ಮಂಗಳೂರು: ಜಿಲ್ಲಾಸ್ಪತ್ರೆಯಲ್ಲಿ ಸರ್ಜಿಕಲ್ ಕಟ್ಟಡ ಕಾಮಗಾರಿಗೆ ‌ಶಂಕುಸ್ಥಾಪನೆ

ಮಂಗಳೂರು: ನಗರದ ಜಿಲ್ಲಾ ಆಸ್ಪತ್ರೆಯ ಆವರಣದಲ್ಲಿ ಮಂಗಳೂರು ಸ್ಮಾರ್ಟ್ ಸಿಟಿ ಯೋಜನೆಯಡಿಯಲ್ಲಿ 37.52 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಾಣ‌ವಾಗಲಿರುವ ಸರ್ಜಿಕಲ್ ಕಟ್ಟಡ ಕಾಮಗಾರಿ‌ಗೆ ಬಿಜೆಪಿ ರಾಜ್ಯಾಧ್ಯಕ್ಷ ನಳಿನ್ ಕುಮಾರ್ ಕಟೀಲ್ ಶಿಲಾನ್ಯಾಸ ನೆರವೇರಿಸಿದ್ದಾರೆ.

ದೇಶದಲ್ಲಿ‌ಯೇ ಮಂಗಳೂರು ನಗರವನ್ನು ನಂಬರ್ ಒನ್ ಮತ್ತು ಮಾದರಿ ನಗರವನ್ನಾಗಿ ಮಾಡುವ ನಿಟ್ಟಿನಲ್ಲಿ ಕೆಲಸ ಕಾರ್ಯಗಳು ನಡೆಯುತ್ತಿವೆ. ಈ ಹಿನ್ನೆಲೆಯಲ್ಲಿ ಮಂಗಳೂರು ಸ್ಮಾರ್ಟ್ ಸಿಟಿ ಯೋಜನೆಯ ಕಾಮಗಾರಿ‌ಗಳಿಗೂ ಹೆಚ್ಚಿನ ವೇಗ ದೊರೆತಿದೆ ಎಂದು ಕಟೀಲು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ನಗರದ ವೆನ್ಲಾಕ್ ಆಸ್ಪತ್ರೆಯನ್ನು ಸುಸಜ್ಜಿತಗೊಳಿಸುವ ಸಲುವಾಗಿ ಹೆಚ್ಚು ಪ್ರಾಶಸ್ತ್ಯ ನೀಡಲಾಗಿದ್ದು, ಶೀಘ್ರ‌ದಲ್ಲೇ ನೂತನ ಕಟ್ಟಡ ನಿರ್ಮಾಣ‌ದ ಜೊತೆಗೆ ಸಾರ್ವಜನಿಕ‌ರಿಗೆ ಮತ್ತಷ್ಟು ಪರಿಣಾಮ‌ಕಾರಿ ಸೇವೆ ನೀಡಲು ಮುಂದಾಗುವುದಾಗಿಯೂ ಕಟೀಲು ತಿಳಿಸಿದ್ದಾರೆ.

ಸದ್ಯ ಶಂಕುಸ್ಥಾಪನೆ‌ಯಾಗಿರುವ ನೂತನ ಕಟ್ಟಡದ ಯೋಜನೆಯು, 12,089 ಚ. ಮೀ. ವಿಸ್ತೀರ್ಣ ಹೊಂದಿದೆ. ಇದು ಐದು ಮಹಡಿಗಳನ್ನು ಹೊಂದಿರಲಿದ್ದು, ಸ್ಕ್ಯಾನಿಂಗ್, ಸ್ಕ್ಯಾನಿಂಗ್ ಘಟಕ, ವಿಕಿರಣ ಶಾಸ್ತ್ರ, ಲಾಂಡ್ರಿ, ಔಷಧಾಲಯ, ಆಲ್ಟ್ರಾ ಸೌಂಡ್, ಪ್ರತ್ಯೇಕ ಕ್ಲೀನಿಂಗ್ ವ್ಯವಸ್ಥೆ, ಪೋಸ್ಟ್ ಕಾರಿಡಾರ್, ಪ್ರೀ ಆಪರೇಟಿವ್, ಪೋಸ್ಟ್ ಆಪರೇಟಿವ್ ಮೊದಲಾದ ಅತ್ಯಾಧುನಿಕ ವ್ಯವಸ್ಥೆ‌ಗಳನ್ನು ಹೊಂದಿರಲಿದೆ.