ಪ್ಲಾಸ್ಟಿಕ್ ತ್ಯಾಜ್ಯ ಸಮಸ್ಯೆಯನ್ನು ಹೋಗಲಾಡಿಸಲು ಬೆಂಗಳೂರಿನಲ್ಲಿ ಸಾಕಷ್ಟು ಕ್ರಮಗಳನ್ನು ಕೈಗೊಂಡರೂ ಗುರಿ ತಲುಪುವ ಹಾದಿ ಇನ್ನೂ ಸಾಕಷ್ಟು ದೂರ ಇದೆ. ವರದಿಗಳ ಪ್ರಕಾರ, ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆ ದಿನಕ್ಕೆ ಸಂಗ್ರಹಿಸುವ ಒಟ್ಟು 4 ಸಾವಿರ ಟನ್ ತ್ಯಾಜ್ಯಗಳ ಪೈಕಿ ಶೇ.20ರಷ್ಟು ಪ್ಲಾಸ್ಟಿಕ್ ಆಗಿರುತ್ತದೆ.
2016ರಲ್ಲಿ ಸರ್ಕಾರ, ಪ್ಲಾಸ್ಟಿಕ್ ಉತ್ಪಾದನೆ, ಬಳಕೆಯನ್ನು ನಿಷೇಧಿಸಿದರೂ ಪ್ಲಾಸ್ಟಿಕ್ ಬಳಕೆ ಹೆಚ್ಚಿನ ಪ್ರಮಾಣದಲ್ಲೇನೋ ತಗ್ಗಿಲ್ಲ. ಕೆಲವೊಂದು ಅಂಗಡಿ, ರೆಸ್ಟೋರೆಂಟ್‌ಗಳು ದಂಡದ ಹೆದರಿಕೆಗೆ ಪರಿಸರ ಸ್ನೇಹಿ ಪದಾರ್ಥಗಳಲ್ಲಿ ತಯಾರಾದ ವಸ್ತುಗಳಲ್ಲಿ ಪ್ಯಾಕಿಂಗ್‌ಗಳನ್ನು ನೀಡುತ್ತಿವೆ.
ಬೆಂಗಳೂರು ಮೂಲದ ಎನ್‌ಜಿಓ ‘ಸ್ವಚ್ಛ ಇಕೋ ಸೊಲ್ಯೂಷನ್‌’ ಪ್ಲಾಸ್ಟಿಕ್ ತ್ಯಾಜ್ಯಕ್ಕೆ ದೊಡ್ಡ ಪರಿಹಾರವನ್ನು ಒದಗಿಸುವ ನಿಟ್ಟಿನಲ್ಲಿ ಕಾರ್ಯೋನ್ಮುಖವಾಗಿದೆ. ಕರಗದ ಪ್ಲಾಸ್ಟಿಕ್ ತ್ಯಾಜ್ಯವನ್ನು ಟೈಲ್ಸ್ ಮತ್ತು ನೀರಾವರಿ ಪೈಪ್‌ಗಳನ್ನಾಗಿ ಈ ಸಂಸ್ಥೆ ಪರಿವರ್ತನೆಗೊಳಿಸುತ್ತಿದೆ.
ಬಿಬಿಎಂಪಿಯ ಸಹಯೋಗದೊಂದಿಗೆ, ಸ್ವಚ್ಛ ಸಂಸ್ಥೆ ’ರಿ-ಟೈಲ್’ನ್ನು ಅಭಿವೃದ್ಧಿಪಡಿಸಿದ್ದು, ಅತ್ಯಂತ ಹಗುರವಾದ ಈ ಟೈಲ್ಸ್‌ಗಳನ್ನು ಗ್ರಾಹಕರು ಪಾದಾಚಾರಿ ದಾರಿ, ಅಪಾರ್ಟ್‌ಮೆಂಟ್ ವಾಲ್ಕ್‌ವೇ, ಸ್ವಿಮ್ಮಿಂಗ್ ಪೂಲ್ ಇತ್ಯಾದಿಗಳಿಗೆ ಬಳಕೆ ಮಾಡಬಹುದಾಗಿದೆ.
