ತೀರ್ಪು ಹಿನ್ನಲೆ : ಅಯೋಧ್ಯೆಯಲ್ಲಿ ಮೂರು ಸುತ್ತಿನ ಭದ್ರತಾ ಕೋಟೆಯೇ ನಿರ್ಮಾಣವಾಗಲಿದೆ

ಅಯೋಧ್ಯಾ: ಮುಂದಿನ 23 ದಿನಗಳೊಳಗೆ ಅಯೋಧ್ಯಾ ರಾಮ ಜನ್ಮಭೂಮಿ ಮತ್ತು ಬಾಬ್ರಿ ಮಸೀದಿ ಪ್ರಕರಣದ ತೀರ್ಪು ಹೊರಬೀಳಲಿದ್ದು, ಈ ಹಿನ್ನಲೆಯಲ್ಲಿ ಅಯೋಧ್ಯಾ ಜಿಲ್ಲೆಯಲ್ಲಿ ಸೆಂಟ್ರಲ್ ಪೊಲೀಸ್ ಫೋರ್ಸ್, ರಾಜ್ಯ ಸಶಸ್ತ್ರ ಮೀಸಲು ಪಡೆ, ಸಿಆರ್­ಪಿಎಫ್­ನ ರ್ಯಾಪಿಡ್ ಆ್ಯಕ್ಷನ್ ಫೋರ್ಸ್ ಮತ್ತು ಉತ್ತರಪ್ರದೇಶ ಪೊಲೀಸ್ ಸೇರಿದಂತೆ ಕೇಂದ್ರೀಯ ಪಡೆಯ 153 ಕಂಪನಿಗಳನ್ನು ಇಲ್ಲಿ ನಿಯೋಜನೆಗೊಳಿಸಲಾಗುತ್ತಿದೆ.

ಈ ಕಂಪನಿಗಳು ಈಗಾಗಲೇ ಹೆಚ್ಚಿನ ಸಂಖ್ಯೆಯಲ್ಲಿ ಅಯೋಧ್ಯೆಗೆ ಆಗಮಿಸಲು ಪ್ರಾರಂಭಿಸಿವೆ. ಅಲ್ಲದೇ ನೆರೆಯ ಜಿಲ್ಲೆಗಳಿಗೆ ಸಂಚಾರವನ್ನು  ತಿರುಗಿಸಲು ಭಾರೀ ಪ್ರಮಾಣದಲ್ಲಿ ಸಂಚಾರಿ ಪೊಲೀಸ್ ಸಿಬ್ಬಂದಿಯನ್ನು ಸಹ ನಿಯೋಜಿಸಲಾಗಿದೆ. ಇದಲ್ಲದೇ, ತೀರ್ಪು ಹೊರ ಬೀಳುವ ದಿನದಂದು ರಾಷ್ಟ್ರೀಯ ಹೆದ್ದಾರಿಯಲ್ಲಿ ಚಲಿಸುವ ದೊಡ್ಡ ವಾಹನಗಳನ್ನು ನಗರಕ್ಕೆ ಪ್ರವೇಶಿಸದಂತೆ ತಡೆಯುವ ಸಾಧ್ಯತೆ ಇದೆ.

ರಹಸ್ಯ ಗುಪ್ತಚರ ಸಂಸ್ಥೆಗಳು, ಮತ್ತು ಯುಪಿ ಎಟಿಎಸ್ ಕಮಾಂಡೋಗಳನ್ನು ಅಯೋಧ್ಯೆ ಜಿಲ್ಲೆಯಲ್ಲಿ ನಿಯೋಜನೆಗೊಳಿಸಲಾಗುತ್ತಿದೆ. ಜಿಲ್ಲೆಯ ಕಾನೂನು ಸುವ್ಯವಸ್ಥೆ ಖಚಿತಪಡಿಸಿಕೊಳ್ಳಲು ಡ್ರೋನ್ ಕಣ್ಗಾವಲು ಬಳಸಲಾಗುತ್ತದೆ. ತೀರ್ಪಿನ ನಂತರ ವಿವಾದಿತ ಭೂಮಿಯ  ಕಡೆಗೆ ಸಾಗಲು ಯತ್ನಿಸುವ ಜನರನ್ನು ಬಂಧಿಸಲು ಮತ್ತು ಪರಿಸ್ಥಿತಿಯನ್ನು ನಿಭಾಯಿಸಲು ಜಿಲ್ಲೆಯ ಪ್ರಮುಖ ಸ್ಥಳಗಳಲ್ಲಿ ತಾತ್ಕಾಲಿಕ ಜೈಲುಗಳನ್ನು ನಿರ್ಮಿಸಲಾಗಿದೆ.

ಅಯೋಧ್ಯೆಗೆ ಭೇಟಿ ನೀಡುವ ಎಲ್ಲಾ ಜನರಿಗೆ ತಮ್ಮ  ಗುರುತಿನ ಚೀಟಿಗಳನ್ನು ಎಲ್ಲಾ ಸಮಯದಲ್ಲೂ ಇಟ್ಟುಕೊಂಡಿರುವಂತೆ ರಾಜ್ಯ ಪೊಲೀಸರು ಮನವಿ ಮಾಡಿದ್ದಾರೆ ಮತ್ತು ಅತಿಥಿ ಗೃಹಗಳು ಮತ್ತು ಹೋಟೆಲ್‌ಗಳಲ್ಲಿ ಉಳಿದುಕೊಂಡಿರುವ ಜನರನ್ನು ಪೊಲೀಸರು ಪರಿಶೀಲಿಸುತ್ತಿದ್ದಾರೆ. ಭದ್ರತಾ ನಿಯಮಗಳನ್ನು ಅಯೋಧ್ಯೆಯಾದ್ಯಂತ ಮೂರು ಹಂತಗಳಲ್ಲಿ ಜಾರಿಗೆ ತರಲಾಗುತ್ತಿದೆ. ಮೊದಲ ಹಂತವನ್ನು ಅಕ್ಟೋಬರ್ 15 ರಿಂದ ಜಾರಿಗೆ ತರಲಾಗಿದೆ, ಎರಡನೇ ಹಂತವನ್ನು ನವೆಂಬರ್ 1 ರಿಂದ ಜಾರಿಗೊಳಿಸಲಾಗುತ್ತಿದೆ ಮತ್ತು ಸುಪ್ರೀಂಕೋರ್ಟ್ ತನ್ನ ತೀರ್ಪು ನೀಡುವ ಕೆಲವೇ ದಿನಗಳ ಮೊದಲು ಅತ್ಯಂತ ಕಠಿಣವಾದ ಮೂರನೇ ಹಂತವನ್ನು ಜಾರಿಗೆ ತರಲಾಗುತ್ತದೆ

ಅಯೋಧ್ಯೆ ವಿವಾದಕ್ಕೆ ಸಂಬಂಧಿಸಿದಂತೆ  ಭದ್ರತಾ ಪರಿಸ್ಥಿತಿಗಳ ಕುರಿತ ನಿರ್ಧಾರಗಳನ್ನು ತೆಗೆದುಕೊಳ್ಳಲು ಪೊಲೀಸ್ ಅಧೀಕ್ಷಕ ಶೈಲೇಂದ್ರ ಸಿಂಗ್ ಅವರನ್ನು ನೋಡಲ್ ಅಧಿಕಾರಿಯನ್ನಾಗಿ ನೇಮಕ ಮಾಡಲಾಗಿದೆ.