ವೈಷ್ಣೋದೇವಿ ಭಕ್ತರಿಗಾಗಿ ಶೀಘ್ರದಲ್ಲೇ ದೆಹಲಿ-ಕಾತ್ರಾ ನಡುವೆ ಸಂಚರಿಸಲಿದೆ ‘ವಂದೇ ಭಾರತ್ ಎಕ್ಸ್­ಪ್ರೆಸ್’

ನವದೆಹಲಿ: ಶೀಘ್ರದಲ್ಲೇ ನರೇಂದ್ರ ಮೋದಿಯವರ ಮಹತ್ವಾಕಾಂಕ್ಷೆಯ ರೈಲು ‘ವಂದೇ ಭಾರತ್ ಎಕ್ಸ್­ಪ್ರೆಸ್’ ದೆಹಲಿ ಮತ್ತು ಜಮ್ಮು ಕಾಶ್ಮೀರದ ಕಾತ್ರಾ ನಡುವೆ ಸಂಚರಿಸಲಿದೆ. ಇದರಿಂದ­ ವೈಷ್ಣೋದೇವಿಗೆ ತೆರಳುವ ಭಕ್ತಾದಿಗಳಿಗೆ ಇದರಿಂದ ಸಾಕಷ್ಟು ಪ್ರಯೋಜನವಾಗಲಿದೆ.

ದೆಹಲಿ ಮತ್ತು ಕಾತ್ರಾ ನಡುವೆ ‘ವಂದೇ ಭಾರತ್ ಎಕ್ಸ್­ಪ್ರೆಸ್’ ಅನ್ನು ಓಡಿಸುವ ನಿರ್ಧಾರವನ್ನು ಇತ್ತೀಚಿಗಷ್ಟೇ ತೆಗೆದುಕೊಳ್ಳಲಾಗಿದೆ ಮತ್ತು ಶೀಘ್ರದಲ್ಲೇ ಟ್ರಯಲ್ ರನ್ ನಡೆಯುವ ನಿರೀಕ್ಷೆ ಇದೆ. ಒಂದು ಬಾರಿ ಇದರ ಪ್ರಯಾಣ ಅಧಿಕೃತವಾಗಿ ಆರಂಭವಾದರೆ ದೆಹಲಿಯಿಂದ ಕಾತ್ರಾಗೆ ಕೇವಲ 8 ಗಂಟೆಗಳಲ್ಲಿ ತಲುಪಬಹುದು. ಪ್ರಸ್ತುತ ರೈಲಿನ ಮೂಲಕ ದೆಹಲಿಯಿಂದ ಕಾತ್ರಾಗೆ ಪ್ರಯಾಣಿಸಲು 10 ರಿಂದ 12 ಗಂಟೆಗಳು ಬೇಕಾಗುತ್ತವೆ.

ಟ್ರಯಲ್ ರನ್ ಮುಗಿದು ಗಂಟೆಗೆ 130 ಕಿಮೀ ಓಡುವ ವಂದೇ ಭಾರತ್ ಎಕ್ಸ್­ಪ್ರೆಸ್ ಪ್ರಯಾಣವನ್ನು ಆರಂಭಿಸಿದರೆ, ಅಂಬಾಲ, ಲುಧಿಯಾನ ಮತ್ತು ಜಮ್ಮು ತವಿಗಳಲ್ಲಿ ನಿಲುಗಡೆಯಾಗಿ ಕೊನೆಗೆ ಕಾತ್ರಾ ರೈಲು ನಿಲ್ದಾಣವನ್ನು ತಲುಪಲಿದೆ. ಪ್ರತಿ ನಿಲ್ದಾಣದಲ್ಲೂ ಕೇವಲ 2 ನಿಮಿಷಗಳ ಕಾಲ ಇದು ನಿಲುಗಡೆಯಾಗಲಿದೆ.

ಪ್ರಸ್ತುತ ವಂದೇ ಎಕ್ಸ್­ಪ್ರೆಸ್ ರೈಲು ದೆಹಲಿ ಮತ್ತು ವಾರಣಾಸಿ ನಡುವೆ ಸಂಚರಿಸುತ್ತಿದ್ದು, ಜನರಿಂದ ಭಾರೀ ಪ್ರತಿಕ್ರಿಯೆಯನ್ನು ಪಡೆದುಕೊಂಡಿದೆ. ಒಂದೇ ವರ್ಷದಲ್ಲಿ ಈ ರೈಲಿನ ಉತ್ಪಾದನಾ ವೆಚ್ಚ ಮರುಗಳಿಕೆಯಾಗಲಿದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.