ಜೋ ಬೈಡನ್‌ ಯುಗ: ನಿರೀಕ್ಷೆಗಳು ಮತ್ತು ಮೋದಿಯ ಭಾರತ

ಅಮೆರಿಕಾದಲ್ಲಿ ಡೊನಾಲ್ಡ್‌ ಟ್ರಂಪ್‌ ಯುಗ ಅಂತ್ಯಗೊಂಡು ಜೋ ಬೈಡನ್‌ ಯುಗ ಆರಂಭವಾಗುತ್ತಿದೆ. ಇದರಿಂದ ಭಾರತದ ಮೇಲೆ ಯಾವ ರೀತಿಯ ಪರಿಣಾಮ ಬೀಳಲಿದೆ ಎಂಬ ಕುತೂಹಲ ಎಲ್ಲರಿಗೂ ಇದೆ. ದಕ್ಷಿಣ ಏಷ್ಯಾದ ಭಯೋತ್ಪಾದನೆಯ ಬಗ್ಗೆ ಶೂನ್ಯ ಸಹಿಷ್ಣುತೆಯ ಧೋರಣೆಯನ್ನು ಬೈಡನ್‌ ಸರ್ಕಾರ ತಳೆದರೆ ಪಾಕಿಸ್ಥಾನ ಮತ್ತು ಅದರ ಪರಮ ಮಿತ್ರ ಚೀನಾದ ವಿಷಯದಲ್ಲಿ ಭಾರತಕ್ಕೆ ಪ್ರಯೋಜನವೇ ಆಗಲಿದೆ.

ಖಂಡಿತವಾಗಿಯೂ, ಭಾರತವನ್ನು ಕಾರ್ಯತಂತ್ರದ ಪಾಲುದಾರನಾಗಿ ಉಳಿಸಿಕೊಳ್ಳುವ ಬಗ್ಗೆ ಶ್ವೇತಭವನ ಮತ್ತು ಯುಎಸ್ ಸ್ಟೇಟ್ ಡಿಪಾರ್ಟ್ಮೆಂಟ್ ಏಪಕ್ಷೀಯವಾಗಿ ಒಮ್ಮತವನ್ನು ತೋರಿಸಿದೆ. ಒಂದು ವೇಳೆ ಜೋ ಬೈಡನ್ ಕಾಶ್ಮೀರದ ವಿಷಯದಲ್ಲಿ ಭಾರತಕ್ಕೆ ಮುಜುಗರವನ್ನು ತರಲು ಪ್ರಯತ್ನಿಸಿದರೆ ಪರಿಸ್ಥಿತಿ ಖಂಡಿತವಾಗಿಯೂ ಬದಲಾಗಬಹುದು. ಡೊನಾಲ್ಡ್ ಟ್ರಂಪ್ ಆಡಳಿತ ಕಾಶ್ಮೀರ ವಿಷಯದಲ್ಲಿ ಭಾರತವನ್ನು ಕೆಣಕುವ ಪ್ರಯತ್ನ ಮಾಡಿಲ್ಲ. ಪಾಕಿಸ್ಥಾನದ ಯಾವುದೇ ಮಾತಿಗೂ ಸೊಪ್ಪು ಹಾಕಿಲ್ಲ. ಮೋದಿ ಸರಕಾರದ ಹಿಂದುತ್ವ ಪರ ಆಡಳಿತದ ವಿಷಯದಲ್ಲಿ ಮೂಗು ತೂರಿಸುವ ಪ್ರಯತ್ನವನ್ನು ನಡೆಸಿಲ್ಲ.

ಜೋ ಬೈಡನ್ ಅವರಂತೆ ಡೆಮೋಕ್ರಾಟ್ ಆಗಿದ್ದ ಬರಾಕ್ ಒಬಾಮ ನರೇಂದ್ರ ಮೋದಿಯವರನ್ನು ಶ್ವೇತಭವನಕ್ಕೆ ‘ಕೇಮ್ ಚೋ’ ಎಂಬ ಗುಜರಾತಿ ವಾಕ್ಯದಿಂದ ಬರಮಾಡಿಕೊಂಡಿದ್ದರು. ಮೋದಿ ಕೂಡ ಬರಾಕ್ ಒಬಾಮ ಅವರನ್ನು ಅವರ ಮೊದಲ ಹೆಸರಾದ ಬರಾಕ್ ಎಂದು ಸಂಬೋಧಿಸುತ್ತಿದ್ದರು. ಹೆಚ್ಚಿನ ವಿಶ್ವ ನಾಯಕರು ಇದನ್ನು ಮಾಡಿಲ್ಲ. ಬಬಾಮ ಮತ್ತು ಮೋದಿ ನಡುವೆ ಉತ್ತಮ ಸ್ನೇಹವೂ ಇತ್ತು.

