ನದಿ ಸ್ವಚ್ಛತೆ ಮೂಲಕ ಮಾದರಿಯಾದ 7 ವರ್ಷದ ಕಾಶ್ಮೀರಿ ಬಾಲಕಿ

ಮನುಷ್ಯನ ಬದುಕಿಗೆ ಬೇಕಾಗಿರುವ ಅತೀ ಮುಖ್ಯ ಅಂಶಗಳಲ್ಲಿ ನೀರು ಸಹ ಒಂದು. ಸದ್ಯದ ಪರಿಸ್ಥಿತಿಯಲ್ಲಿ ದೇಶದ ಕೆಲವು ಭಾಗಗಳಲ್ಲಿ ಮಾನವನ ಬೇಜವಾಬ್ದಾರಿಯ ಕಾರಣದಿಂದಾಗಿ ಹನಿ ನೀರಿಗೂ ಆಹಾಕಾರ ಪಡಬೇಕಾದ ಪರಿಸ್ಥಿತಿ ಇದೆ. ಇಂತಹ ಸಂದರ್ಭದಲ್ಲಿ ಜಮ್ಮು ಮತ್ತು ಕಾಶ್ಮೀರದ ದಲ್ ನದಿಯನ್ನು ಶುಚಿಗೊಳಿಸುವ ಮೂಲಕ 7 ರ ಹರೆಯದ ಬಾಲಕಿಯೊಬ್ಬಳು ಹೈದರಾಬಾದ್ ನ ಪಠ್ಯಗಳಲ್ಲಿ ಸ್ಥಾನ ಪಡೆದಿದ್ದಾಳೆ. ತನ್ನ ಮಾದರಿ ಕಾರ್ಯದ ಮೂಲಕವೇ ಶಾಲಾ ಮಕ್ಕಳಿಗೆ ಸ್ಫೂರ್ತಿ ತುಂಬಿದ್ದಾಳೆ.

ಅಂದ ಹಾಗೆ ಈ ಬಾಲಕಿಯ ಹೆಸರು ಜನ್ನತ್. ಕಣಿವೆ ರಾಜ್ಯದ ಶ್ರೀನಗರದಲ್ಲಿ ಹರಿಯುತ್ತಿದ್ದ ದಾಲ್ ನದಿಯನ್ನು ತನ್ನ ತಂದೆ ತಾರಿಕ್ ಅಹ್ಮದ್ ಅವರೊಂದಿಗೆ ಸೇರಿ ಸ್ವಚ್ಛಗೊಳಿಸುವ ಕೆಲಸವನ್ನು ಕಳೆದ 2 ವರ್ಷಗಳಿಂದ ಮಾಡುತ್ತಿದ್ದಾಳೆ. ಜನರ ಬೇಜವಾಬ್ದಾರಿಯ ಕಾರಣಕ್ಕೆ ಮಲಿನಗೊಂಡಿದ್ದ ನದಿಯ ಕಸ ಕಡ್ಡಿ, ಕೊಳಕುಗಳನ್ನು ಸ್ವಚ್ಛಗೊಳಿಸುವ ಮೂಲಕವೇ ಮನಸ್ಸಿದ್ದರೆ ವಯಸ್ಸು ದೊಡ್ಡ ವಿಷಯವೇ ಅಲ್ಲ, ಸಾಧನೆಗೆ ವಯಸ್ಸು ಮುಖ್ಯವೂ ಅಲ್ಲ ಎಂಬುದನ್ನು ಸಾಧಿಸುವ ಮೂಲಕವೇ ಜನರಿಗೆ ನಾಗರಿಕತೆಯ ಪಾಠ ಕಲಿಸಿದ್ದಾಳೆ. ಆಕೆಯ ಈ ಮಹಾ ಕಾರ್ಯವನ್ನು ಗಮನಿಸಿ, ಹೈದರಾಬಾದಿನ ಶಾಲೆಗಳ ಪಠ್ಯದಲ್ಲಿಯೂ ಆಕೆಯ ಬಗ್ಗೆ ಮಕ್ಕಳಿಗೆ ಪಠ್ಯ ನೀಡಲಾಗಿದೆ. ಆ ಮೂಲಕ ಮಕ್ಕಳಿಗೆ ಜವಾಬ್ದಾರಿಯ ಅರಿವು, ಏನನ್ನಾದರೂ ಸಾಧಿಸಬೇಕು ಎನ್ನುವ ಮನಸ್ಥಿತಿಯನ್ನು ಹುಟ್ಟು ಹಾಕುವಲ್ಲಿ ಆಂಧ್ರ ಸರ್ಕಾರ ಕ್ರಮ ಕೈಗೊಂಡಿದೆ. ಆ ಮೂಲಕ ಅಲ್ಲಿನ ಮಕ್ಕಳಿಗೂ ಸ್ಫೂರ್ತಿ ತುಂಬುವ ಕೆಲಸ ಮಾಡಿದೆ ಎನ್ನಬಹುದು.

