ಉಜಿರೆ ಎಸ್.ಡಿ.ಎಂ.ಮಹಿಳಾ ಐ.ಟಿಐ.ಗೆ ಕ್ಯೂ.ಸಿ.ಐ. ಮಾನ್ಯತೆ

ಬೆಳ್ತಂಗಡಿ: ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಎಜ್ಯುಕೇಷನಲ್ ಸೊಸೈಟಿ, ಉಜಿರೆ ಇದರ ವತಿಯಿಂದ ಮಹಿಳೆಯರ ಸ್ವಾವಲಂಬನೆಗೆ ಪ್ರೋತ್ಸಾಹ ನೀಡುವ ನಿಟ್ಟಿನಲ್ಲಿ ಆರಂಭಿಸಲಾದ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಮಹಿಳಾ ಕೈಗಾರಿಕಾ ತರಬೇತಿ ಸಂಸ್ಥೆ (SDM WOMEN ITI)ಯು ಬೆಳಾಲು ರಸ್ತೆಯಲ್ಲಿರುವ ನೂತನವಾಗಿ ನಿರ್ಮಿಸಲಾದ ಮಂಜುಶ್ರೀ ಕಟ್ಟಡಕ್ಕೆ ಸ್ಥಳಾಂತರಗೊಂಡು ಬಳಿಕ ಕಂಪ್ಯೂಟರ್ ಆಪರೇಟರ್ ಮತ್ತು ಪ್ರೋಗ್ರಾಮಿಂಗ್ ಅಸಿಸ್ಟಂಟ್ ಹಾಗೂ ಕಟ್ಟಿಂಗ್ ಮತ್ತು ಸೀವಿಂಗ್ ಎಂಬ ಒಂದು ವರ್ಷದ ಎರಡು ವೃತ್ತಿ ವಿಭಾಗಗಳಲ್ಲಿ ಗ್ರಾಮೀಣ ಪ್ರದೇಶದ ಮಹಿಳೆಯರಿಗೆ ವಿಶೇಷ ತಾಂತ್ರಿಕ ತರಬೇತಿಯನ್ನು ನೀಡುತ್ತಿದ್ದು, ಅತ್ಯಾಧುನಿಕ ಯಂತ್ರೋಪಕರಣಗಳ ಸೌಲಭ್ಯದೊಂದಿಗೆ ಕಾರ್ಯಾಚರಿಸುತ್ತಿದೆ.

ಇಲಾಖೆ ನಿಯಮದಂತೆ ರಾಷ್ಟ್ರೀಯ ವೃತ್ತಿ ಶಿಕ್ಷಣ ಪರಿಷತ್ತಿನ (NCVT) ಸಂಯೋಜನೆಯ ಅಂಗವಾಗಿ ‘ಭಾರತೀಯ ಗುಣಮಟ್ಟ ನಿಯಂತ್ರಣ ಆಯೋಗ’ (QCI)ದಿಂದ ಪರಿವೀಕ್ಷಣೆಗೊಳಪಟ್ಟು NCVT ಸಂಯೋಜನೆಯನ್ನು ಪಡೆದಿದೆ.
ಸಂಸ್ಥೆಯ ಅಧ್ಯಕ್ಷ ಡಾ| ಡಿ. ವೀರೇಂದ್ರ ಹೆಗ್ಗಡೆಯವರ ಆಡಳಿತ ಮಂಡಳಿಯ ಎಲ್ಲ ಅಧಿಕಾರಿಗಳ ಮಾರ್ಗದರ್ಶನದಿಂದ ಸಂಸ್ಥೆಯು ಈ ಮಾನ್ಯತೆ ಪಡೆದಿದೆ. ದ.ಕ. ಜಿಲ್ಲೆಯಲ್ಲಿ 4ನೇ ಐಟಿಐ ಹಾಗೂ ಬೆಳ್ತಂಗಡಿ ತಾಲೂಕಿನಲ್ಲಿ ಮೊದಲನೆಯ ಮಹಿಳಾ ಕೈಗಾರಿಕಾ ತರಬೇತಿ ಸಂಸ್ಥೆ ಆಗಿರುತ್ತದೆ.

 ದಶಮಾನೋತ್ಸವಕ್ಕೆ ಸಜ್ಜಾಗಿ ನಿಂತಿರುವ ಈ ಸುಸಂದರ್ಭದಲ್ಲಿ ಈ ಮಾನ್ಯತೆ ಸಿಕ್ಕಿರುವುದು ಸಂಸ್ಥೆಯ ಹಿರಿಮೆಗೆ ಒಂದು ಗರಿ ಬಂದಂತಾಗಿದೆ ಮತ್ತು ಈ ವರ್ಷದ ತರಬೇತಿಗಾಗಿ ಈಗಾಗಲೇ ದಾಖಲಾತಿಯನ್ನು ಪ್ರಾರಂಭಿಸಲಾಗಿದ್ದು ಆಸಕ್ತ ವಿದ್ಯಾರ್ಥಿನಿಯರು ಕೂಡಲೇ ಈ ಸಂಸ್ಥೆಯಲ್ಲಿ ದಾಖಲಾತಿ ಹೊಂದುವಂತೆ ಪ್ರಕಟಣೆಯಲ್ಲಿ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಎಜ್ಯುಕೇಷನಲ್ ಸೊಸೈಟಿ, ಉಜಿರೆ ಇದರ ಕಾರ್ಯದರ್ಶಿಗಳವರಾದ ಡಾ.ಬಿ.ಯಶೋವರ್ಮ ಅವರು ತಿಳಿಸಿದ್ದಾರೆ. ಹೆಚ್ಚಿನ ಮಾಹಿತಿಗಾಗಿ 08256 – 236800 ಸಂಪರ್ಕಿಸಬಹುದಾಗಿದೆ.