ಅಹ್ಮದಾಬಾದ್: ಸಮಾಜದ ಬಗ್ಗೆ ಕಾಳಜಿ ಹೊಂದಿದ್ದ, ದುರ್ಬಲ ವರ್ಗದವರನ್ನು, ದೀನ ದಲಿತರನ್ನು ಉದ್ಧರಿಸುವ ತುಡಿತವಿದ್ದ ಗುಜರಾತಿನ ಬೀನಾ ರಾವ್ ಸ್ಲಂ ಮಕ್ಕಳ ಪಾಲಿನ ವಿದ್ಯಾದಾತೆ.
ತಂದೆಯ ನಿಸ್ವಾರ್ಥ ಸೇವೆಯಿಂದ ಪ್ರೇರಣೆ ಪಡೆದುಕೊಂಡು ಪ್ರಯಾಸ್ ಎಂಬ ಉಚಿತ ಕೋಚಿಂಗ್ ಕ್ಲಾಸನ್ನು ಆರಂಭಿಸಿ ಅದರ ಮೂಲಕವೇ ಬರೋಬ್ಬರಿ 4,500 ಸ್ಲಂ ಮಕ್ಕಳಿಗೆ ವಿದ್ಯಾಭ್ಯಾಸ ನೀಡುತ್ತಿದ್ದಾರೆ ಬೀನಾ. ಪ್ರಸ್ತುತ ಗುಜರಾತಿನ ಸೂರತ್ನಾದ್ಯಂತ ಬಡಮಕ್ಕಳಿಗಾಗಿ ಒಟ್ಟು 8 ಕೋಚಿಂಗ್ ಸೆಂಟರನ್ನು ಇವರು ತೆರೆದಿದ್ದಾರೆ. ಪಾಠ ಹೇಳಿಕೊಡಲು 34 ಸ್ವಯಂಸೇವಕರನ್ನು ಇಟ್ಟುಕೊಂಡಿದ್ದಾರೆ. ಅವರಿಗೆ ತನ್ನ ಕೈಯಿಂದಲೇ 1000 ರಿಂದ 1,500 ರೂಪಾಯಿಗಳನ್ನು ಗೌರವ ಧನವಾಗಿ ನೀಡುತ್ತಾರೆ.
ಬೀನಾ ಅವರ ಪ್ರಯಾಸ್ ಕೋಚಿಂಗ್ ಸೆಂಟರ್ನಲ್ಲಿ ಕೇವಲ ಸಾಮಾನ್ಯ ಶಿಕ್ಷಣ ಮಾತ್ರವಲ್ಲದೇ, ಮಕ್ಕಳಿಗೆ ನೈತಿಕ ಪಾಠ, ಕಲೆ, ಯೋಗ ಮತ್ತಿತರ ವಿಷಯಗಳನ್ನೂ ಹೇಳಿಕೊಡಲಾಗುತ್ತದೆ. ವಿಜ್ಞಾನ ಮತ್ತು ಕ್ರೀಡೆಯಲ್ಲೂ ಮಕ್ಕಳು ಪರಿಣಿತಿ ಪಡೆಯುವಂತೆ ಮಾಡಲಾಗುತ್ತಿದೆ. ಇದಕ್ಕಾಗಿ 3 ಸಾವಿರ ವಿಚಾರಸಂಕಿರಣಗಳನ್ನು ಏರ್ಪಡಿಸಲಾಗಿದೆ. ಮೊಬೈಲ್ ಲ್ಯಾಬೋರೇಟರಿಯನ್ನೂ ಸ್ಥಾಪಿಸಲಾಗಿದೆ. ಉಚಿತ ಪುಸ್ತಕವನ್ನು ವಿತರಿಸಲಾಗುತ್ತಿದೆ.
