ನೇಪಾಳ ಮೂಲಕ ಜಮ್ಮು ಕಾಶ್ಮೀರಕ್ಕೆ ನುಸುಳಿದ ಉಗ್ರರು : ಎಚ್ಚರಿಕೆ ನೀಡಿದ ಗುಪ್ತಚರ

ನವದೆಹಲಿ: ನೇಪಾಳದಿಂದ ಜಮ್ಮು ಕಾಶ್ಮೀರದ ಬಂಡೀಪೋರಾಗೆ ಉಗ್ರರು ಅಕ್ರಮವಾಗಿ ನುಸುಳಿದ್ದು, ಬೃಹತ್ ಮಟ್ಟದ ದುಷ್ಕೃತ್ಯವನ್ನು ನಡೆಸಲು ಸಂಚು ರೂಪಿಸಿದ್ದಾರೆ ಎಂಬುದಾಗಿ ಗುಪ್ತಚರ ಇಲಾಖೆಯು ಎಚ್ಚರಿಕೆ ರವಾನಿಸಿದೆ. ಈ ಹಿನ್ನಲೆಯಲ್ಲಿ ಭದ್ರತಾ ಪಡೆಗಳು ಹೈ ಅಲರ್ಟ್­ನಲ್ಲಿವೆ.

ಸಾಜಿದ್ ಮಿರ್ ಎಂಬ ಭಯೋತ್ಪಾದಕ ನೇಪಾಳದ ಕಠ್ಮಂಡುವಿನಿಂದ ಬಂಡಿಪೋರಾಗೆ ಮೂವರು ವಿದೇಶಿ ಭಯೋತ್ಪಾದಕರನ್ನು ಕರೆ ತಂದಿದ್ದಾನೆ ಎಂದು ಗುಪ್ತಚರ ವರದಿ ಹೇಳಿದೆ.

ಬಂಡೀಪೋರಾವು ವಿದೇಶದ ಭಯೋತ್ಪಾದಕರಿಂದ ಹಿಡಿದು ಜೈಶೇ, ಲಷ್ಕರ್ ಉಗ್ರರಿಗೂ ಸುರಕ್ಷಿತವಾದ ತಾಣ ಎನಿಸಿಕೊಂಡಿದೆ. ಆದರೀಗ ನೇಪಾಳದಿಂದ ಇಲ್ಲಿಗೆ ಭಯೋತ್ಪಾದಕರು ಒಳನುಸುಳಿರುವುದು ಭಾರೀ ಮಹತ್ವ ಪಡೆದುಕೊಂಡಿದೆ. ಯಾಕೆಂದರೆ 2017-18ರ ನಡುವೆ ನೇಪಾಳದಿಂದ ಭಾರತಕ್ಕೆ ಯಾವೊಬ್ಬ ಉಗ್ರರ ನುಸುಳುವಿಕೆ ನಡೆದಿಲ್ಲ.

ವರದಿಯ ಪ್ರಕಾರ, ಬಾಂಗ್ಲಾದೇಶ ಮೂಲದ ಜಮಾತ್ ಉಲ್ ಮುಜಾಹಿದ್ದೀನ್ ಸಂಘನೆಯು ಮಹಿಳಾ ಸುಸೈಡ್ ಬಾಂಬರ್ ಅನ್ನು ತರಬೇತಿಗೊಳಿಸಿದ್ದು, ಆಕೆ ಬಾಂಗ್ಲಾದೇಶ, ಭಾರತ ಮತ್ತು ಮಯನ್ಮಾರಿನಲ್ಲಿನ ಬುದ್ಧ ದೇಗುಲಗಳನ್ನು ಟಾರ್ಗೆಟ್ ಮಾಡುವ ಸಾಧ್ಯತೆ ಇದೆ ಎನ್ನಲಾಗಿದೆ, ಮೇ 18ರಂದು ಬುದ್ಧ ಪೂರ್ಣಿಯ ಸಂದರ್ಭದಲ್ಲಿ ಈಕೆ ತನ್ನ ಯೋಜನೆಯನ್ನು ಕಾರ್ಯರೂಪಕ್ಕೆ ತರುವ ಪ್ರಯತ್ನವನ್ನು ಮಾಡಬಹುದು ಎನ್ನಲಾಗಿದೆ. ಬೌದ್ಧರು ಮುಸ್ಲಿಮರಿಗೆ ನೀಡುತ್ತಿರುವ ಕಿರುಕುಳಕ್ಕೆ ಸೇಡು ತೀರಿಸಿಕೊಳ್ಳುವುದು ಈಕೆಯ ಗುರಿ ಎನ್ನಲಾಗಿದೆ.

ಪಾಕಿಸ್ಥಾನದ ನಟೋರಿಯಸ್ ಗುಪ್ತಚರ ಸಂಘಟನೆ ಐಎಸ್­ಐಯು ನೇಪಾಳದಲ್ಲಿ ಬಲಿಷ್ಠ ನೆಟ್­ವರ್ಕ್ ಸ್ಥಾಪನೆ ಮಾಡಿತ್ತು, ಇತ್ತೀಚಿನ ದಿನಗಳಲ್ಲಿ ಈ ನೆಟ್­ವರ್ಕ್ ಅನ್ನು ಬಲಹೀನಗೊಳಿಸಲಾಗಿದೆ.