ಇದು ಭಾರತದ, ಲೋಕತಂತ್ರದ, ಜನರ ವಿಜಯ : ಮೋದಿ

ನವದೆಹಲಿ: ಲೋಕಸಭಾ ಚುನಾವಣೆಯಲ್ಲಿ ಅಭೂತಪೂರ್ವ ವಿಜಯವನ್ನು ಬಿಜೆಪಿ ಸಾಧಿಸಿದೆ. ಈ ಹಿನ್ನಲೆಯಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರು ಬಿಜೆಪಿ ಕಾರ್ಯಕರ್ತರನ್ನು ಉದ್ದೇಶಿಸಿ ರಾಷ್ಟ್ರ ರಾಜಧಾನಿಯಲ್ಲಿ ಬಿಜೆಪಿ ಕೇಂದ್ರ ಕಛೇರಿಯಲ್ಲಿ ಮಾತನಾಡಿದರು. ಈ ವೇಳೆ ಬಿಜೆಪಿ ರಾಷ್ಟ್ರಾಧ್ಯಕ್ಷ ಅಮಿತ್ ಶಾ, ಗೃಹ ಸಚಿವ ರಾಜನಾಥ್ ಸಿಂಗ್, ಶಿವರಾಜ್ ಸಿಂಗ್ ಚೌವ್ಹಾಣ್, ಜೆಪಿ ನಡ್ಡಾ ಸೇರಿದಂತೆ ಅಪಾರ ಸಂಖ್ಯೆಯ ಕಾರ್ಯಕರ್ತರು ಉಪಸ್ಥಿತರಿದ್ದರು.

ಕಾರ್ಯಕರ್ತರನ್ನು ಉದ್ದೇಶಿಸಿ ಮಾತನಾಡಿದ ಮೋದಿಯವರು, “2019ರ ಲೋಕಸಭಾ ಚುನಾವಣೆಯಲ್ಲಿ ನವಭಾರತದ ನಿರ್ಮಾಣಕ್ಕೆ ಜನಾದೇಶ ನೀಡುವಂತೆ ಮನವಿ ಮಾಡಿಕೊಂಡೆವು. ದೇಶದ ಕೋಟಿ ಕೋಟಿ ಜನರು ಈ ಫಕೀರನ ಜೋಳಿಗೆಯನ್ನು ಭರಪೂರ ಮತಗಳಿಂದ ತುಂಬಿದರು. ಇದಕ್ಕಾಗಿ ದೇಶದ 130 ಕೋಟಿ ಭಾರತೀಯರಿಗೆ ನಮಿಸುತ್ತೇನೆ” ಎಂದರು.

2019ರ ಲೋಕಸಭಾ ಚುನಾವಣೆ ಜಗತ್ತಿನ ಪ್ರಜಾಪ್ರಭುತ್ವ ಇತಿಹಾಸದಲ್ಲಿ ಅತೀದೊಡ್ಡ ಸನ್ನಿವೇಶವಾಗಿದೆ. ಸ್ವತಂತ್ರ ಭಾರತದ ಇತಿಹಾಸದಲ್ಲಿ ಅತ್ಯಧಿಕ ಪ್ರಮಾಣದ ಮತದಾನವನ್ನು ಕಂಡ ಚುನಾವಣೆ ಇದಾಗಿತ್ತು. ಪ್ರಜಾಪ್ರಭುತ್ವದ, ಭಾರತದ ಬಗೆಗಿನ ಭಾರತೀಯರ ಜಾಗೃತಿಯ ಪ್ರತಿಫಲನವಾಗಿದೆ ಎಂದರು.

ಈ ಲೋಕತಂತ್ರದ ವ್ಯವಸ್ಥೆಯಲ್ಲಿ ಬಲಿದಾನಗೈದ, ಗಾಯಗೊಂಡ ಪರಿವಾರಕ್ಕೆ ನನ್ನ ಸಂವೇದನಾಶೀಲತೆಯನ್ನು ವ್ಯಕ್ತಪಡಿಸುತ್ತೇನೆ. ಪ್ರಜಾಪ್ರಭುತ್ವಕ್ಕಾಗಿನ ತ್ಯಾಗ ಮುಂಬರುವ ಪೀಳಿಗೆಗೆ ಪ್ರೇರಣೆ ನೀಡುತ್ತದೆ ಎಂದರು.

ಈ ಚುನಾವಣೆಯ ವಿಜಯ ಭಾರತದ ವಿಜಯ, ಪ್ರಜಾಪ್ರಭುತ್ವದ ವಿಜಯ, ಜನರ ವಿಜಯ. ಹೀಗಾಗಿ ವಿಜಯವನ್ನು ಜನತೆಯ ಚರಣಗಳಿಗೆ ಸಮರ್ಪಣೆ ಮಾಡುತ್ತೇನೆ ಎಂದರು.

ಎರಡನೆಯ ಬಾರಿ ಅಧಿಕಾರಕ್ಕೇರಿದರೂ ನಮ್ಮ ಆದರ್ಶಗಳನ್ನು, ನಮ್ಮ ಸಂಸ್ಕಾರಗಳನ್ನು, ನಮ್ಮ ವಿನಮ್ರತೆಯನ್ನು ನಾವು ಬಿಡುವುದಿಲ್ಲ. ಸಂವಿಧಾನಕ್ಕೆ ಸಮರ್ಪಿತರಾಗಿ, ವಿಕೇಂದ್ರೀಕರಣವನ್ನು ಗೌರವಿಸಿ ಎಲ್ಲಾ ರಾಜ್ಯಗಳ ಅಭಿವೃದ್ಧಿಗೆ ಹೆಗಲಿಗೆ ಹೆಗಲು ಕೊಟ್ಟು ಮುನ್ನಡೆಯುತ್ತೆವೆ ಎಂದರು.