ಅಭಿನಂದನ್­ರನ್ನು ಬಂಧಿಸಿ ಹಿಂಸಿಸಿದ್ದ ಪಾಕಿಸ್ಥಾನದ ಸೈನಿಕ ಭಾರತೀಯ ಸೇನೆಯಿಂದಲೇ ಹತನಾದ

ನವದೆಹಲಿ: ಬಾಲಕೋಟ್ ವೈಮಾನಿಕ ದಾಳಿಯ ಬಳಿಕ ಭಾರತದ ವಾಯುಗಡಿಯನ್ನು ಅತಿಕ್ರಮಣ ಮಾಡಲು ಬಂದಿದ್ದ ಪಾಕಿಸ್ಥಾನದ ಎಫ್-16 ಯುದ್ಧ ವಿಮಾನವನ್ನು ಬೆನ್ನಟ್ಟಿ ಹೊಡೆದುರುಳಿಸಿದ ಬಳಿಕ ವಿಂಗ್ ಕಮಾಂಡರ್ ಅಭಿನಂದನ್ ವರ್ತಮಾನ್ ಇದ್ದ ವಿಮಾನವು ಪತನಗೊಂಡು ಪಾಕಿಸ್ಥಾನ ಭೂಪ್ರದೇಶದಲ್ಲಿ ಹೋಗಿ ಬಿದ್ದಿತ್ತು. ಆಗ  ಅಭಿನಂದನ್ ಅವರನ್ನು ಸೆರೆಹಿಡಿದು ಹಿಂಸಿಸಿದ್ದ ಪಾಕಿಸ್ಥಾನದ ಯೋಧನೀಗ ಹತನಾಗಿದ್ದಾನೆ.

ವಾಸ್ತವ ಗಡಿ ರೇಖೆಯ ಸಮೀಪ ನಡೆದ ಗುಂಡಿನ ಚಕಮಕಿಯ ಸಂದರ್ಭದಲ್ಲಿ ಭಾರತೀಯ ಯೋಧರ ಗುಂಡೇಟಿಗೆ ಈತ ಬಲಿಯಾದ ಎಂದು ಮೂಲಗಳು ತಿಳಿಸಿವೆ.

ವರದಿಗಳ ಪ್ರಕಾರ, ಪಾಕಿಸ್ಥಾನ ಸೇನೆಯ ಸ್ಪೆಷಲ್ ಸರ್ವಿಸ್ ಗ್ರೂಪಿನ ಸುಬೇದಾರ್ ಅಹ್ಮದ್ ಖಾನ್ ಅನ್ನು ಆಗಸ್ಟ್ 17ರಂದು ಗಡಿಯ ನಕ್ಯಾಲ್ ಸೆಕ್ಟರಿನಲ್ಲಿ ನಡೆದ ಗುಂಡಿನ ಚಕಮಕಿಯಲ್ಲಿ ಹೊಡೆದುರುಳಿಸಲಾಗಿದೆ. ಈತ ಭಾರತದೊಳಗೆ ಹೆಚ್ಚಿನ ಪ್ರಮಾಣದ ಉಗ್ರರನ್ನು ಒಳನುಸುಳಿಸಲು ಪ್ರಯತ್ನಿಸುತ್ತಿದ್ದ ಎಂದು ಹೇಳಲಾಗಿದೆ.

ಫೆಬ್ರವರಿ 17ರಂದು ಅಭಿನಂದನ್ ಅವರನ್ನು ಸೆರೆಹಿಡಿದ ಬಳಿಕ ಪಾಕಿಸ್ಥಾನ ಬಿಡುಗಡೆ ಮಾಡಿದ ಫೋಟೋಗಳಲ್ಲಿ ಅಹ್ಮದ್ ಖಾನ್ ಕಾಣಿಸಿಕೊಂಡಿದ್ದಾನೆ.

ಮೂಲಗಳ ಪ್ರಕಾರ, ನೌಶೇರಾ, ಸುಂದರ್ಬನಿ, ಪಲ್ಲನ್ ವಾಲಾ ಸೆಕ್ಟರುಗಳಲ್ಲಿ ಈತ ಉಗ್ರರನ್ನು ಭಾರತದೊಳಗೆ ಒಳನುಸುಳಿಸಲು ಸಹಾಯ ಮಾಡುತ್ತಿದ್ದ. ಇದೇ ಕೆಲಸಕ್ಕೆಂದು ಪಾಕ್ ಸೇನೆ ಈತನನ್ನು ನಿಯೋಜನೆಗೊಳಿಸಿತ್ತು.

ಜೈಶೇ ಇ ಮೊಹಮ್ಮದ್ ಮುಂತಾದ ಉಗ್ರ ಸಂಘಟನೆಗಳ ತರಬೇತಿ ಹೊಂದಿದ ಸದಸ್ಯರನ್ನು ಪಾಕಿಸ್ಥಾನದ ಯೋಜನೆಯಂತೆ ಈತ ಭಾರತಕ್ಕೆ ಉಗ್ರರನ್ನು ಒಳನುಸುಳಿಸುವ ಕೆಲಸ ಮಾಡುತ್ತಿದ್ದ ಎಂದು ಹೇಳಲಾಗಿದೆ.