ಮಕ್ಕಳನ್ನು ಹೆಗಲ ಮೇಲೆ ಕೂರಿಸಿಕೊಂಡು ಪ್ರವಾಹದಿಂದ ರಕ್ಷಿಸಿದ ಪೊಲೀಸ್­ಗೆ ಶ್ಲಾಘನೆಗಳ ಸುರಿಮಳೆ

ಅಹ್ಮದಾಬಾದ್: ಪ್ರವಾಹದ ನಡುವೆ ಮಕ್ಕಳಿಬ್ಬರನ್ನು ಹೆಗಲ ಮೇಲೆ ಕೂರಿಸಿಕೊಂಡು ಸುರಕ್ಷಿತವಾದ ಪ್ರದೇಶಕ್ಕೆ ಸ್ಥಳಾಂತರ ಮಾಡಿದ ಗುಜರಾತಿನ ಪೊಲೀಸ್ ಕಾನ್ಸ್­ಸ್ಟೇಬಲ್­ಗೆ ಅವರಿಗೆ ಎಲ್ಲಾ ಕಡೆಯಿಂದಲೂ ಶ್ಲಾಘನೆಗಳ ಮಹಾಪೂರ ಹರಿದು ಬರುತ್ತಿದೆ. ಗುಜರಾತ್ ಮುಖ್ಯಮಂತ್ರಿ ವಿಜಯ್ ರೂಪಾಣಿ ಅವರೂ ಇವರ ಕಠಿಣ ಪರಿಶ್ರಮ ಮತ್ತು ಸಮರ್ಪಣೆಗೆ ಮೆಚ್ಚುಗೆಗಳನ್ನು ವ್ಯಕ್ತಪಡಿಸಿದ್ದಾರೆ.

ಗುಜರಾತ್ ರಾಜ್ಯದಲ್ಲಿ ನಿರಂತರ ಭಾರಿ ಮಳೆಯ ಹಿನ್ನೆಲೆಯಲ್ಲಿ ಗುಜರಾತ್‌ನ ಹಲವಾರು ಭಾಗಗಳಲ್ಲಿ ಪ್ರವಾಹ ಉಂಟಾಗಿದೆ. ಈ ಪ್ರವಾಹದಲ್ಲಿ ಕಾನ್‌ಸ್ಟೆಬಲ್ ಪೃಥ್ವಿರಾಜ್ ಜಡೇಜಾ ಮಕ್ಕಳನ್ನು ರಕ್ಷಿಸುವ ಹೃದಯಸ್ಪರ್ಶಿ ದೃಶ್ಯವುಳ್ಳ ವಿಡಿಯೋ ಟ್ವಿಟರ್‌ನಲ್ಲಿ ವ್ಯಾಪಕವಾಗಿ ಹಂಚಿಕೊಳ್ಳಲಾಗುತ್ತಿದೆ.

ಕಲ್ಯಾಣಪುರ ಗ್ರಾಮದ ಶಾಲೆಯೊಂದರ ವಿದ್ಯಾರ್ಥಿಗಳಿಗೆ ಸಹಾಯ ಮಾಡುವಂತೆ  ಕರೆ ಬಂದ ತಕ್ಷಣ ಪೊಲೀಸ್ ತಂಡ ಅಲ್ಲಿಗೆ ಧಾವಿಸಿತ್ತು. ಈ ತಂಡದಲ್ಲಿ ಜಡೇಜಾ ಅವರು ಕೂಡ ಇದ್ದರು. ಗಂಟೆಗಟ್ಟಲೆ ಸುರಿದ ಭಾರೀ ಮಳೆಯ ಕಾರಣ ಶಾಲಾ ಕಟ್ಟಡದ ಸುತ್ತಲೂ ನೀರು ಸಂಗ್ರಹವಾಗಿತ್ತು, ಅಲ್ಲಿದ್ದ ಮಕ್ಕಳಿಗೆ ಹೊರಬರಲು ಸಾಧ್ಯವಾಗಲಿಲ್ಲ.

“ಕಲ್ಯಾಣ್ ರಸ್ತೆ ಬಳಿ  40 ಕ್ಕೂ ಹೆಚ್ಚು ಜನರು ಸಿಕ್ಕಿಬಿದ್ದಿರುವ ಬಗ್ಗೆ ನಮಗೆ ಮಾಹಿತಿ ಸಿಕ್ಕಿತು. ನಮ್ಮ ತಂಡ ಸ್ಥಳಕ್ಕೆ ತಲುಪಿ ಎಲ್ಲರನ್ನೂ ರಕ್ಷಿಸಿತು. ಪರಿಸ್ಥಿತಿ ಹೇಗಿತ್ತು ಎಂದರೆ ತುಸು ಯೋಚಿಸಲೂ ನಮಗೆ ಸಮಯವಿರಲಿಲ್ಲ. ಜನರನ್ನು ಯಾವುದೇ ಪರಿಸ್ಥಿತಿಯಲ್ಲಾದರೂ ರಕ್ಷಿಸಲೇಬೇಕಾಗಿತ್ತು. ಹಾಗಾಗಿ ನಾನು  ನನ್ನ ಹೆಗಲ ಮೇಲೆ ಇಬ್ಬರು ಮಕ್ಕಳನ್ನು ಹೊತ್ತು ಸುರಕ್ಷಿತ ಜಾಗಕ್ಕೆ ತಲುಪಿದೆ” ಎಂದು ಜಡೇಜಾ ಹೇಳುತ್ತಾರೆ.

ಗುಜರಾತ್ ಪೊಲೀಸ್ ಹೆಚ್ಚುವರಿ ಮಹಾನಿರ್ದೇಶಕ ಶಂಶೇರ್ ಸಿಂಗ್ ಅವರು ಕಾನ್ಸ್ಟೇಬಲ್ ಅವರ ಕಾರ್ಯವನ್ನು”ವೀರೋಚಿತ” ಎಂದು ಶ್ಲಾಘಿಸಿದ್ದಾರೆ.

ಟ್ವಿಟರ್ ಬಳಕೆದಾರರು ಜಡೇಜಾ ಅವರ ಕಾರ್ಯಕ್ಕೆ ಭೇಷ್ ಎಂದಿದ್ದು. ಅವರ ವೇತನ ಹೆಚ್ಚಿಸುವಂತೆ ಸರ್ಕಾರವನ್ನು ಒತ್ತಾಯಿಸಿದ್ದಾರೆ.

“ಈ ದೃಶ್ಯ ನನ್ನ ಹೃದಯವನ್ನು ಕಸಿಯಿತು! ಪಿಎಂಒ ಇಂಡಿಯಾ ದಯವಿಟ್ಟು ನಮ್ಮೆಲ್ಲಾ ಪೊಲೀಸ್, ಯೋಧರಿಗೆ, ನೌಕಾ ಯೋಧರಿಗೆ, ವಾಯುಸೇನಾ ಯೋಧರಿಗೆ  ಉತ್ತಮ ಸಂಬಳ, ಉತ್ತಮ ಸೌಲಭ್ಯಗಳನ್ನು ನೀಡಿ ಅವರಿಗೆ ಉತ್ತಮ ಜೀವನವನ್ನು ನೀಡೋಣ. ಇದು ರಾಷ್ಟ್ರಕ್ಕೆ ಸೇವೆ ಸಲ್ಲಿಸುವವರಿಗೆ ನೀಡುವ ಅತ್ಯುನ್ನತ ಗೌರವವಾಗುತ್ತದೆ” ಎಂದು ಟ್ವಿಟರ್ ಬಳಕೆದಾರರೊಬ್ಬರು ಬರೆದಿದ್ದಾರೆ.