ತಜ್ಞರ ಪ್ರಕಾರ, ಬೈಡನ್ ಅವರು ಭಾರತ ಮತ್ತು ಅಮೆರಿಕ ಪರಿಣಾಮಕಾರಿ ನೈಸರ್ಗಿಕ ಪಾಲುದಾರರು ಎಂಬ ಬಗ್ಗೆ ಬಲವಾದ ನಂಬಿಕೆಯನ್ನು ಹೊಂದಿದ್ದಾರೆ. ಭಾರತ ಸರಕಾರವನ್ನು ನಿರ್ಲಕ್ಷ್ಯ ಮಾಡುವಂತಹ ಸರ್ಕಾರ ಅಮೆರಿಕದಲ್ಲಿ ಬರಲು ಸಾಧ್ಯವೇ ಇಲ್ಲ ಎಂಬ ಮಾತು ಕೂಡ ಇದೆ.

ಸ್ವಲ್ಪ ಸಮಯದ ಹಿಂದೆ ಆ್ಯಂಟನಿ ಬ್ಲಿಂಕೆನ್ (ಯುಎಸ್‌ ವಿದೇಶಾಂಗ ಕಾರ್ಯದರ್ಶಿಯಾಗುವ ಸಾಧ್ಯತೆ ಇದೆ) ಅವರು, “ಬೈಡೆನ್ ಆಡಳಿತದಲ್ಲಿ, ಭಾರತವು  ಯುಎನ್‌ಎಸ್‌ಸಿ ಒಳಗೊಂಡಂತೆ ಅಂತರರಾಷ್ಟ್ರೀಯ ಸಂಸ್ಥೆಗಳಲ್ಲಿ ಪ್ರಮುಖ ಪಾತ್ರ ವಹಿಸುವಂತೆ ಮಾಡಲು ನಾವು ಭಾರತಕ್ಕೆ ಬೆಂಬಲ ನೀಡುತ್ತೇವೆ” ಎಂದು ಹೇಳಿದ್ದರು.

“ಜೋ ಬೈಡೆನ್ ಅಧ್ಯಕ್ಷರಾಗಿ  ನಮ್ಮ ಪ್ರಜಾಪ್ರಭುತ್ವವನ್ನು ನವೀಕರಿಸುವುದು, ಭಾರತದಂತಹ ನಮ್ಮ ಆಪ್ತರೊಂದಿಗೆ ಕೆಲಸ ಮಾಡುವುದು, ನಮ್ಮ ಮೌಲ್ಯಗಳನ್ನು ಪ್ರತಿಪಾದಿಸುವುದನ್ನು ನೀವು ನೋಡುತ್ತೀರಿ ಎಂದು ನಾನು ಭಾವಿಸುತ್ತೇನೆ. ಆ ಪ್ರಯತ್ನದಲ್ಲಿ ಭಾರತ ಪ್ರಮುಖ ಪಾಲುದಾರನಾಗಿರಬೇಕು ”ಎಂದು  ಆಗಸ್ಟ್‌ನಲ್ಲಿ ಭಾರತದ ಮಾಜಿ ಅಮೆರಿಕದ ರಾಯಭಾರಿ ರಿಚರ್ಡ್ ವರ್ಮಾ ಅವರ ಪ್ರಶ್ನೆಗೆ ಬ್ಲಿಂಕೆನ್ ಉತ್ತರಿಸಿದ್ದಾರೆ.

ಬೈಡೆನ್ ಅವರ ಸಂಭಾವ್ಯ ಉನ್ನತ ರಾಜತಾಂತ್ರಿಕರಾಗಲಿರುವ ಒಬ್ಬರು ಹೀಗೆ ಹೇಳಿದ್ದಾರೆ, “ಒಬಾಮಾ ಆಡಳಿತದ ಸಮಯದಲ್ಲಿ, ಭಾರತವನ್ನು ಇಂಡೋ-ಪೆಸಿಫಿಕ್ ಕಾರ್ಯತಂತ್ರದ ಪ್ರಮುಖ ಕೊಡುಗೆಯ ಸದಸ್ಯನಾಗಿ ಸ್ಥಾಪಿಸಲು ನಾವು ತುಂಬಾ ಶ್ರಮಿಸಿದ್ದೇವೆ. ಇಂಡೋ ಪೆಸಿಫಿಕ್‌ನಲ್ಲಿ ನಿಯಮ-ಆಧಾರಿತ ಕ್ರಮವನ್ನು ಬಲಪಡಿಸಲು ಮತ್ತು ಎತ್ತಿಹಿಡಿಯಲು ಸಮಾನ ಮನಸ್ಕ ಪಾಲುದಾರರೊಂದಿಗೆ ಕೆಲಸ ಮಾಡುವಲ್ಲಿ ಭಾರತದ ಪಾತ್ರವನ್ನು ಅದು ಒಳಗೊಂಡಿದೆ, ಇದರಲ್ಲಿ ಚೀನಾ ಸೇರಿದಂತೆ ಯಾವುದೇ ದೇಶವು ತನ್ನ ನೆರೆಹೊರೆಯವರಿಗೆ ನಿರ್ಭಯದಿಂದ ಬೆದರಿಕೆ ಹಾಕಲು ಸಾಧ್ಯವಿಲ್ಲ. ಆ ಪಾತ್ರವು ಪ್ರದೇಶವನ್ನು ಮೀರಿ ವಿಸ್ತರಿಸಬೇಕಾಗಿದೆ”.

