ನಕಲಿ ಡಾಕ್ಟರ್‌ನಿಂದ ವಂಚನೆ

ಉಡುಪಿ: ಪರ್ಕಳದ ಹೆರ್ಗ ಗ್ರಾಮದ ಮಾರುತಿನಗರದ ಸುನೀಲ್ ಪೂಜಾರಿ ಅವರ ಕುಟುಂಬ ವಂಚನೆಗೆ ಒಳಗಾದ ಘಟನೆ ಇತ್ತೀಚೆಗೆ ನಡೆದಿದೆ. ಇಲ್ಲಿಗೆ ಕೆಲ ದಿನಗಳ ಹಿಂದೆ ಕಾರಿನಲ್ಲಿ ಆಗಮಿಸಿದ್ದ ವ್ಯಕ್ತಿಯೊಬ್ಬ ತಾನು ಆಯುರ್ವೇದೀಯ ಮದ್ದು ನೀಡಿ ದೀರ್ಘ ಕಾಲ ಹುಷಾರಿಲ್ಲದ ಮಕ್ಕಳನ್ನು ಗುಣಪಡಿಸುವುದಾಗಿ ನಂಬಿಸಿ ಯಾರಾದರೂ ಅಂತಹ ಮಕ್ಕಳಿದ್ದಾರಾ ಎಂದು ಅಲ್ಲಿದ್ದವರಲ್ಲಿ ವಿಚಾರಿಸಿದಾಗ ಸ್ಥಳೀಯರು ಸುನೀಲ್ ಅವರ ಮಗನ ಬಗ್ಗೆ ತಿಳಿಸಿದ್ದರು. ಅಲ್ಲಿಂದ ನೇರವಾಗಿ ಸುನೀಲ್ ಅವರ ಮನೆಯಲ್ಲಿ ವಿಚಾರಿಸಿದ್ದನು.

ಸುನೀಲ್ ಅವರ ಮನೆಗೆ ಬಂದ ವ್ಯಕ್ತಿಯು ತಾನು ಡಾ| ನರೇಶ್ ಎಂದು ತನ್ನ ಗುರುತು ನೀಡಿದ್ದು, ಪೂರ್ತಿ ವಿವರ ನೀಡಲು ನಿರಾಕರಿಸಿದ್ದಾನೆ. ತೀರ್ಥಹಳ್ಳಿಯ ಪರಂಪರಾ ಆಯುರ್ವೇದ ಆಸ್ಪತ್ರೆ. ಶಿರಸಿ, ಕುಂದಾಪುರದ ಚೇರ್ಕಾಡಿಯಲ್ಲಿ ಶಾಖೆ ಇದ್ದು, ಬುದ್ಧಿಮಾಂದ್ಯ ಮಕ್ಕಳನ್ನು ಗುರುತಿಸಿ ಅವರನ್ನು ಗುಣಪಡಿಸುವುದು ಸಂಸ್ಥೆಯ ಉದ್ದೇಶ. ಕೆಲವೊಂದು ಔಷಧಿಗಳು ಉಚಿತವಾಗಿಯೂ ದೊರೆಯುತ್ತದೆ ಎಂದು ಹೇಳಿದ್ದಾನೆ.

ನಕಲಿ ವೈದ್ಯನನ್ನು ಅಸಲಿ ಎಂದು ತಿಳಿದು ಹಣವನ್ನು ನೀಡಿದ ಸುನಿಲ್, ಇತರರಲ್ಲಿ ವಿಚಾರಿಸಿದಾಗ ತಾನು ಮೋಸ ಹೋದ ಬಗ್ಗೆ ಮನೆಯವರಿಗೆ ಅರಿವಾಗಿದೆ. ಆತ ನೀಡಿದ ವಿಸಿಟಿಂಗ್ ಕಾರ್ಡ್‌ನ ಮೊಬೈಲ್ ಸಂಖ್ಯೆಗೆ ಕರೆ ಮಾಡಿದಾಗ ಮೊಬೈಲ್ ಸ್ವಿಚ್ ಆಫ್ ಆಗಿರುವುದು ತಿಳಿದು ಬಂದಿದೆ.

ಬಳಿಕ ಸುನಿಲ್ ಅವರು ಶಾಸಕರನ್ನು ಭೇಟಿ ಮಾಡಿ ವಿಷಯ ತಿಳಿಸಿ ಅವರ ಸೂಚನೆಯಂತೆ ಮಣಿಪಾಲ ಠಾಣೆಗೆ ದೂರು ನೀಡಿದ್ದಾರೆ.