ಈ ಟೈಲ್ಸ್‌ಗಳು ಸುಮಾರು 150 ಡಿಗ್ರಿ ಸೆಲ್ಸಿಯಸ್‌ವರೆಗಿನ ಉಷ್ಣಾಂಶವನ್ನು ಸಹಿಸಿಕೊಳ್ಳುತ್ತವೆ. ಬೆಂಕಿ ನಿರೋಧಕ ಮತ್ತು 35 ಟನ್‌ಗಳಷ್ಟು ಭಾರವನ್ನು ಹೊರಬಲ್ಲದು. ಬಹಳ ಮುಖ್ಯವಾಗಿ, ಇದು ಪುನರ್ ಬಳಕೆ ಮಾಡಬಹುದಾದ ಟೈಲ್ಸ್ ಆಗಿದೆ ಎಂದು ರಿ-ಟೈಲ್ ಪ್ರಾಜೆಕ್ಟ್‌ನ ಮುಖ್ಯಸ್ಥ ವಿ.ರಾಮ್ ಪ್ರಸಾದ್ ಹೇಳುತ್ತಾರೆ.
’ಸ್ವಚ್ಛ ರೀ-ಟೈಲ್ ರಿಸೈಕಲ್ಡ್ ಫ್ಲೋರ್ ಟೈಲ್ಸ್‌ಗಳನ್ನು, ರಿಸೈಕಲ್ಡ್ ಪಾಲಿಪ್ರೊಪಿಲೀನ್ (ಪಿಪಿ) ಸಾಮಗ್ರಿಗಳಿಂದ ತಯಾರಿಸಲಾಗಿದೆ ಮತ್ತು ವಿಶಿಷ್ಟ ಅಂತರ್ವರ್ಧಕ ಅಂಚಿನ ವಿನ್ಯಾಸವನ್ನು ಇದು ಒಳಗೊಂಡಿದ್ದು, ಇದರಿಂದಾಗಿ ತ್ವರಿತವಾದ ಮತ್ತು ಕಡಿಮೆ ವೆಚ್ಚದ, ರಂಧ್ರಗಳಿಲ್ಲದ, ಹೊಂದಿಕೊಳ್ಳುವ ಮತ್ತು ಬಾಳಿಕೆ ಬರುವ ಟೈಲ್ಸ್ ಆಗಿ ಇದು ಹೊರಹೊಮ್ಮಿದೆ. ಭಾರೀ ಟ್ರಾಫಿಕ್ ಮತ್ತು ಪಾದಚಾರಿಗಕ್ನಿರಂತರ ಸಂಚಾರದ ಹೊರತಾಗಿಯೂ ಇದರ ಅಂಚುಗಳು ಸ್ಥಿರವಾಗಿರುತ್ತವೆ. ಕನಿಷ್ಠ ರಿಪೇರಿಯೊಂದಿಗೆ ಹಾನಿಗೊಳಗಾದ ಟೈಲ್ಸ್‌ಗಳನ್ನು ತೆಗೆದು ಹೊಸದನ್ನು ಜೋಡಿಬಹುದಾಗಿದೆ’ಎಂದು ಅವರು ಹೇಳುತ್ತಾರೆ.
ಎಲ್ಲದಕ್ಕೂ ಮಿಗಿಲಾಗಿ, ಈ ಟೈಲ್ಸ್ ಮಳೆಕೊಯ್ಲು ಸಾಮರ್ಥ್ಯವನ್ನು ಹೊಂದಿದ್ದು, ವಾಟರ್ ಪ್ರೂಫ್ ಆಗಿದೆ. ಅಲ್ಲದೇ, ಗ್ರಾಹಕರ ನಿರೀಕ್ಷೆಯಂತೆ ವಿವಿಧ ವಿನ್ಯಾಸ ಮತ್ತು ಬಣ್ಣಗಳಲ್ಲಿ ಇದು ಲಭ್ಯವಾಗಲಿದೆ ಎಂದಿದ್ದಾರೆ.
