ದೇಶ ವಿದೇಶಗಳಲ್ಲಿ ಬೇಡಿಕೆ ಹೆಚ್ಚಿಸಿಕೊಳ್ಳುತ್ತಿದೆ ಕೋಲಾರದ ಟೊಮೆಟೊ

ಬೆಂಗಳೂರು: ಕೊರೋನಾ ಸಂಕಷ್ಟದ ಅವಧಿಯಲ್ಲಿಯೂ ಕೋಲಾರದ ಟೊಮೆಟೋ ಬೆಳೆಗಾರರಿಗೆ ಮಾತ್ರ ಭರ್ಜರಿ ಬೇಡಿಕೆ ಬಂದಿದೆ. ನೆರೆಯ ರಾಜ್ಯಗಳಲ್ಲಿ ಮಾತ್ರವಲ್ಲದೆ ನೆರೆಯ ಬಾಂಗ್ಲಾದೇಶ‌ದಿಂದಲೂ ಇಲ್ಲಿ ಬೆಳೆಯುವ ಟೊಮೆಟೊ‌ಗೆ ಹೆಚ್ಚಿನ ಮಾರುಕಟ್ಟೆ ದೊರೆತಿದ್ದು, ಇದರಿಂದಾಗಿ ಟೊಮೆಟೊ ಬೆಳೆಗಾರರ ಮುಖದಲ್ಲಿ ಸಂತಸ ಮನೆ ಮಾಡಿದೆ.

ಕೋಲಾರದ ಎಪಿಎಂಸಿ ಮಾರುಕಟ್ಟೆ‌ಯಲ್ಲಿ ಪ್ರತಿನಿತ್ಯ ಸುಮಾರು 6 ಸಾವಿರ ಕ್ವಿಂಟಾಲ್‌ಗಳಷ್ಟು ಟೊಮೆಟೊ ಮೂಟೆಗಳು ಸ್ಥಾನ ಗಳಿಸಿಕೊಂಡಿದೆ. ಕೊರೋನಾ ಆರಂಭಕ್ಕೆ ಮೊದಲು ವಾರ್ಷಿಕ 400 ಕೋಟಿ ರೂ. ಗಳಷ್ಟು ವ್ಯವಹಾರ ನಡೆಯುತ್ತಿತ್ತು ಎಂದು ಮೂಲಗಳು ಮಾಹಿತಿ ನೀಡಿವೆ. ಇದು ಏಷ್ಯಾದ ಅತೀ ದೊಡ್ಡ ಟೊಮೆಟೊ ಮಾರುಕಟ್ಟೆ‌ಗಳಲ್ಲಿ ಒಂದಾಗಿದೆ.

ಕೋಲಾರ ಜಿಲ್ಲೆಯ ಮುಳುಬಾಗಿಲು ಮತ್ತು ಶ್ರೀನಿವಾಸ‌ಪುಲ ತಾಲೂಕುಗಳು ಸೇರಿದಂತೆ ಜಿಲ್ಲೆಯ ಸುಮಾರು 10 ಸಾವಿರ ಎಕರೆಗಳಷ್ಟು ಪ್ರದೇಶದಲ್ಲಿ ಟೊಮೆಟೊ ಬೆಳೆಯಲಾಗುತ್ತಿದೆ. ಕೊರೋನಾದಿಂದಾಗಿ ಈ ಬಾರಿ ಕಡಿಮೆ ಪ್ರಮಾಣದಲ್ಲಿ ಬೆಳೆಗಾರರು ಟೊಮೆಟೊ ಬೆಳೆದಿದ್ದು, ಸದ್ಯ ಪ್ರತಿನಿತ್ಯ 4 ಸಾವಿರ ಕ್ವಿಂಟಾಲ್‌ಗಳಷ್ಟು ಟೊಮೆಟೊ ಮಾರುಕಟ್ಟೆ‌ಗೆ ಬರುತ್ತಿದೆ. ಲಾಕ್ಡೌನ್‌ಗೂ ಮೊದಲು ಇಲ್ಲಿಂದ ಬಾಂಗ್ಲಾ, ಅಫ್ಘನಿಸ್ಥಾನ, ಪಾಕಿಸ್ಥಾನ, ಚೀನಾ ಗಳಿಗೂ ಟೊಮೆಟೊ ರಫ್ತಾಗುತ್ತಿತ್ತು. ಸದ್ಯದ ಪರಿಸ್ಥಿತಿಯಲ್ಲಿ ನೆರೆಯ ರಾಜ್ಯಗಳ ಜೊತೆಗೆ ಬಾಂಗ್ಲಾದೇಶ‌ಕ್ಕೆ ಟೊಮೆಟೊ ರಫ್ತು ಆರಂಭ ಮಾಡಲಾಗಿದೆ. ಕಳೆದ ಕೆಲವು ವಾರಗಳಿಂದ ಪ್ರತಿನಿತ್ಯ 400 ಟನ್‌ಗಳಷ್ಟು ಟೊಮೆಟೊ ತುಂಬಿದ ದಾರಿಗಳು ಬಾಂಗ್ಲಾದೇಶ‌ದ ಗಡಿ ತಲುಪುತ್ತಿದೆ ಎಂದು ಎಪಿಎಂಸಿ ಮೂಲಗಳು ತಿಳಿಸಿವೆ.

ಈ ಬಾರಿ ಸಾಂಕ್ರಾಮಿಕ‌ ರೋಗದಿಂದಾಗಿ ಟೊಮೆಟೊ ಬೆಳೆ ಕಡಿಮೆ. ಆದರೂ ದಿನಕ್ಕೆ 20 ರಷ್ಟು ಲಾರಿಗಳು ಕೊಲಾರದಿಂದ ಬಾಂಗ್ಲಾ ಗಡಿಗೆ ಸೇವೆ ನೀಡುತ್ತಿವೆ. ಜಿಲ್ಲೆಯಿಂದ ಗಡಿ ತಲುಪಲು 4 ದಿನಗಳ ಕಾಲಾವಧಿ ಬೇಕಾಗಿದೆ ಎಂದು ಮೂಲಗಳು ಹೇಳಿವೆ. ವಿಮಾನಯಾನ ಆರಂಭವಾಗದ ಹಿನ್ನೆಲೆಯಲ್ಲಿ ಈ ಹಿಂದೆ ಟೊಮೆಟೊ ರಫ್ತಾಗುತ್ತಿದ್ದ ಉಳಿದ ಮೂರು ದೇಶಗಳಿಗೆ ಟೊಮೆಟೊ ರವಾನೆ ಆರಂಭವಾಗಿಲ್ಲ ಎಂದು ತಿಳಿದು ಬಂದಿದೆ.

ದೇಶದೊಳಗಿನ ಕೇರಳ, ನವದೆಹಲಿ, ಜಾರ್ಖಂಡ್, ತಮಿಳುನಾಡು, ಮಧ್ಯಪ್ರದೇಶ, ಗುಜರಾತ್ ಸೇರಿದಂತೆ ಇನ್ನೂ ಹಲವು ರಾಜ್ಯಗಳ ಮಾರುಕಟ್ಟೆ‌ಯಲ್ಲಿ‌ಯೂ ಕೋಲಾರ ಟೊಮೆಟೊ‌ಗೆ ಬೇಡಿಕೆ ಇದೆ ಎಂದು ಎಪಿಎಂಸಿ ಮೂಲಗಳು ಮಾಹಿತಿ ನೀಡಿವೆ.