ನರೇಶ್ ತಾನು ನೀಡುವ ಮದ್ದಿಗೆ ೭,೫೦೦ ರೂ. ಮಾತ್ರ. ಬೇರೆ ಕಡೆ ತುಂಬಾ ಜಾಸ್ತಿ ಇದೆ. ನಿಮ್ಮ ಮಗುವಿಗೆ ಕೈ-ಕಾಲುಗಳು ಬಲಗೊಳ್ಳಲು ಬೆಲ್ಟ್‌ನಲ್ಲಿ ವ್ಯಾಯಾಮದ ಅಗತ್ಯವಿದೆ. ಬೆಲ್ಟ್‌ಗೆ ೧೫ ಸಾವಿರ ಇದ್ದು, 7,500 ರೂ. ನೀಡುವಂತೆ ಹೇಳಿದ್ದಾನೆ. ಸುನೀಲ್ ಅವರು ಮಿತ್ರನ ಸಹಾಯದಿಂದ ನರೇಶ್‌ಗೆ ಹಣ ನೀಡಿದ್ದಾರೆ.

ಆತ ಕೊಟ್ಟ ಮಾತ್ರೆಯನ್ನು ಮಗುವಿಗೆ ಬೆಳಗ್ಗೆ 9 ಗಂಟೆಗೆ ಕೊಟ್ಟಿದ್ದು, ಮಧ್ಯಾಹ್ನ 2 ರ ವರೆಗೂ ಮಗುವಿಗೆ ಎಚ್ಚರ ಇಲ್ಲದಿರುವುದನ್ನು ಕಂಡು ಗಾಬರಿಗೊಂಡು ಮನೆಯವರು ಮತ್ತೆ ಯಾವುದೇ ಔಷಧ ನೀಡಲಿಲ್ಲ.

ಡಾ| ನರೇಶ್ ಎಂದು ಪರಿಚಯಿಸಿ ಕೊಂಡಿದ್ದ ಆತ ಮನೆಯವರಿಗೆ ನೀಡಿದ ತನ್ನ ವಿಸಿಟಿಂಗ್ ಕಾರ್ಡ್ ಕೂಡ ನಕಲಿಯಾಗಿದೆ. ಕಾರ್ಡಿನಲ್ಲಿ ವಿ. ಮರೇಶ್, ಹಕೀಮ್ ಆಯುರ್ವೇದಿಕ್ ಎಂದು ಇದೆ. ಫೋನ್ ನಂಬರನ್ನು ತಿದ್ದಲಾಗಿದೆ. ಶ್ರೀ ರಾಘವೇಂದ್ರ, ಪಂಚಾಮೃತಮ್ ವೈದ್ಯಶಾಲಾ ಶಾಂತಿ ನಿಲಯಂ, ಬಂಜಾರ ಹಿಲ್ಸ್, ಹೈದರಾಬಾದ್, ಮಂತ್ರಾಲಯಂ, ಟ್ರಸ್ಟ್ ನಂ. ೧೪ ಎಂದು ಮಧ್ಯದಲ್ಲಿದೆ.

ಕೊನೆಯಲ್ಲಿ ಗುಲ್ಬರ್ಗಾ ಮುಸ್ಲಿಮ್ ಚೌಕ್, ಆಯುರ್ವೇದಿಕ್ ಸೇವಾ ಸಂಸ್ಥೆ ಹಾಗೂ ಹುಬ್ಬಳ್ಳಿ, ಧರ್ಮಸ್ಥಳ ಹೆಗ್ಡೆ ಆಯುರ್ವೇದಿಕ್ ಸಂಸ್ಥೆ ಎಂದು ಅಚ್ಚುಗೊಂಡಿದೆ. ಹಾಗಾಗಿ ಈ ನಕಲಿ ವೈದ್ಯ ಬೇರೆಯವರ ಕಾರ್ಡನ್ನು ನಕಲಿ ಮಾಡಿ ಇತರರನ್ನು ಯಾಮಾರಿಸುತ್ತಿದ್ದಾನೆ ಎಂದು ಮೇಲ್ನೋಟಕ್ಕೆ ಸ್ಪಷ್ಟವಾಗಿದೆ.