ರೂ. 1 ಲಕ್ಷ ಕೋಟಿ ಮೌಲ್ಯದ ‘ಆರ್ಥಿಕ ಪರಿಸರ ವ್ಯವಸ್ಥೆ’ಯನ್ನು ರಚಿಸಲಿದೆ ‘ಏಕತಾ ಪ್ರತಿಮೆ’

ಅಹ್ಮದಾಬಾದ್ : ಗುಜರಾತ್‌ನ ಕೆವಾಡಿಯಾದಲ್ಲಿ ನಿರ್ಮಾಣವಾಗಿರುವ ವಿಶ್ವದ ಅತಿ ಎತ್ತರದ ಪ್ರತಿಮೆ ‘ಏಕತಾ ಪ್ರತಿಮೆ’ ಮುಂಬರುವ ವರ್ಷಗಳಲ್ಲಿ ಒಂದು ಲಕ್ಷ ಕೋಟಿ ರೂಪಾಯಿಗಳ ಮೌಲ್ಯದ “ಆರ್ಥಿಕ ಪರಿಸರ ವ್ಯವಸ್ಥೆಯನ್ನು” ರಚಿಸಲಿದೆ ಎಂದು ರೈಲ್ವೆ ಸಚಿವ ಪಿಯೂಷ್ ಗೋಯಲ್ ಶುಕ್ರವಾರ ಹೇಳಿದ್ದಾರೆ. ದೇಶದ ಮೊದಲ ಗೃಹ ಮಂತ್ರಿ ಸರ್ದಾರ್ ವಲ್ಲಭಭಾಯಿ ಪಟೇಲ್ ಅವರ ಸ್ಮರಣಾರ್ಥ ಈ ಬೃಹತ್ ಪ್ರತಿಮೆಯನ್ನು ಪ್ರಧಾನಿ ನರೇಂದ್ರ ಮೋದಿ ಅವರು ಅಕ್ಟೋಬರ್ 31, 2018 ರಂದು ಉದ್ಘಾಟಿಸಿದ್ದರು.

“ಏಕತಾ ಪ್ರತಿಮೆಯು ಮುಂದಿನ ವರ್ಷಗಳಲ್ಲಿ ಕನಿಷ್ಠ ಒಂದು ಲಕ್ಷ ಕೋಟಿ ಮೌಲ್ಯದ ಆರ್ಥಿಕ ಪರಿಸರ ವ್ಯವಸ್ಥೆಯನ್ನು ರಚಿಸುತ್ತದೆ” ಎಂದು ಗೋಯಲ್ ಹೇಳಿದ್ದಾರೆ.

ಕೆವಾಡಿಯಾದಲ್ಲಿ ಹೊಸ ರೈಲ್ವೆ ನಿಲ್ದಾಣದ ನಿರ್ಮಾಣ ಮತ್ತು ಈ ನಗರವನ್ನು ವಡೋದರಾದೊಂದಿಗೆ ಸಂಪರ್ಕಿಸುವ ಹೊಸ ಮಾರ್ಗಕ್ಕೆ ಅಡಿಗಲ್ಲು ಹಾಕಿದ ಗೋಯಲ್, ಎರಡು ನಿಲ್ದಾಣಗಳ ನಡುವೆ ಹೆಚ್ಚಿನ ವೇಗದ  ರೈಲುಗಳು ಕಾರ್ಯನಿರ್ವಹಿಸಲಿವೆ ಎಂದು ಘೋಷಿಸಿದರು.

“ಕೆಲವು ಸ್ಥಳಗಳಲ್ಲಿ ಹಳಿಗಳನ್ನು ಹಾಕುವ ಪ್ರಕ್ರಿಯೆ ಈಗಾಗಲೇ ಪ್ರಾರಂಭವಾಗಿದೆ. ಮಾರ್ಚ್ ವೇಳೆಗೆ ಇತರ ವಿಸ್ತಾರಗಳಲ್ಲಿ ಕೆಲಸ ಪ್ರಾರಂಭವಾಗಲಿದೆ. ಇದನ್ನು ವಡೋದರಾದಲ್ಲಿನ ಮುಖ್ಯ ಮಾರ್ಗದೊಂದಿಗೆ ಸಂಪರ್ಕಿಸಿದ ನಂತರ ದೇಶಾದ್ಯಂತದ ಪ್ರವಾಸಿಗರು ಕೆವಾಡಿಯಾಕ್ಕೆ ಸುಲಭವಾಗಿ ಬರಲು ಸಾಧ್ಯವಾಗಲಿದೆ” ಎಂದು ಅವರು ಹೇಳಿದ್ದಾರೆ.

“ನಾವು ‘ಹಬ್ ಆ್ಯಂಡ್ ಸ್ಪೋಕ್ಸ್’ ಮಾದರಿಯನ್ನು ಕಾರ್ಯಗತಗೊಳಿಸಲು ಯೋಜಿಸುತ್ತಿದ್ದೇವೆ. ವಡೋದರದ ಮುಖ್ಯ ಮಾರ್ಗಕ್ಕೆ ಆಗಮಿಸುವ ಜನರನ್ನು ಉಪ-ಮಾರ್ಗದಲ್ಲಿ ವೇಗದ ರೈಲುಗಳನ್ನು ಬಳಸಿ ಕೆವಾಡಿಯಾಕ್ಕೆ ಕರೆದೊಯ್ಯಲಾಗುತ್ತದೆ, ಇದರಿಂದ ಜನರು ಬಹಳ ಕಡಿಮೆ ಸಮಯದಲ್ಲಿ ಅಲ್ಲಿಗೆ ತಲುಪಬಹುದು. ನಾವು ವೇಗದ ರೈಲನ್ನು ಓಡಿಸಲಿದ್ದೇವೆ ಮತ್ತು ಈ ಸೇವೆ ದಿನವಿಡೀ ಲಭ್ಯವಾಗಲಿದೆ “ಎಂದು ರೈಲ್ವೆ ಸಚಿವರು ಹೇಳಿದರು.

ಕೆವಾಡಿಯಾ-ವಡೋದರಾ ರೈಲ್ವೆ ಮಾರ್ಗಕ್ಕಾಗಿ ಭೂಸ್ವಾಧೀನ ಮಾರ್ಚ್ ವೇಳೆಗೆ ಪೂರ್ಣಗೊಳ್ಳಲಿದೆ ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದರು.