ಏರುತ್ತಿರುವ ತಾಪಮಾನಕ್ಕೆ ಕಂಗಾಲಾದ ಉತ್ತರ ಭಾರತೀಯರು

ನವದೆಹಲಿ: ಉತ್ತರ ಭಾರತದಲ್ಲಿ ಸೂರ್ಯನ ಪ್ರತಾಪಕ್ಕೆ ಜನ ಕಂಗಾಲಾಗಿ ಹೋಗುತ್ತಿದ್ದಾರೆ. ಇನ್ನು ಎರಡು ದಿನಗಳ ಕಾಲ ಬಿಸಿಗಾಳಿ ಬೀಸಲಿರುವ ಪರಿಣಾಮ ಹೊರಗಡೆ ಓಡಾಡದಿರುವುದು ಸೂಕ್ತ ಎಂಬ ಮುನ್ನೆಚ್ಚರಿಕೆಗಳನ್ನು ನೀಡಲಾಗುತ್ತಿದೆ. ಭಾನುವಾರ ವಿಶ್ವದ 15 ಅತೀ ಬಿಸಿಲ ಪ್ರದೇಶಗಳ ಪೈಕಿ ಉತ್ತರಭಾರತದ 10 ಪ್ರದೇಶಗಳು ಸ್ಥಾನ ಪಡೆದುಕೊಂಡಿದೆ.

ರಾಜಸ್ಥಾನದ ಚುರು ಮತ್ತು ಶ್ರೀ ಗಂಗಾನಗರ್ ವಿಶ್ವದ ಅತೀ ಉಷ್ಣತೆಯ ಪ್ರದೇಶ ಎನಿಸಿಕೊಂಡಿದೆ. ಇಲ್ಲಿ ತಾಪಮಾನ 48.9 ಮತ್ತು 48.6 ಡಿಗ್ರಿ ಸೆಲ್ಸಿಯಸ್ ಇದೆ. ಬಳಿಕದ ಸ್ಥಾನವನ್ನು ಪಾಕಿಸ್ಥಾನದ ಜಾಕೋಬಬಾದ್ ಪಡೆದುಕೊಂಡಿದೆ. ಇಲ್ಲಿ ಉಷ್ಣಾಂಶ 48 ಡಿಗ್ರಿ ಸೆಲ್ಸಿಯಸ್ ಇದೆ ಎಂದು El Dorado ಹವಮಾನ ವೆಬ್­ಸೈಟ್ ವರದಿ ಮಾಡಿದೆ. 47.4 ಡಿಗ್ರಿ ಸೆಲ್ಸಿಯಸ್ ಇರುವ ಉತ್ತರಪ್ರದೇಶದ ಬಂಡ, 47.2 ಡಿಗ್ರಿ ಸೆಲ್ಸಿಯಸ್ ಇರುವ ಹರಿಯಾಣದ ನರ್ನೌಲ್ ಪಟ್ಟಿಯಲ್ಲಿ ಸ್ಥಾನ ಪಡೆದುಕೊಂಡಿದೆ.

ಭಾನುವಾರ ದೆಹಲಿ, ಜೈಪುರ, ಕೋಟ, ಹೈದರಾಬಾದ್ ಮತ್ತು ಲಕ್ನೋಗಳಲ್ಲಿ ತಪಾಮಾನ 45 ಡಿಗ್ರಿ ಸೆಲ್ಸಿಯಸ್­ಗೆ ಏರಿಕೆಯಾಗಿತ್ತು. ತಣ್ಣನೆಯ ಸ್ಥಳಗಳು ಎಂದು ಕರೆಯಲ್ಪಡುವ ಶಿಮ್ಲಾ, ನೈನಿತಾಲ್ ಮತ್ತು ಶ್ರೀನಗರದಲ್ಲೂ ಕೂಡ ಸಾಮಾನ್ಯ ಮಟ್ಟಕ್ಕಿಂತ ತಾಪಮಾನ ಎರಡರಿಂದ ಮೂರು ಪಟ್ಟು ಹೆಚ್ಚಾಗಿತ್ತು. ಶಿಮ್ಲಾದಲ್ಲಿ ತಾಪಮಾನ 32 ಡಿಗ್ರಿ ಸಲ್ಸಿಯಸ್ , ನೈನಿತಾಲ್­ನಲ್ಲಿ 33 ಡಿಗ್ರಿ ಸೆಲ್ಸಿಯಸ್ ಇತ್ತು.

ವರ್ಷದಿಂದ ವರ್ಷಕ್ಕೆ ತಾಪಮಾನ ಏರಿಕೆಯಾಗುತ್ತಲೇ ಹೋಗುತ್ತಿದ್ದು, 2010 ರಿಂದ 2018ರ ನಡುವೆ ಬಿಸಿಲ ಬೇಗೆ ತಾಳಲಾರದೆ ಸುಮಾರು 1,167 ಜನರು ಮೃತಪಟ್ಟಿದ್ದಾರೆ ಎಂದು ಕಳೆದ ಫೆಬ್ರವರಿಯಲ್ಲಿ ಸಂಸತ್ತಿಗೆ ನೀಡಿದ ವರದಿಯಲ್ಲಿ ತಿಳಿಸಲಾಗಿತ್ತು. ಬಯಲು ಪ್ರದೇಶಗಳಲ್ಲಿ 40 ಡಿಗ್ರಿ ಸೆಲ್ಸಿಯಸ್, ಕರಾವಳಿ ಪ್ರದೇಶಗಳಲ್ಲಿ 37 ಡಿಗ್ರಿ ಸೆಲ್ಸಿಯಸ್ ಮತ್ತು ಹಿಮಾಲಯ ಪ್ರದೇಶಗಳಲ್ಲಿ 30 ಡಿಗ್ರಿ ಸೆಲ್ಸಿಯಸ್ ಗರಿಷ್ಠ ತಾಪಮಾನ ಎಂದು ಪರಿಗಣಿಸಲಾಗುತ್ತದೆ. ಆದರೆ ಇತ್ತೀಚಿನ ದಿನಗಳಲ್ಲಿ ಗರಿಷ್ಠತೆಯನ್ನೂ ಮೀರಿ ತಾಪಮಾನ ಬೆಳೆಯುತ್ತಿರುವುದು ಆಘಾತಕಾರಿ ಬೆಳವಣಿಗೆಯಾಗಿದೆ.