ತಲೂಕಿನಾದ್ಯಂತ ಭಾರೀ ಮಳೆ: ಜನರ ಆತಂಕ

ಬೆಳ್ತಂಗಡಿ: ಕಳೆದ ಮೂರು, ನಾಲ್ಕು ದಿನಗಳಿಂದ ಎಡೆಬಿಡದೆ ಧಾರಾಕಾರವಾಗಿ ಸುರಿಯುತ್ತಿರುವ ಮಳೆಯಿಂದ ನದಿ, ಹಳ್ಳಗಳು ತುಂಬಿ ತುಳುಕುತ್ತಿದ್ದು, ನದಿಯಂಚಿನ ಮನೆಗಳು, ಗದ್ದೆ, ತೋಟಗಳು ಜಲಾವೃತಗೊಂಡು ಅಪಾಯ ಎದುರಿಸುತ್ತಿದೆ. ತಾಲೂಕಿನ ನೇತ್ರಾವತಿ, ಕಪಿಲ, ಫಲ್ಗುಣಿ, ಸೋಮವತಿ, ಅಣಿಯೂರು ಹಳ್ಳ ಮೊದಲಾದ ನದಿಗಳು ಹಾಗೂ ತೊರೆ-ಹಳ್ಳಗಳು ಮಳೆ ನೀರಿನಿಂದ ಅಪಾಯದ ಮಟ್ಟ ಮೀರಿ ಹರಿಯುತ್ತಿದೆ. ನೀರಿನ ಮಟ್ಟ ಏರಿಕೆಯಾಗುತ್ತಿದ್ದು ನೆರೆಯ ಭೀತಿಯನ್ನು ಎದುರಿಸುವಂತಾಗಿದೆ.

ಲಾಲ ಗ್ರಾಮ ಪಂಚಾಯತ್ ವ್ಯಾಪ್ತಿಯ ಗಾಂಧಿನಗರ ೨ನೇ ಬ್ಲಾಕ್‌ನ ನದಿ ಬದಿಯಲ್ಲಿರುವ ಪರಿಶಿಷ್ಟ ಜಾತಿ ಕಾಲೋನಿಯ ಸುಮಾರು ಆರೇಳು ಮನೆಗಳು ನೆರೆಯ ಭೀತಿಯಲ್ಲಿದೆ. ಕಳೆದ ಮೂರ್‍ನಾಲ್ಕು ದಿನಗಳಿಂದ ಸುರಿಯುತ್ತಿದ್ದ ಮಳೆಯಿಂದಾಗಿ ಮನೆಯ ಅಂಗಳದ ವರೆಗೆ ನೀರು ನುಗ್ಗಿದೆ. ಇನ್ನೂ ಸತತವಾಗಿ ಸುರಿದರೆ ಮನೆಯೊಳಗೆ ನುಗ್ಗುವ ಸಂಭವವಿದೆ. ದಿಡುಪೆ, ಕೊಲ್ಲಿ, ಬಂಗಾಡಿ, ನಾವೂರು ಕಡೆಗಳಿಂದ ಬರುವ ನದಿ ನೀರುಗಳಿಂದ ನದಿ ಕಿನಾರೆಯಲ್ಲಿರುವ ಮನೆಗಳು ಅಪಾಯವನ್ನು ಎದುರಿಸುತ್ತಿದೆ. ಇಲ್ಲಿನ ನಿವಾಸಿಗಳು ಪ್ರತಿ ವರ್ಷವು ನೆರೆ ಭೀತಿಯನ್ನು ಎದುರಿಸುತ್ತಿದ್ದು, ಶಾಶ್ವತ ಪರಿಹಾರಕ್ಕಾಗಿ ಜಿಲ್ಲಾಧಿಕಾರಿಯವರಿಗೆ, ತಹಶೀಲ್ದಾರಿಗೆ ಮನವಿ ನೀಡಿದ್ದಾರೆ. ಆದರೆ ಏನೂ ಪ್ರಯೋಜನವಾಗಿಲ್ಲ.

