ಕೊರೋನಾಗೆ ಸಂಬಂಧಿಸಿದಂತೆ ವಿಶ್ವದ ಕಣ್ಣು ಇದೀಗ ಭಾರತದತ್ತ ನೆಟ್ಟಿದೆ. ಕಡಿಮೆ ಅವಧಿಯಲ್ಲಿ ಮತ್ತು ಕಡಿಮೆ ದರದಲ್ಲಿ ಕೊರೋನಾ ಸೋಂಕು ತಗುಲಿದೆಯೋ, ಇಲ್ಲವೋ ಎಂಬುದನ್ನು ಪತ್ತೆ ಹಚ್ಚಲು ಪೂರಕವಾಗುವಂತೆ ಪರೀಕ್ಷೆ ನಡೆಸಲು ಫೆಲುಡಾ ಎಂಬ ಕೊರೋನಾ ಟೆಸ್ಟಿಂಗ್ ವಿಧಾನವನ್ನು ಬಳಕೆ ಮಾಡಲಾಗುತ್ತಿದೆ. ಇದಕ್ಕೆ ಈಗಾಗಲೇ ಔಷಧ ನಿಯಂತ್ರಕ ಮಂಡಳಿ ಅನುಮತಿ ನೀಡಿದೆ. ಫೆಲುಡಾವನ್ನು ಭಾರತದ ಪ್ರಮುಖ ಸಂಸ್ಥೆಯಾದ ಟಾಟಾ ತಯಾರಿಸಲಿದೆ ಮತ್ತು ಇದು ಮಾರುಕಟ್ಟೆಯಲ್ಲಿ ಲಭ್ಯವಿರುವ ವಿಶ್ವದ ಮೊದಲ ಪೇಪರ್ ಆಧಾರಿತ ಕೋವಿಡ್ -19 ಪರೀಕ್ಷೆಯೂ ಆಗಿದೆ.
ಈ ವಿಧಾನವನ್ನು ಸಿಎಸ್‌ಐ‌ಆರ್‌ನ ಇನ್ಸ್ಟಿಟ್ಯೂಟ್ ಆಫ್ ಜಿನೋಮಿಕ್ಸ್ ಆಂಡ್ ಇಂಟಗ್ರೇಟಿವ್ ಬಯಾಲಜಿಯ ವಿಜ್ಞಾನಿಗಳು ಅಭಿವೃದ್ಧಿ ಮಾಡಿದ್ದಾರೆ. ಅಂದಾಜಿನ ಪ್ರಕಾರ ಹೇಳುವುದಾದರೆ ಈ ಪರೀಕ್ಷೆ 500 ರೂ. ಗಳ ಒಳಗೆ ನಡೆಯಲಿದೆ ಎಂದು ಮಾಹಿತಿ ಇದೆ. ಇದರಲ್ಲಿ ಕೊರೋನಾ ಸೋಂಕಿಗೆ ಕಾರಣವಾಗುವ ವೈರಾಣುಗಳ ಪತ್ತೆಗೆ ಕ್ರಿಸ್ಪರ್ ಜೀನ್ ಎಡಿಟಿಂಗ್ ತಂತ್ರಜ್ಞಾನವನ್ನು ಬಳಕೆ ಮಾಡಲಾಗುತ್ತದೆ ಎಂದು ವಿಜ್ಞಾನಿಗಳು ತಿಳಿಸಿದ್ದಾರೆ. ಸದ್ಯ ಈ ಪರೀಕ್ಷೆ ನಡೆಸಲು ಔಷಧ ನಿಯಂತ್ರಕ ಮಂಡಳಿ ಒಪ್ಪಿಗೆ ಸೂಚಿಸಿದೆ.
ಇದೊಂದು ಸಣ್ಣ ಕಿಟ್ ಆಗಿದ್ದು, ಗರ್ಭ ಧಾರಣೆ ಪರೀಕ್ಷೆ ನಡೆಸುವಷ್ಟೇ ಸರಳ ವಿಧಾನದ ಮೂಲಕ ಇದನ್ನು ಮಾಡಲಾಗುತ್ತದೆ. ಮಾದರಿಗಳನ್ನು ಕೆಲವು ತಂತ್ರಜ್ಞಾನ ಆಧಾರಿತ‌ವಾಗಿ ತಯಾರು ಮಾಡಲಾದ ಈ ಪಟ್ಟಿಯ ಮೇಲೆ ಹಾಕುವ ಮೂಲಕ ಈ ಪರೀಕ್ಷೆ ನಡೆಸಲಾಗುತ್ತದೆ. ಕೇವಲ ಒಂದು ಗಂಟೆಯ ಒಳಗೆ ಇದರ ಫಲಿತಾಂಶ ಸಹ ಬರಲಿದೆ ಎಂದು ವಿಜ್ಞಾನಿಗಳು ಮಾಹಿತಿ ನೀಡಿದ್ದಾರೆ.
ಇದನ್ನು ವಿಜ್ಞಾನಿಗಳಾದ ದೆಬೋಜ್ಯೋತಿ ಚಕ್ರವರ್ತಿ ಮತ್ತು ಸೊವುವಿಕ್ ಮೈತಿ ಅವರು ಸೋಂಕು ಪರೀಕ್ಷೆ ನಡೆಸುವ ಮೂಲಕ ಪರೀಕ್ಷೆಗೆ ಒಳಪಡಿಸಿದ್ದಾರೆ. ನೂರು ದಿನಗಳಲ್ಲಿ ಈ ಪ್ರಯತ್ನ ನಡೆಸಿ ತಂಡ ಯಶಸ್ಸು ಗಳಿಸಿದೆ ಎಂದು ಸಂಸ್ಥೆ‌ಯ ನಿರ್ದೇಶಕ ಅನುರಾಗ್ ಅಗರ್‌ವಾಲ್ ತಿಳಿಸಿದ್ದಾರೆ. ಭವಿಷ್ಯದ‌ಲ್ಲಿ ಇದನ್ನು ಬೇರೆ ಸೋಂಕುಗಳನ್ನು ಪತ್ತೆ ಹಚ್ಚಲು ಸಾಧ್ಯವಾಗುವಂತೆ ಮರುವಿನ್ಯಾಸ ಮಾಡಬಹುದಾಗಿದೆ.