ಇಲ್ಲಿ ಕಲಿಯುವ ಸ್ಲಂ ಮಕ್ಕಳು ನಿಂದನಾ ವರ್ತನೆಯನ್ನು ತೊರೆದು ಶಿಸ್ತು, ಸಂಯಮ ಮತ್ತು ವಿನಯವನ್ನು ಕಲಿತಿದ್ದಾರೆ. ಶೈಕ್ಷಣಿಕವಾಗಿಯೂ ಉತ್ತಮ ಪ್ರಗತಿಯನ್ನು ತೋರಿಸುತ್ತಿದ್ದಾರೆ.
ಬೀನಾ ಅವರ ತಂದೆ ವೃತ್ತಿಪರ ವಯೋಲಿನ್ ವಾದಕ, ಆದರೂ ತಮ್ಮ ಬಿಡುವಿನ ವೇಳೆಯಲ್ಲಿ ಅವರು ಅಂಧ ಮಕ್ಕಳಿಗೆ ಪಾಠ ಹೇಳಿಕೊಡುತ್ತಿದ್ದರು. ತಂದೆಯ ಈ ಸೇವೆ ಬೀನಾ ಅವರ ಮೇಲೆ ತೀವ್ರ ಪ್ರಭಾವ ಬೀರಿತ್ತು. ಬಡ ಮಕ್ಕಳಿಗೆ ತಾನೂ ಏನನ್ನಾದರು ಮಾಡಬೇಕೆಂಬ ಛಲ ಮೂಡಿಸಿತ್ತು. ಇದಕ್ಕಾಗಿ ತನ್ನ ಪತಿಯ ಬೆಂಬಲದೊಂದಿಗೆ ಅವರು 2006 ರಲ್ಲಿ ಪ್ರಯಾಸ್ ಎಂಬ ಉಚಿತ ಕೋಚಿಂಗ್ ಸೆಂಟರ್ನ್ನು ಆರಂಭಿಸಿದರು.
ದಾನಿಗಳು ಕೊಟ್ಟ ಹಣ ಮತ್ತು ತಮ್ಮ ಕೈಯಲ್ಲಿನ ಹಣವನ್ನು ಒಟ್ಟು ಸೇರಿಸಿ ಇಲ್ಲಿ ಸ್ಲಂ ಮಕ್ಕಳಿಗೆ ವಿದ್ಯಾಭ್ಯಾಸ ನೀಡಲಾಗುತ್ತಿದೆ. ಅವರನ್ನೂ ದೇಶದ ಪ್ರಜ್ಞಾವಂತ ನಾಗರಿಕರನ್ನಾಗಿ ಮಾಡಲಾಗುತ್ತಿದೆ. ಎಂದಿಗೂ ಪ್ರಚಾರವನ್ನು ಬಯಸದೆ ನಿಸ್ವಾರ್ಥ ಸೇವೆಯಲ್ಲಿ ತೊಡಗಿರುವ ಬೀನಾ ರಾವ್ ಅವರಿಗೆ ಹ್ಯಾಟ್ಸ್ ಆಫ್ ಹೇಳಲೇ ಬೇಕು.
ನ್ಯೂಸ್ 13 ಸಮಾಜದ ಧನಾತ್ಮಕ ಸುದ್ದಿಗಳನ್ನು ಹಾಗೂ ರಾಷ್ಟ್ರೀಯ ವಿಚಾರಗಳನ್ನು ನಿಮಗೆ ತಲುಪಿಸುವ ಪ್ರಯತ್ನ ಮಾಡುತ್ತದೆ. ಈ ರೀತಿ ಇನ್ನಷ್ಟು ಉತ್ತಮ ಸುದ್ದಿಗಳನ್ನು ತಲುಪಿಸಲು ನಿಮ್ಮ ಸಹಕಾರವನ್ನು ಅಪೇಕ್ಷಿಸುತ್ತಿದ್ದೇವೆ. ಈ ಕಾರ್ಯದಲ್ಲಿ ನೀವೂ ನಮ್ಮೊಂದಿಗೆ ಜೊತೆಯಾಗಿ.
News13 strives to publish and promote positive news/happenings and nationalistic thoughts. Join hands with us in this constructive cause. We hope and expect your co-operation in this objective of broadcasting news that shall keep up with quality journalism.