗಳನ್ನು ನಾವು ನಿಮ್ಮ ಮುಂದಿಡುವ ಪ್ರಯತ್ನವನ್ನು ಮಾಡುತ್ತಿದ್ದೇವೆ. ಪ್ರೋತ್ಸಾಹಿಸಿ, ಸ್ವೀಕರಿಸಿ. ನೀವು ಸ್ವೀಕರಿಸಿದಾಗ ನಾವು ಬೆಳೆಯಬಹುದು. ಒಳ್ಳೆಯ ಸುದ್ದಿಗಳಿಗೆ ಸಮಾಜ ತೆರೆದುಕೊಂಡಿದೆ ತಲುಪಿಸುವವರು ನಾವಾಗಬಾರದೇಕೆ?
ನ್ಯೂಸ್ 13 ಸಮಾಜದ ಧನಾತ್ಮಕ ಸುದ್ದಿಗಳನ್ನು ಹಾಗೂ ರಾಷ್ಟ್ರೀಯ ವಿಚಾರಗಳನ್ನು ನಿಮಗೆ ತಲುಪಿಸುವ ಪ್ರಯತ್ನ ಮಾಡುತ್ತದೆ. ಈ ರೀತಿ ಇನ್ನಷ್ಟು ಉತ್ತಮ ಸುದ್ದಿಗಳನ್ನು ತಲುಪಿಸಲು ನಿಮ್ಮ ಸಹಕಾರವನ್ನು ಅಪೇಕ್ಷಿಸುತ್ತಿದ್ದೇವೆ. ಈ ಕಾರ್ಯದಲ್ಲಿ ನೀವೂ ನಮ್ಮೊಂದಿಗೆ ಜೊತೆಯಾಗಿ.
News13 strives to publish and promote positive news/happenings and nationalistic thoughts. Join hands with us in this constructive cause. We hope and expect your co-operation in this objective of broadcasting news that shall keep up with quality journalism.
