ಮಂಗಳೂರಿನ ಕುದ್ರೋಳಿ ಗಣೇಶ್ ಅವರಿಗೆ ಪ್ರತಿಷ್ಠಿತ “ಆರ್ಯಭಟ ಅಂತಾರಾಷ್ಟ್ರೀಯ ಪ್ರಶಸ್ತಿ”

ಬೆಂಗಳೂರು :   ನಗರದ ರವೀಂದ್ರ ಕಲಾಕ್ಷೇತ್ರದಲ್ಲಿ ನಡೆದ ಅದ್ದೂರಿ ಸಮಾರಂಭದಲ್ಲಿ ಬೆಂಗಳೂರಿನ ಆರ್ಯಭಟ ಸಾಂಸ್ಕ್ರತಿಕ ಸಂಸ್ಥೆಯ ವತಿಯಿಂದ ಜಾದೂ ಕ್ಷೇತ್ರದಲ್ಲಿ ಅಪರೂಪದ ಸಾಧನೆ ಮಾಡಿರುವ ಪ್ರಸಿದ್ದ ಜಾದೂಗಾರ ಮಂಗಳೂರಿನ ಕುದ್ರೋಳಿ ಗಣೇಶ್ ಇವರಿಗೆ ಪ್ರತಿಷ್ಠಿತ “ಆರ್ಯಭಟ ಅಂತಾರಾಷ್ಟ್ರೀಯ ಪಶಸ್ತಿ” ಪ್ರದಾನ ಮಾಡಲಾಯಿತು.

ನ್ಯಾಯಮೂರ್ತಿ ಶ್ರೀ ಹೆಚ್ ಎನ್. ನಾಗಮೋಹನ್ ದಾಸ್, ದೂರದರ್ಶನದ ಡಾ. ಮಹೇಶ್ ಜೋಶಿ, ಚಲನಚಿತ್ರ ವಾಣಿಜ್ಯ ಮಂಡಳಿಯ ಅಧ್ಯಕ್ಷರಾದ ಶ್ರೀ ಎಸ್. ಎ. ಚಿನ್ನೇಗೌಡ, ಆರ್ಯಭಟ  ಸಂಸ್ಥೆಯ ಅಧ್ಯಕ್ಷರಾದ ಡಾ. ಹೆಚ್. ಎಲ್. ಎನ್. ರಾವ್ ಇವರು  ಪ್ರಶಸ್ತಿ ಫಲಕ, ಸ್ಮರಣಿಕೆ ಹಾಗೂ ಪದಕ ನೀಡಿ ಶಾಲು ಹೊದಿಸಿ ಕುದ್ರೋಳಿ ಗಣೇಶ್ ಅವರನ್ನು ಸನ್ಮಾನಿಸಿದರು.

ಜಾದೂ ಕಲೆಯ ಜೊತೆ ಜಾನಪದ, ರಂಗಭೂಮಿ, ಸಂಗೀತವನ್ನು ಸೇರಿಸುವ ಮೂಲಕ ಜಾದೂ ಕಲೆಯ ಸ್ಥಾನಮಾನ ಹೆಚ್ಚಿಸುವ ಸಾಧನೆ ಮಾಡಿರುವುದು ಹಾಗೂ ಜಾದೂ ಕಲೆಯನ್ನು ಜನಪರ ಕಾಳಜಿಗೆ ಪರಿಣಾಮಕಾರಿಯಾಗಿ ಬಳಸಿಕೊಂಡಿರುವ ಕಾರ್ಯವನ್ನು ಪರಿಗಣಿಸಿ 2018 ನೇ ಸಾಲಿನ ಆರ್ಯಭಟ ಪ್ರಶಸ್ತಿಯನ್ನು ಕುದ್ರೋಳಿ ಗಣೇಶ್ ಇವರಿಗೆ ಪ್ರದಾನ ಮಾಡಲಾಯಿತು.

ಚಲನಚಿತ್ರರಂಗದ ಸಾಧುಕೋಕಿಲ, ಸುಧಾರಾಣಿ, ಕೆ. ಕಲ್ಯಾಣ ಸೇರಿದಂತೆ ವಿವಿಧ ಕ್ಶೇತ್ರಗಳಲ್ಲಿ ಗಣನೀಯ ಸೇವೆ ಮಾಡಿರುವ 60 ಸಾಧಕರಿಗೆ 44 ನೇ ಸಾಲಿನ ಆರ್ಯಭಟ ಪ್ರಶಸ್ತಿ ನೀಡಲಾಯಿತು. ಪ್ರಶಸ್ತಿ ಪ್ರದಾನದ ಮುನ್ನ ನಡೆದ ಸಾಂಸ್ಕೃತಿಕ ಕಾರ್ಯಕ್ರಮದಲ್ಲಿ ಯಕ್ಷಗಾನ, ಭರತನಾಟ್ಯ, ಸಂಗೀತ, ಚೆಂಡೆವಾದನ, ಸ್ಯಾಕ್ಸೋಫೋನ್ ವಾದನ, ಜಾದೂ ಪ್ರದರ್ಶನ ನಡೆಯಿತು.