ಇದುವರೆಗೆ ಈ ಟೈಲ್ಸ್‌ಗಳ ಮಾರಟಕ್ಕಾಗಿ ಯಾವುದೇ ವ್ಯಾಪಾರಿಗಳನ್ನು ಸಂಪರ್ಕ ಮಾಡಲಾಗಿಲ್ಲ, ಶೀಘ್ರದಲ್ಲೇ ಈ ನಿಟ್ಟಿನಲ್ಲಿ ಕಾರ್ಯೋನ್ಮುಖರಾಗಲಿದ್ದೇವೆ. 1 ಚದರ ಅಡಿಗೆ ರೂ.70-90 ದರ ಇಡುವ ಬಗ್ಗೆ ಚಿಂತನೆ ನಡೆಸಲಾಗಿದೆ. ಟೈಲ್ಸ್ ತಯಾರಿಕೆಗೆ ಬೇಕಾದ ಪ್ಲಾಸ್ಟಿಕ್‌ಗಳನ್ನೂ ಬಿಬಿಎಂಪಿಯಿಂದ ಸಂಗ್ರಹಿಸುತ್ತಿದ್ದೇವೆ ಎಂದಿದ್ದಾರೆ.
ಪ್ಲಾಸ್ಟಿಕ್ ತ್ಯಾಜ್ಯವನ್ನು ವ್ಯರ್ಥ ಮಾಡುವ ಬದಲು ಸ್ವಚ್ಛ ಇಕೋ ಸೊಲ್ಯೂಷನ್‌ಗೆ ನೀಡಿದರೆ ಅದನ್ನು ಅವರು ಉತ್ತಮ ರೀತಿಯಲ್ಲಿ ಬಳಕೆ ಮಾಡುತ್ತಾರೆ.
ಆಸಕ್ತಿವುಳ್ಳವರು +91 9900563918 ,rajesh@swachhaecosolutions.comಗೆ ಸಂಪರ್ಕಿಸಬಹುದಾಗಿದೆ.
Admin
ಸಮಾಜದ ಉತ್ತಮ ಸುದ್ದಿಗಳನ್ನು ನಾವು ನಿಮ್ಮ ಮುಂದಿಡುವ ಪ್ರಯತ್ನವನ್ನು ಮಾಡುತ್ತಿದ್ದೇವೆ. ಪ್ರೋತ್ಸಾಹಿಸಿ, ಸ್ವೀಕರಿಸಿ. ನೀವು ಸ್ವೀಕರಿಸಿದಾಗ ನಾವು ಬೆಳೆಯಬಹುದು. ಒಳ್ಳೆಯ ಸುದ್ದಿಗಳಿಗೆ ಸಮಾಜ ತೆರೆದುಕೊಂಡಿದೆ ತಲುಪಿಸುವವರು ನಾವಾಗಬಾರದೇಕೆ?
ನ್ಯೂಸ್ 13 ಸಮಾಜದ ಧನಾತ್ಮಕ ಸುದ್ದಿಗಳನ್ನು ಹಾಗೂ ರಾಷ್ಟ್ರೀಯ ವಿಚಾರಗಳನ್ನು ನಿಮಗೆ ತಲುಪಿಸುವ ಪ್ರಯತ್ನ ಮಾಡುತ್ತದೆ. ಈ ರೀತಿ ಇನ್ನಷ್ಟು ಉತ್ತಮ ಸುದ್ದಿಗಳನ್ನು ತಲುಪಿಸಲು ನಿಮ್ಮ ಸಹಕಾರವನ್ನು ಅಪೇಕ್ಷಿಸುತ್ತಿದ್ದೇವೆ. ಈ ಕಾರ್ಯದಲ್ಲಿ ನೀವೂ ನಮ್ಮೊಂದಿಗೆ ಜೊತೆಯಾಗಿ.
News13 strives to publish and promote positive news/happenings and nationalistic thoughts. Join hands with us in this constructive cause. We hope and expect your co-operation in this objective of broadcasting news that shall keep up with quality journalism.