ಗಾಂಧಿನಗರದ ಪರಿಸರದಲ್ಲಿ ನೆರೆ ಭೀತಿ ಇದೆ. ಬೆಳ್ತಂಗಡಿ ಎಸ್‌ಐ ಮಾಧವ ಕೂಡ್ಲು ನೇತೃತ್ವದ ಪೊಲಿಸ್ ತಂಡ ಮುಂಜಾಗ್ರತಾ ಕ್ರಮವನ್ನು ಕೈಗೊಂಡಿದ್ದು, ನೆರೆ ಭೀತಿಯನ್ನು ಎದುರಿಸುತ್ತಿರುವ ಸ್ಥಳಗಳಿಗೆ ಭೇಟಿ ನೀಡಿ ಪರಿಶೀಲನೆ ನಡೆಸಿದರು. ಸ್ಥಳೀಯ ಗ್ರಾ.ಪಂ ಸದಸ್ಯ ಮೋಹನ್‌ದಾಸ್ ಭೇಟಿ ನೀಡಿದರು.

ಗುರುವಾಯನಕೆರೆ ಬಂಟರಭವನದ ಎದುರಿನ ಹಳ್ಳ ತುಂಬಿದ್ದು ಅದರ ಪಕ್ಕದಲ್ಲಿರು ತೋಟ ಜಲಾವೃತಗೊಂಡಿದೆ. ರಾಷ್ಟ್ರೀಯ ಹೆದ್ದಾರಿಯ ಪಕ್ಕದಲ್ಲೇ ಇರುವ ಈ ಹಳ್ಳದ ನೀರು ರಸ್ತೆಯನ್ನು ಆವರಿಸಿಕೊಂಡಿದೆ. ಲಾಲ ಪುತ್ರಬೈಲು ಎಂಬಲ್ಲಿ ರಸ್ತೆಯ ಬದಿಯವರೆಗೆ ಬಂದಿದೆ. ಕಲ್ಮಂಜ ಮೃತ್ಯುಂಜಯ ನದಿಯ ನೀರಿನ ಮಟ್ಟ ಅಕ್ಕಪಕ್ಕದಲ್ಲಿರುವ ಗದ್ದೆ-ತೋಟಗಳಿಗೆ ನೀರು ನುಗ್ಗಿದೆ. ಧರ್ಮಸ್ಥಳ ನೇತ್ರಾವತಿಯಲ್ಲೂ ನೀರಿನ ಮಟ್ಟ ಏರಿಕೆಯಾಗಿದ್ದು ತುಂಬಿ ಹರಿಯುತ್ತಿದೆ. ತಾಲೂಕು ಕಚೇರಿಯಲ್ಲಿ ಸಹಾಯವಾಣಿ ತೆರೆಯಲಾಗಿದ್ದು ತಾಲೂಕು ಆಡಳಿತ ಮುಂಜಾಗ್ರತಾ ಕ್ರಮವನ್ನು ಕೈಗೊಂಡಿದೆ.

ವೇಣೂರಿನ ಫಲ್ಗುಣಿ ನದಿ ಉಕ್ಕಿ ಹರಿಯುತ್ತಿದೆ. ಇಲ್ಲಿನ ಕೆಳಗಿನ ಪೇಟೆ(ಸಂತೆ ಮಾರ್ಕೇಟ್) ಜಲಾವೃತಗೊಂಡಿದೆ. ಇಲ್ಲಿರುವ ಅಂಗಡಿಗಳಿಗೆ ನೀರು ನುಗ್ಗಿದೆ. ವೇಣೂರು ಗ್ರಾಪಂನ ಮೂಡುಕೋಡಿ ಗ್ರಾಮದ ಸೇತುವೆ ಭಾಗಶಃ ಮುಳುಗಡೆಯಾಗಿದೆ.