ಆಲ್ಜೈಮರ್ ತಡೆಗೆ ಪೂರಕ ವಿಧಾನಗಳನ್ನು ಕಂಡುಹಿಡಿದ ಗುವಾಹಟಿಯ ಐಐಟಿ ಸಂಶೋಧಕರು

ಗುವಾಹಟಿ: ಅಲ್ಜೈಮರ್ ಅಧವಾ ಮರೆಗುಳಿತನಕ್ಕೆ ಸಂಬಂಧಿಸಿದಂತೆ ಮೆದುಳಿನಲ್ಲಿ ನ್ಯೂರೋಟಾಕ್ಸಿಕ್ ಕಣಗಳ ಅಭಿವೃದ್ಧಿಯನ್ನು ತಡೆಯಲು ಗುವಾಹಟಿಯ ಇಂಡಿಯನ್ ಇನ್ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ(ಐಐಟಿ) ಯ ಸಂಶೋಧಕರ ತಂಡ ಹೊಸ ಮಾರ್ಗಗಳನ್ನು ಕಂಡುಹಿಡಿಯುವಲ್ಲಿ ಯಶಸ್ವಿಯಾಗಿದ್ದಾರೆ. ಆ ಮೂಲಕ ಆಲ್ಜೈಮರ್ ಬಾಧಿಸುವುದನ್ನು 10 ವರ್ಷಗಳ ಕಾಲ ಮುಂದೂಡುವಂತೆ ಮಾಡಲು ಈ ಸಂಶೋಧನೆ ಸಹಾಯಕಾರಿಯಾಗಿದೆ ಎಂದು ಐಐಟಿ ಅಭಿಪ್ರಾಯ ಪಟ್ಟಿದೆ.

ನ್ಯೂರೋಟಾಕ್ಸಿಕ್ ಅಣುಗಳು ಮೆದುಳಿನ ಭಾಗದಲ್ಲಿ ಒಗ್ಗೂಡುವುದರಿಂದ ಬರುವ ಈ ಕಾಯಿಲೆಗೆ ಲೋ ಓಲ್ಟೇಜ್ ಎಲೆಕ್ಟ್ರಿಕ್ ಮತ್ತು ಟ್ರೋಜನ್ ಪೆಪ್ಟೈಡ್ಸ್ ಅನ್ನು ಬಳಕೆ ಮಾಡುವ ಮೂಲಕ ನಿಯಂತ್ರಣ ಕಂಡುಕೊಳ್ಳುವುದು ಸಾಧ್ಯ ಎಂದು ಐಐಟಿ ಹೇಳಿದೆ. ಹಿಂದೆ ಟ್ರಾಯ್ ಯುದ್ಧದ ಸಂದರ್ಭದಲ್ಲಿ ಗ್ರೀಕರು ಟ್ರೋಜನ್ ಹಾರ್ಸ್ ಬಳಕೆ ಮಾಡುತ್ತಿದ್ದು, ಈ ಕಲ್ಪನೆಯಲ್ಲಿಯೇ ಟ್ರೋಜನ್ ಪೆಪ್ಟೈಡ್ ಬಳಕೆಯನ್ನು ಮಾಡುವ ಸಂಶೋಧನೆ ನಡೆಸಲಾಗಿದೆ ಎಂದೂ ಸಂಶೋಧಕರು ಮಾಹಿತಿ ನೀಡಿದ್ದಾರೆ.

1998 ರಿಂದ ತೊಡಗಿದಂತೆ 2011 ರ ವರೆಗೂ ಆಲ್ಜೈಮರ್ ಕಾಯಿಲೆಗೆ ಹಲವಾರು ಸಂಶೋಧಕರು ಔಷಧಗಳನ್ನು ಕಂಡುಹುಡುಕಲು ಪ್ರಯತ್ನಗಳನ್ನು ನಡೆಸಿದ್ದು, ಅವೆಲ್ಲವೂ ವಿಫಲವಾಗಿದೆ ಎಂದು ಐಐಟಿ ಸಂಶೋಧಕ ವಿಬಿನ್ ರಾಮಕೃಷ್ಣನ್ ಅವರು ತಿಳಿಸಿದ್ದಾರೆ. ಈ ಕಾಯಿಲೆಯ ಮುಖ್ಯ ಗುಣಲಕ್ಷಣವೇ ಮೆದುಳಿನಲ್ಲಿ ಅಮೆಲಾಯ್ಡ್ ಬೀಟಾ ಪೆಪ್ಟೈಡ್ಸ್­ಗಳನ್ನು ಸಂಗ್ರಹಿಸುವುದಾಗಿದ್ದು, ಈ ಸಂಗ್ರಹಣಾ ಶಕ್ತಿಯನ್ನು ಕಡಿಮೆಗೊಳಿಸಿದಲ್ಲಿ ಈ ಕಾಯಿಲೆಯನ್ನು ಮುಂದೂಡುವುದು ಸಾಧ್ಯ ಎಂಬುದು ತಜ್ಞರ ಅಭಿಪ್ರಾಯ. ಅದಕ್ಕನುಗುಣವಾಗಿ ಕಳೆದ ಬಾರಿ ಐಐಟಿ ಸಂಶೋಧಕರು ಮೆದುಳಿನಲ್ಲಿ ಸಂಗ್ರಹವಾಗುವ ವಿಷಯುಕ್ತ ನ್ಯೂರೋ ಡಿಜನರೇಟಿವ್ ಅಂಶಗಳನ್ನು ಕಡಿಮೆ ಮಾಡಲು ಲೋ ಓಲ್ಟೇಜ್ ಎಲೆಕ್ಟ್ರಿಕ್ ಪವರ್ ಬಳಸಿತು. ಇದರ ಮೂಲಕ ಕಾಯಿಲೆಯನ್ನು 17-35 ಮಟ್ಟಿಗೆ ಮುಂದೂಡುವಂತೆ ಮಾಡಬಹುದು ಎಂಬುದನ್ನು ಕಂಡುಕೊಂಡಿರುವುದಾಗಿಯೂ ಡಾ. ರಾಮಕೃಷ್ಣನ್ ಅವರು ಮಾಹಿತಿ ನೀಡಿದ್ದಾರೆ.

ಇನ್ನು ಈ ಎಲ್ಲಾ ಸಾಧ್ಯತೆಗಳನ್ನು ಪರೀಕ್ಷಿಸಿ ಉತ್ತರ ಕಂಡುಕೊಂಡ ಬಳಿಕವೇ ಆಲ್ಜೈಮರ್ ತಡೆಗೆ ಪೂರಕ ವಿಧಾನ ಕಂಡುಹಿಡಿಯಲಾಗಿದ್ದು, ಇದನ್ನು ಮಾನವರ ಮೇಲಿನ ಪ್ರಯೋಗಕ್ಕೂ ಮೊದಲು ಪ್ರಾಣಿಗಳ ಮೇಲೆ ಕ್ಲಿನಿಕಲ್ ಪ್ರಯೋಗಗಳನ್ನು ತೆಗೆದುಕೊಳ್ಳಲಾಗುವುದಾಗಿಯೂ ಅವರು ಮಾಹಿತಿ ನೀಡಿದ್ದಾರೆ.