ಕಾಶ್ಮೀರದಲ್ಲಿ ಪದವಿ, ವೃತ್ತಿಪರ, ಆಡಳಿತಾತ್ಮಕ ಕಾಲೇಜುಗಳನ್ನು ಸ್ಥಾಪಿಸಲಿದೆ ಕೇಂದ್ರ

ಶ್ರೀನಗರ: ಜಮ್ಮು ಕಾಶ್ಮೀರದಲ್ಲಿ ಶಿಕ್ಷಣವನ್ನು ಉನ್ನತೀಕರಿಸಲು ಸರ್ಕಾರ ಮುಂದಾಗಿದ್ದು, ಶೀಘ್ರದಲ್ಲೇ 16 ಪದವಿ ಮತ್ತು ನಾಲ್ಕು ವೃತ್ತಿಪರ ಕಾಲೇಜುಗಳನ್ನು ಸ್ಥಾಪನೆ ಮಾಡುತ್ತಿದೆ.

ಒಂದು ಆಡಳಿತಾತ್ಮಕ ಕಾಲೇಜನ್ನು ಸಹ ಅಲ್ಲಿ ಸ್ಥಾಪಿಸಲಾಗುವುದು ಎಂದು ಮಾಹಿತಿ ಮತ್ತು ಸಾರ್ವಜನಿಕ ಸಂಪರ್ಕ ಇಲಾಖೆ (ಡಿಐಪಿಆರ್) ತಿಳಿಸಿದೆ. ಕಾಲೇಜು ಸ್ಥಾಪನೆಗಾಗಿ ಭೂಮಿಯನ್ನು ಗುರುತಿಸುವ ಪ್ರಕ್ರಿಯೆಯ ಪ್ರಗತಿಯನ್ನು ವಿಭಾಗೀಯ ಆಯುಕ್ತರು ಬುಧವಾರ ಪರಿಶೀಲಿಸಿದ್ದಾರೆ.

“ಕಣಿವೆಯಲ್ಲಿ 16 ಪದವಿ, 4 ವೃತ್ತಿಪರ, ಒಂದು ಆಡಳಿತಾತ್ಮಕ ಕಾಲೇಜು ಸ್ಥಾಪಿಸಲು ಸರ್ಕಾರ ನಿರ್ಧರಿಸಿದೆ. ಭೂ ಗುರುತಿನ ಪ್ರಕ್ರಿಯೆಯ ಪ್ರಗತಿಯನ್ನು ವಿಭಾಗೀಯ ಆಯುಕ್ತರು ಪರಿಶೀಲಿಸಿದ್ದಾರೆ” ಎಂದು ಮಾಹಿತಿ ಮತ್ತು ಸಾರ್ವಜನಿಕ ಸಂಪರ್ಕ ಇಲಾಖೆ ಟ್ವೀಟ್ ಮಾಡಿದೆ.

ಇಲಾಖೆಯ ಪ್ರಕಾರ, ಮೆಟ್ರಿಕ್ ಪೂರ್ವ ಮತ್ತು ನಂತರದ  ವಿದ್ಯಾರ್ಥಿವೇತನ ನಮೂನೆಗಳನ್ನು ಸಲ್ಲಿಸುವ ಸಲುವಾಗಿ, ಸರ್ಕಾರವು ಇಲ್ಲಿನ ವಿದ್ಯಾರ್ಥಿಗಳಿಗಾಗಿ ಪ್ರತಿ ಜಿಲ್ಲಾ ಕಲೆಕ್ಟರ್ (ಡಿಸಿ) ಕಚೇರಿಯಲ್ಲಿ ವೃತ್ತಿಪರ ಸಿಬ್ಬಂದಿಯನ್ನು ಒಳಗೊಂಡ ಮೂರು ಇಂಟರ್ನೆಟ್ ಕಿಯೋಸ್ಕಗಳನ್ನು ಸ್ಥಾಪಿಸುತ್ತಿದೆ.

ಈ ಕಾಲೇಜುಗಳ ಸ್ಥಾಪನೆಗೆ ಕೇಂದ್ರ ಸರ್ಕಾರವು 325 ಕೋಟಿ ರೂಪಾಯಿಗಳನ್ನು ಬಿಡುಗಡೆಗೊಳಿಸಲು ನಿರ್ಧರಿಸಿದೆ.

ಈಗಾಗಲೇ ಕಣಿವೆ ಪ್ರದೇಶದಲ್ಲಿ ಆರೋಗ್ಯ ಮತ್ತು ವೈದ್ಯಕೀಯ ಶಿಕ್ಷಣವನ್ನೂ ಪುನರುಜ್ಜೀವನಗೊಳಿಸಲು ಕೇಂದ್ರ ಸರ್ಕಾರ ನಿರ್ಧರಿಸಿದೆ. ಲಡಾಖ್­ನ ಲೇಹ್ ಜಿಲ್ಲೆಗೆ ಹೊಸ ವೈದ್ಯಕೀಯ ಕಾಲೇಜನ್ನು ಘೋಷಿಸಿದೆ.