ಕಾಶ್ಮೀರ: ಉಗ್ರ ವಿರೋಧಿ ಕಾರ್ಯಾಚರಣೆಯಲ್ಲಿ ಯೋಧರಿಗೆ ಸಹಾಯ ಮಾಡಲಿದೆ ರೋಬೋಟ್­ಗಳು

ಶ್ರೀನಗರ: ಕೂಂಬಿಂಗ್ ಕಾರ್ಯಾಚರಣೆಗಳನ್ನು ನಡೆಸಲು, ಕಟ್ಟಡಗಳಲ್ಲಿ ಅವಿತಿರುವ ಉಗ್ರರ ವಿರುದ್ಧ ಕಾರ್ಯಾಚರಣೆಗಳನ್ನು ನಡೆಸಲು ಸೇರಿದಂತೆ ವಿವಿಧ ಉಗ್ರ ವಿರೋಧಿ ಕಾರ್ಯಾಚರಣೆಗಳಲ್ಲಿ ಇನ್ನು ಮುಂದೆ ರೋಬೋಟ್­ಗಳು ಯೋಧರಿಗೆ ಸಹಾಯ ಮಾಡಲಿದೆ.

ಕೇಂದ್ರ ರಕ್ಷಣಾ ಸಚಿವಾಲಯವು ಇದಕ್ಕಾಗಿ 550 ಕಣ್ಗಾವಲು ರೋಬೋಟ್­ಗಳನ್ನು ಖರೀದಿ ಮಾಡುವ ಪ್ರಕ್ರಿಯೆಯನ್ನು ಆರಂಭಿಸಿದೆ. ಜಮ್ಮು ಕಾಶ್ಮೀರದಲ್ಲಿ ನಡೆಯುವ ಕಾರ್ಯಾಚರಣೆಗಳಲ್ಲಿ ಭಾಗಿಯಾಗಲು 25 ವರ್ಷ ಜೀವಿತಾವಧಿ ಇರುವ ರೋಬೋಟ್­ಗಳನ್ನು ನಿಯೋಜನೆಗೊಳಿಸಲಾಗುತ್ತಿದೆ.

ಈ ರೋಬೋಟುಗಳು ಮೆಟ್ಟಿಲುಗಳನ್ನು ಹತ್ತಲು ಮತ್ತು ಕಟ್ಟಡಗಳಲ್ಲಿ ಅವಿತಿರುವ ಉಗ್ರರ ವಿರುದ್ಧ ಗ್ರೆನೇಡ್ ದಾಳಿಗಳನ್ನು ನಡೆಸಲು, 20 ಸೆಂ.ಮೀ. ಆಳದ ನೀರಿಗೆ ಇಳಿಯಲು ಸಮರ್ಥವಾಗಿರಲಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಕಣಿವೆಯಲ್ಲಿ ನಡೆಯುವ ಕೂಂಬಿಂಗ್ ಮತ್ತು ಶೋಧ ಕಾರ್ಯಾಚರಣೆಯ ವೇಳೆ ಈ ರೋಬೋಟುಗಳು ರಕ್ಷಣೆಯ ಮೊದಲ ರೇಖೆಗಳಾಗಲಿವೆ, ಇದರಿಂದಾಗಿ ಹಾನಿಗಳು ಕಡಿಮೆಯಾಗಲಿದೆ. ಕಾರ್ಯಾಚರಣೆಯ ಪ್ರಾಥಮಿಕ ಹಂತದಲ್ಲಿ ನಡೆಯುವ ಜೀವ ಹಾನಿಗಳನ್ನು ಈ ರೋಬೋಟುಗಳು ತಪ್ಪಿಸಲಿವೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.

ನವೆಂಬರ್ 19ರಂದು ರಕ್ಷಣಾ ಸಚಿವಾಲಯವು ಭಾರತೀಯ ರಕ್ಷಣಾ ಉತ್ಪಾದನಾ ಸಂಸ್ಥೆಗಳಿಗೆ ತಮ್ಮ ಪ್ರಾತಿನಿಧಿತ್ವವನ್ನು ಸಲ್ಲಿಕೆ ಮಾಡುವಂತೆ ಸೂಚಿಸಿದೆ. ರೋಬೋಟುಗಳನ್ನು ದೇಶೀಯವಾಗಿ ಉತ್ಪಾದನೆ ಮಾಡಲು ಹೆಚ್ಚಿನ ಉತ್ತೇಜನವನ್ನು ನೀಡಲಾಗುತ್ತಿದೆ.