ಸತ್ಯಜಿತ್‌ ರೇ ಅವರ ಕಥೆಗಳಲ್ಲಿ ಬರುವ ಡಿಟೆಕ್ಟಿವ್‌ ಪಾತ್ರಧಾರಿ ʼಫೆಲುಡಾʼ ಹೆಸರನ್ನು ಇದಕ್ಕೆ ನೀಡಲಾಗಿದೆ. ಈ ಭಾರತ ನಿರ್ಮಿತ ಸಾಧನವನ್ನು ತಯಾರಿಸಲು ಸಿಎಸ್‌ಐ‌ಆರ್‌, ಐಜಿಐಬಿ, ಐಸಿಎಂಆರ್‌ನ ಜೊತೆಗೆ ಟಾಟಾ ಗ್ರೂಪ್ ಸಹ ಕೈಜೋಡಿಸಿದೆ ಎಂದು ಮೂಲಗಳು ತಿಳಿಸಿವೆ.
ಭಾರತದ ವಿಜ್ಞಾನಿಗಳ ತಂಡವು ಕರೋನವೈರಸ್‌ಗಾಗಿ ಅಗ್ಗದ ಕಾಗದ ಆಧಾರಿತ ಪರೀಕ್ಷೆಯನ್ನು ಅಭಿವೃದ್ಧಿಪಡಿಸಿದ್ದು ಒಂದು ಮಹತ್ವದ ಸಾಧನೆಯೇ ಆಗಿದೆ.
ಪ್ರಸಿದ್ಧ ಭಾರತೀಯ ಕಾಲ್ಪನಿಕ ಪತ್ತೇದಾರಿ ಹೆಸರಿನ ಈ ಪರೀಕ್ಷೆಯು, ಕ್ರಿಸ್ಪರ್ ಎಂಬ ಜೀನ್-ಎಡಿಟಿಂಗ್ ತಂತ್ರಜ್ಞಾನವನ್ನು ಆಧರಿಸಿದೆ. ಫೆಲುಡಾ ಕಿಟ್ ಒಂದು ಗಂಟೆಯೊಳಗೆ ಫಲಿತಾಂಶಗಳನ್ನು ನೀಡುತ್ತದೆ ಮತ್ತು ಈ ಪರೀಕ್ಷೆಗೆ 500 ರೂಪಾಯಿಗಳಷ್ಟು ವೆಚ್ಚವಾಗುತ್ತದೆ ಎಂದು ವಿಜ್ಞಾನಿಗಳು ಅಂದಾಜಿಸಿದ್ದಾರೆ.
ಹೊಸ ಪರೀಕ್ಷೆಯು 96% ಸೂಕ್ಷ್ಮತೆ ಮತ್ತು 98% ನಿರ್ದಿಷ್ಟತೆಯನ್ನು ಹೊಂದಿದೆ ಎಂಬುದನ್ನು ವಿಜ್ಞಾನಿಗಳು ಕಂಡುಕೊಂಡಿದ್ದಾರೆ.
Admin
ಸಮಾಜದ ಉತ್ತಮ ಸುದ್ದಿಗಳನ್ನು ನಾವು ನಿಮ್ಮ ಮುಂದಿಡುವ ಪ್ರಯತ್ನವನ್ನು ಮಾಡುತ್ತಿದ್ದೇವೆ. ಪ್ರೋತ್ಸಾಹಿಸಿ, ಸ್ವೀಕರಿಸಿ. ನೀವು ಸ್ವೀಕರಿಸಿದಾಗ ನಾವು ಬೆಳೆಯಬಹುದು. ಒಳ್ಳೆಯ ಸುದ್ದಿಗಳಿಗೆ ಸಮಾಜ ತೆರೆದುಕೊಂಡಿದೆ ತಲುಪಿಸುವವರು ನಾವಾಗಬಾರದೇಕೆ?
ನ್ಯೂಸ್ 13 ಸಮಾಜದ ಧನಾತ್ಮಕ ಸುದ್ದಿಗಳನ್ನು ಹಾಗೂ ರಾಷ್ಟ್ರೀಯ ವಿಚಾರಗಳನ್ನು ನಿಮಗೆ ತಲುಪಿಸುವ ಪ್ರಯತ್ನ ಮಾಡುತ್ತದೆ. ಈ ರೀತಿ ಇನ್ನಷ್ಟು ಉತ್ತಮ ಸುದ್ದಿಗಳನ್ನು ತಲುಪಿಸಲು ನಿಮ್ಮ ಸಹಕಾರವನ್ನು ಅಪೇಕ್ಷಿಸುತ್ತಿದ್ದೇವೆ. ಈ ಕಾರ್ಯದಲ್ಲಿ ನೀವೂ ನಮ್ಮೊಂದಿಗೆ ಜೊತೆಯಾಗಿ.
News13 strives to publish and promote positive news/happenings and nationalistic thoughts. Join hands with us in this constructive cause. We hope and expect your co-operation in this objective of broadcasting news that shall keep up with quality journalism.
