ನಮ್ಮ ದೇಶದ ಹೀರೋ ವಿಂಗ್ ಕಮಾಂಡರ್ ಅಭಿನಂದನ್

ವಾಯುಸೇನೆಯ ವಿಂಗ್ ಕಮಾಂಡರ್ ಅಭಿನಂದನ್ ವರ್ತಮಾನ್, ಭಾರತದ ವಾಯು ವಲಯದೊಳಗೆ ನುಸುಳಲು ಪ್ರಯತ್ನಿಸಿದ ಪಾಕಿಸ್ಥಾನದ ಎಫ್-16 ಜೆಟ್‌ನ್ನು ಮಿಗ್-21 ರ ಮೂಲಕ ಅಟ್ಟಾಡಿಸಿಕೊಂಡು ಹೋಗಿ ಉಡಾಯಿಸಿದ ಸಿಂಹ ಹೃದಯದ ಸೈನಿಕ. ಎಲ್ಲಾ ರೀತಿಯಲ್ಲೂ ಇವರು ಭಾರತದ ಹೀರೋ. ಈ ವೀರ ಸೈನಿಕನ ಬಗ್ಗೆ ಒಂದಿಷ್ಟು ಮಾಹಿತಿಯನ್ನು ನಾವು ತಿಳಿದುಕೊಳ್ಳಲೇ ಬೇಕು.

ಅದು ಬುಧವಾರ ಬೆಳಗಿನ ಜಾವ 8.45, ಸ್ಥಳಿಯ ಗ್ರಾಮಸ್ಥ ಮೊಹಮ್ಮದ್ ರಝಾಕ್ ಚೌಧರಿಯವರು, ವಾಸ್ತವ ಗಡಿ ರೇಖೆಯಿಂದ 7 ಕಿಮೀ ದೂರ ಪಿಓಕೆಯ ಭಿಂಬರ್ ಜಿಲ್ಲೆಯಲ್ಲಿ ಆಗಸದಲ್ಲಿ ಲೋಹದ ಹಕ್ಕಿಗಳು ಪತನವಾಗುತ್ತಿರುವುದನ್ನು ನೋಡಿದರು. ರಝಾಕ್ ಅವರ ವಿವರಣೆಯನ್ನು ಪಾಕಿಸ್ಥಾನದ ಡಾನ್ ಪತ್ರಿಕೆ ಈ ರೀತಿ ವಿವರಿಸಿದೆ, ‘ಎರಡು ಏರ್‌ಕ್ರಾಫ್ಟ್‌ಗಳಿಗೆ ಬೆಂಕಿ ಹತ್ತಿಕೊಂಡಿರುವುದು ಕಂಡುಬಂತು, ಅದರಲ್ಲಿ ಒಂದು ಗಡಿ ರೇಖೆಯಾದ್ಯಂದ ಹಾರುತ್ತಿತ್ತು, ಮತ್ತೊಂದು ಪತನಗೊಂಡು ನೆಲಕ್ಕುರುಳಿತು. ಅದರ ತುಸು ದೂರದಲ್ಲಿ ಪ್ಯಾರಾಚೂಟ್‌ವೊಂದು ಕೆಳಕ್ಕೆ ಬೀಳುತ್ತಿರುವುದು ಕಂಡು ಬಂತು. ಪೈಲೆಟ್ ಪ್ಯಾರಾಚೂಟ್‌ನಿಂದ ಹಾರಿ ಸುರಕ್ಷಿತವಾಗಿ ನೆಲಕ್ಕೆ ಬಿದ್ದಿರುವುದು ಕಂಡು ಬಂತು. ಪೈಲೆಟ್ ಬಳಿ ಪಿಸ್ತೂಲ್ ಇತ್ತು, ಕೆಳಕ್ಕೆ ಬಿದ್ದಂತೆ ಆತ ಸ್ಥಳಿಯ ಯುವಕರ ಬಳಿ ಇದು ಪಾಕಿಸ್ಥಾನವೋ ಅಥವಾ ಭಾರತವೋ ಎಂದು ಕೇಳಿದ್ದಾರೆ, ಓರ್ವ ಇದು ಭಾರತ ಎಂದಿದ್ದಾನೆ. ಆಗ ಅವರು ಭಾರತ ಪರ ಘೋಷಣೆ ಹಾಕಿದ್ದಾರೆ. ಮತ್ತೆ ಈ ಪ್ರದೇಶದ ಹೆಸರು ಕೇಳಿದಾಗ, ಒರ್ವ ಖಿಲ್ಲ ಎಂದಿದ್ದಾನೆ. ಆವಾಗ ನನ್ನ ಬೆನ್ನು ಮುರಿದಿದೆ, ನನಗೆ ನೀರು ಬೇಕು ಎಂದು ಅಭಿನಂದನ್ ಕೇಳಿದ್ದಾರೆ.

ಅಭಿನಂದನ್ ಅವರು ಘೋಷಣೆ ಕೂಗಿದ್ದನ್ನು ಕೆಲವರಿಗೆ ಅರಗಿಸಿಕೊಳ್ಳಲಾಗಲಿಲ್ಲ, ತಕ್ಷಣವೇ ಅವರು ಕಲ್ಲು ಹಿಡಿದುಕೊಂಡು ಅವರ ಮೇಲೆ ಎಸೆಯಲಾರಂಭಿಸಿದ್ದಾರೆ. ಈ ವೇಳೆ ಅಭಿನಂದನ್ ಗಾಳಿಯಲ್ಲಿ ಗುಂಡು ಹಾರಿಸಿದ್ದಾರೆ. ರಝಾಕ್ ಅವರು ಹೇಳುವಂತೆ, ಅಭಿನಂದನ್ ಅವರು ಯುವಕರನ್ನು ತಪ್ಪಿಸಿಕೊಂಡು ಹಿಮ್ಮುಖವಾಗಿ ಅರ್ಧ ಕಿಲೋಮೀಟರ್‌ವರೆಗೆ ಓಡಿದ್ದಾರೆ. ಈ ಚೇಸಿಂಗ್ ವೇಳೆ ಅವರು ಒಂದಿಷ್ಟು ಗುಂಡುಗಳನ್ನು ಹಾರಿಸಿದ್ದಾರೆ. ಆದರೆ ಯಾರಿಗೂ ಗುಂಡು ತಗುಲದಂತೆ, ಕೇವಲ ಭಯಪಡಿಸುವ ಉದ್ದೇಶದಿಂದ ಅವರು ಸುರಕ್ಷಿತವಾಗಿ ಗುಂಡು ಹಾರಿಸಿದ್ದಾರೆ. ಬಳಿಕ ಒಂದು ಸಣ್ಣ ಕೊಳಕ್ಕೆ ಹಾರಿದ್ದಾರೆ. ಅಲ್ಲಿ ಅವರು ಕೆಲವೊಂದು ದಾಖಲೆ ಮತ್ತು ಮ್ಯಾಪ್‌ಗಳನ್ನು ನಾಶ ಪಡಿಸುವ ಪ್ರಯತ್ನ ನಡೆಸಿದ್ದಾರೆ.

ಅಲ್ಲಿಗೆ ಬಂದ ಜನರು ಅವರಿಗೆ ಪಿಸ್ತೂಲ್ ಬಿಸಾಕುವಂತೆ ಸೂಚಿಸಿದ್ದಾರೆ. ಈ ವೇಳೆ ಕೊಳದಿಂದ ಪಿಸ್ತೂಲ್ ಬಿಸಾಕಿ ಹೊರಬಂದ ಅವರನ್ನು ಕೆಲವರು ಹಿಡಿದುಕೊಂಡು ಹೊಡೆಯಲಾರಂಭಿಸಿದ್ದಾರೆ, ಇನ್ನು ಕೆಲವರು ಹೊಡೆಯುವವರನ್ನು ತಡೆಯುವ ಪ್ರಯತ್ನ ಮಾಡಿದ್ದಾರೆ. ಈ ಸಂದರ್ಭದಲ್ಲಿ ಅಲ್ಲಿಗೆ ಬಂದ ಪಾಕ್ ಆರ್ಮಿಯವರು ಅಭಿನಂದನ್ ಅವರನ್ನು ವಶಕ್ಕೆ ಪಡೆದುಕೊಂಡು ಅವರನ್ನು ವಿಚಾರಿಸಿದ್ದಾರೆ, ಹೆಸರೇನು, ಎಲ್ಲಿಯವರು, ಏನು ಮಾಡುತ್ತಿದ್ದಾರೆ ಎಂದೆಲ್ಲಾ ಕೇಳಿದ್ದಕ್ಕೆ ಹೆಚ್ಚೇನೂ ಉತ್ತರಿಸದೆ ಬೇಕಾದಷ್ಟನ್ನೇ ಉತ್ತರಿಸಿ, ದೇಶದ ಒಂದಿಷ್ಟೂ ಮಾಹಿತಿಯನ್ನು ಅವರಿಗೆ ಕೊಡದೆ ಜಾಣತನ ಮತ್ತು ವೀರತ್ವ ಮೆರೆದಿದ್ದಾರೆ.

ಇದೀಗ ಅಭಿನಂದನ್ ಅವರ ಪ್ರಕರಣ ಸುಖಾಂತ್ಯವನ್ನು ಕಂಡಿದೆ. ಭಾರತದ ಒತ್ತಡಕ್ಕೆ ಮಣಿದಿರುವ ಪಾಕಿಸ್ಥಾನ ಅವರನ್ನು ರಿಲೀಸ್ ಮಾಡಲು ಒಪ್ಪಿಕೊಂಡಿದೆ. ಸುರಕ್ಷಿತವಾಗಿಯೇ ಅವರು ಭಾರತಕ್ಕೆ ಮರಳಲಿದ್ದಾರೆ.

ಅಭಿನಂದನ್ ಅವರ ತಂದೆ ಮಾಜಿ ಏರ್ ಮಾರ್ಷಲ್ ವರ್ತಮಾನ್ ಅವರು, ’ಎಲ್ಲರಿಗೂ ಧನ್ಯವಾದಗಳು, ದೇವರ ಆರ್ಶೀವಾದಕ್ಕೂ ಧನ್ಯವಾದಗಳು, ಅಭಿನಂದನ್ ಸುರಕ್ಷಿತವಾಗಿದ್ದಾನೆ. ಆತ ಮಾತನಾಡಿದ ಶೈಲಿ ನೋಡಿ ಅತ್ಯಂತ ಧೈರ್ಯದಲ್ಲಿದ್ದಾನೆ ಎಂಬುದು ತಿಳಿಯುತ್ತದೆ. ಆತ ನಿಜವಾದ ಸೈನಿಕ, ಆತನ ಬಗ್ಗೆ ಹೆಮ್ಮೆ ಪಡುತ್ತೇವೆ. ಎಲ್ಲರ ಆಶೀರ್ವಾದವೂ ಆತನ ಮೇಲಿದೆ. ನಿಮ್ಮ ಬೆಂಬಲ ಮತ್ತು ಶಕ್ತಿಯಿಂದ ನಮಗೆ ಬಲ ಸಿಗುತ್ತಿದೆ’ ಎಂದಿದ್ದಾರೆ.

ಪಾಕಿಸ್ಥಾನದ ಎಫ್-16 ವಿಮಾನವನ್ನು ಹೊಡೆದುರುಳಿಸಿದ ಹೀರೋ ಅಭಿನಂದನ್ ಎಂದೆಂದಿಗೂ ಭಾರತ ಹೀರೋವಾಗಿಯೇ ಉಳಿಯಲಿದ್ದಾರೆ.