ಜ್ಯೋತಿ ಕುಮಾರಿಯನ್ನು ಶಾಲೆಗೆ ಸೇರಿಸಿ, ಸೈಕಲ್ ಗಿಫ್ಟ್ ನೀಡಿದ ಬಿಹಾರ ಸರ್ಕಾರ

ಪಾಟ್ನಾ: ತನ್ನ ಅನಾರೋಗ್ಯ ಪೀಡಿತ ತಂದೆಯನ್ನು ಹೊತ್ತುಕೊಂಡು 1200 ಕಿಲೋಮೀಟರ್ ಸೈಕಲ್ ಸವಾರಿಯನ್ನು ನಡೆಸಿ ಭಾರೀ ಸುದ್ದಿಯಾಗಿದ್ದ 15 ವರ್ಷದ ಜ್ಯೋತಿ ಕುಮಾರಿಗೆ ಇದೀಗ ಪ್ರಶಸ್ತಿಗಳು ಮತ್ತು ಹಣಕಾಸು ನೆರವುಗಳು ಹರಿದುಬರುತ್ತಿದೆ.

ಆಕೆಯ ಸಾಮರ್ಥ್ಯವನ್ನು ಪರಿಗಣಿಸಿರುವ ಮತ್ತು ಪ್ರಶಂಸಿಸಿರುವ ಬಿಹಾರ ಸರಕಾರವು 9ನೇ ತರಗತಿಗೆ ದರ್ಬಾಂಗ್ ಪಂಡರುಚ್‌ನ ಸರ್ಕಾರಿ ಶಾಲೆಗೆ ಸೇರಿಸಿದೆ. ಮಾತ್ರವಲ್ಲದೆ ಆಕೆಗೆ ಹೊಸ ಸೈಕಲ್‌ ಅನ್ನು ಉಡುಗೊರೆಯಾಗಿ ನೀಡಿದೆ ಮತ್ತು ಎರಡು ಜೊತೆ ಸಮವಸ್ತ್ರಗಳನ್ನು ಮತ್ತು ಪುಸ್ತಕಗಳನ್ನು ನೀಡಿದೆ.

“2017ರಲ್ಲಿ ಜ್ಯೋತಿ ಕುಮಾರಿ ಗ್ರಾಮದಲ್ಲಿ 8ನೇ ತರಗತಿಯನ್ನು ತೇರ್ಗಡೆಯಾಗಿದ್ದರು. ಬಳಿಕ ಆಕೆ ತನ್ನ ತಂದೆಯೊಂದಿಗೆ ದೆಹಲಿಗೆ ಸ್ಥಳಾಂತರಗೊಂಡಿದ್ದಳು. ಹೀಗಾಗಿ ಆಕೆಯ ಶಾಲೆ ಸ್ಥಗಿತಗೊಂಡಿತ್ತು. ತನ್ನ ತಂದೆಯನ್ನು 1200 ಕಿಲೋಮೀಟರ್ ಸೈಕಲ್ ಸವಾರಿ ಮಾಡಿದ ಬಳಿಕ ಆಕೆ ದೇಶದ ಮನೆ ಮಾತಾದಳು. ಅಸಾಧಾರಣ ಸಾಮರ್ಥ್ಯವನ್ನು ಹೊಂದಿರುವ ಹೆಣ್ಣು ಮಗಳು ಸಂಕಷ್ಟದ ಪರಿಸ್ಥಿತಿಯಲ್ಲಿ ಬದುಕುತ್ತಿದ್ದಾಳೆ. ಆಕೆ ಗೌರವಿಸಲ್ಪಡಬೇಕು, ಸ್ವೀಕರಿಸಲ್ಪಡಬೇಕು. ನಮ್ಮ ಸಣ್ಣ ಪ್ರಶಂಸೆಯ ಸಂಕೇತವಾಗಿ ಆಕೆಯನ್ನು ಶಾಲೆಗೆ ಸೇರಿಸಿದ್ದೇವೆ” ಎಂದು ಬಿಹಾರ ಎಜುಕೇಶನ್ ಪ್ರಾಜೆಕ್ಟ್ ಕೌನ್ಸಿಲ್ ನಿರ್ದೇಶಕ ಸಂಜಯ್ ಸಿಂಗ್ ಹೇಳಿದ್ದಾರೆ.

ಶಾಲೆಗೆ ದಾಖಲಾದ ಬಳಿಕ ಮಾತನಾಡಿದ ಜ್ಯೋತಿ, “ನಾನು ಶಿಕ್ಷಣವನ್ನು ಪಡೆಯಲು ಬಯಸುತ್ತೇನೆ ಮತ್ತು ಮೆಟ್ರಿಕ್ ಪರೀಕ್ಷೆಗೆ ಹಾಜರಾಗಲು ಬಯಸುತ್ತೇನೆ. ಗುರು ಗ್ರಾಮದಲ್ಲಿ ತಂದೆಗೆ ಸಹಾಯ ಮಾಡಬೇಕಾಗಿ ಬಂದ ಕಾರಣ ಶಿಕ್ಷಣವನ್ನು ಮೊಟಕುಗೊಳಿಸ ಬೇಕಾಯಿತು. ಸೈಕಲ್ ಫೆಡರೇಶನ್ ಆಮಂತ್ರಿಸಿದ ಟ್ರಯಲ್‌ನಲ್ಲೂ ನಾನು ಭಾಗಿಯಾಗುತ್ತೇನೆ” ಎಂದು ಜ್ಯೋತಿ ಹೇಳಿದ್ದಾಳೆ.

ಜ್ಯೋತಿ ಕಾರ್ಯವನ್ನು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಪುತ್ರಿ ಇವಾಂಕ ಟ್ರಂಪ್ ಟ್ವಿಟರ್ ಮೂಲಕ ಶ್ಲಾಘಿಸಿದ್ದರು.

ಜ್ಯೋತಿ ಮತ್ತು ಆಕೆಯ ತಂದೆ ಮೋಹನ್ ಪಾಸ್ವಾನ್ ಅವರು ಗುರು ಗ್ರಾಮದಲ್ಲಿ ಎರಡು ತಿಂಗಳ ಕಾಲ ಲಾಕ್ ಡೌನ್ ಕಾರಣದಿಂದ ಸಿಲುಕಿ ಹಾಕಿಕೊಂಡಿದ್ದರು. ಜ್ಯೋತಿ ತಂದೆ ಆಟೋ ರಿಕ್ಷಾ ಡ್ರೈವರ್ ಆಗಿದ್ದು, ಗಾಯಗೊಂಡಿದ್ದರು. ಜೀವನೋಪಾಯಕ್ಕೆ ಯಾವುದೇ ಮಾರ್ಗ ಅವರ ಬಳಿ ಇರಲಿಲ್ಲ, ಹೀಗಾಗಿ ಅನಿವಾರ್ಯವಾಗಿ ಬಿಹಾರದ ತಮ್ಮ ಊರಿಗೆ ಬರಬೇಕಾಯಿತು. ತಂದೆ ಬೇಡವೆಂದರೂ ಬಲವಂತ ಮಾಡಿ ಆಕೆ ಸೈಕಲ್ ಮೂಲಕ ಅವರನ್ನು ಹೊತ್ತುಕೊಂಡು ಏಳು ದಿನಗಳ ಕಾಲ ಸೈಕಲ್ ತುಳಿದು ಸಾವಿರದ ಇನ್ನೂರು ಕಿಲೋಮೀಟರ್ ಕ್ರಮಿಸಿ ತನ್ನ ಊರನ್ನು ಸೇರಿದ್ದಾಳೆ.