ಇನ್ನು ಜನ್ನತ್‌ನ ಈ ಕೆಲಸದ ಬಗ್ಗೆ ಹೇಳುವುದಾದರೆ, 2018 ರಿಂದ ತೊಡಗಿದಂತೆ ದಾಲ್ ನದಿಯ ಸ್ವಚ್ಛತೆಯನ್ನು ಅಪ್ಪ ಮಗಳು ಮಾಡುತ್ತಿದ್ದಾರೆ. ಪ್ರಧಾನಿ ಅವರ ಸ್ವಚ್ಛತೆಯ ಆಶಯವನ್ನು ಮನಸ್ಸಿಗೆ ಆಳವಾಗಿ ತೆಗೆದುಕೊಂಡಿರುವ ಜನ್ನತ್ ದಾಲ್ ನದಿಯನ್ನು ದೋಣಿ ಸಹಾಯದಿಂದ ಸ್ವಚ್ಛ ಮಾಡಿದ್ದಾಳೆ. ಆ ಪುಟ್ಟ ಮನಸ್ಸಿನ 2 ವರ್ಷಗಳ ನಿರಂತರ ಶ್ರಮದ ಪ್ರತೀಕವಾಗಿ ಇಂದು ದಾಲ್ ಶ್ರೀನಗರದಲ್ಲಿ ಸ್ವಚ್ಛ, ಶುದ್ಧ ,ಕಲ್ಮಶ ರಹಿತವಾಗಿ ಹರಿಯುವಂತಾಗಿದೆ. ಇವಳ ಈ ಕಾರ್ಯಕ್ಕೆ ಇಡೀ ಶ್ರೀನಗರವೇ ಶಹಬ್ಬಾಸ್ ಎಂದಿದೆ.

ಈ ಬಗ್ಗೆ ಮಾತನಾಡಿರುವ ಜನ್ನತ್, ತನ್ನ ತಂದೆಯಿಂದಲೇ ಪ್ರೇರಣೆ ಪಡೆದು ತಾನು ನದಿಯನ್ನು ಸ್ವಚ್ಛ ಗೊಳಿಸುವ ಪ್ರಕ್ರಿಯೆಗೆ ತೊಡಗಿದ್ದಾಗಿ ತಿಳಿಸಿದ್ದಾಳೆ. ನದಿಯಲ್ಲಿ ತುಂಬಿ ಹೋಗಿದ್ದ ಕೊಳಚೆ ವಸ್ತುಗಳನ್ನು ತೆಗೆಯಲು ಕಳೆದ 2 ವರ್ಷಗಳ ನಿರಂತರ ಪ್ರಯತ್ನ ನಡೆಸುತ್ತಿರುವುದಾಗಿಯೂ ತಿಳಿಸಿದ್ದು, ಈಗ ತನಗೆ ಖುಷಿ ಸಿಕ್ಕಿರುವುದಾಗಿ ತಿಳಿಸಿದ್ದಾಳೆ. ಇನ್ನು ತನ್ನ ಮಗಳ ಸಮಾಜಮುಖಿ ಕಾರ್ಯವನ್ನು ಹೈದರಾಬಾದ್ ನ ಶಾಲಾ ಪಠ್ಯದಲ್ಲಿ ಅಳವಡಿಸಿರುವ ಬಗ್ಗೆ ತಿಳಿದ ಜನ್ನತ್ ತಂದೆಯೂ ಸಂತೋಷ ವ್ಯಕ್ತಪಡಿಸಿದ್ದಾರೆ.