ಅಧ್ಯಕ್ಷರು ಚುನಾಯಿತರಾದ ಬೈಡೆನ್ ಮತ್ತು ಮೋದಿ ನಡುವೆ, ಕಳೆದ ವಾರ ನಿರ್ಣಾಯಕ ಮತ್ತು ಔಪಚಾರಿಕ ಟೆಲಿ ಸಂಭಾಷಣೆ ನಡೆದಿದ್ದು, ಈ ವೇಳೆ ಮಹತ್ವದ ಮಾತುಕತೆಗಳು ನಡೆದಿವೆ. ಕೋವಿಡ್ -19 ಸಾಂಕ್ರಾಮಿಕ, ಕೈಗೆಟುಕುವ ಲಸಿಕೆಗಳನ್ನು ಉತ್ತೇಜಿಸುವುದು, ಹವಾಮಾನ ಬದಲಾವಣೆಯನ್ನು ನಿಭಾಯಿಸುವುದು ಮತ್ತು ಮುಖ್ಯವಾಗಿ ಇಂಡೋ-ಪೆಸಿಫಿಕ್ ಪ್ರದೇಶದಲ್ಲಿ ವರ್ಧಿತ “ಸಹಕಾರ” ಸೇರಿದಂತೆ ಉಭಯ ನಾಯಕರು ತಮ್ಮ ಆದ್ಯತೆಗಳ ಬಗ್ಗೆ ಚರ್ಚಿಸಿದ್ದಾರೆ.

ಬಹುಶಃ ಬೈಡೆನ್ ಚೀನಾದೊಂದಿಗಿನ ಸಹಕಾರದ ಕ್ಷೇತ್ರಗಳನ್ನು ಹೆಚ್ಚು ಸಕ್ರಿಯವಾಗಿ ಹುಡುಕಬಹುದು ಎಂದು ಒಂದು ಚಿಂತನೆಯು ಹೇಳುತ್ತದೆ. ಆದರೂ ಚೀನಾದ ಆಕ್ರಮಣಕಾರಿ ಆರ್ಥಿಕ ಅಭ್ಯಾಸಗಳನ್ನು ಎದುರಿಸುವ ಅಧ್ಯಕ್ಷ ಟ್ರಂಪ್ ಅವರ ನೀತಿಯನ್ನು ಬೈಡೆನ್ ಮುಂದುವರಿಸುತ್ತಾರೆ ಎಂಬ ಬಲವಾದ ಅಭಿಪ್ರಾಯವೂ ಇದೆ. ಆದರೆ ಈ ಹಾದಿಯಲ್ಲಿ ಅವರು ಏಕಾಂಗಿ ನಡೆ ಅನುಸರಿಸಬಹುದು ಅಥವಾ ಇತರರನ್ನೂ ಕರೆದೊಯ್ಯಬಹುದು.

ಭಾರತೀಯ ಸನ್ನಿವೇಶದಿಂದ ಹೇಳುವುದಾದರೆ, ನಿಕಟವಾದ ಮತ್ತು ವರ್ಧಿತ ಇಂಡೋ-ಯುಎಸ್ ಸಂಬಂಧಗಳು ಜೋ ಬೈಡನ್‌ ಆಗಮನದಿಂದ ಹೆಚ್ಚೇನೂ ಬದಲಾಗದು. ಕಾಲದೊಂದಿಗೆ ಅದು ಏರುಪೇರಾಗಬಹುದು ಅಷ್ಟೇ. ಆದರೆ ಪಾಕಿಸ್ಥಾನ ಮತ್ತು ಚೀನಾದ ಬಗೆಗಿನ ಅದು ತಾಳುವ ನಿಲುವು ಹೇಗಿರಬಹುದು ಎಂಬುದನ್ನು ಭಾರತ ಅತ್ಯಂತ ಕುತೂಹಲದಿಂದಲೇ ಗಮನಿಸಲಿದೆ.