ಈ ’ಕ್ರಾಂತಿ ವನ’ದ ಪ್ರತಿ ಮರಗಳಲ್ಲೂ ಸ್ವಾತಂತ್ರ್ಯ ಸೇನಾನಿಗಳಿದ್ದಾರೆ

ಮುಂಬಯಿ: ನಾವೆಲ್ಲಾ ಸ್ವತಂತ್ರವಾಗಿ ಉಸಿರಾಡಲಿ ಎಂಬ ಕಾರಣಕ್ಕೆ ಬ್ರಿಟಿಷರೊಂದಿಗೆ ಹೋರಾಡಿ ಅಪ್ರತಿಮ ತ್ಯಾಗವನ್ನು ಮಾಡಿರುವ ಮಹಾನ್ ದೇಶಭಕ್ತರ ಹೆಸರಲ್ಲಿ ಮರ ನೆಟ್ಟು ಅವರನ್ನು ಸ್ಮರಣೆ ಮಾಡುವಂತಹ ಅಪೂರ್ವ ಕಾರ್ಯವನ್ನು ‘ಕ್ರಾಂತಿ ವನ’ದಲ್ಲಿ ಮಾಡಲಾಗುತ್ತಿದೆ.

ಮಹಾರಾಷ್ಟ್ರದ ಸಾಂಗ್ಲಿ ಗ್ರಾಮದ ಬಲ್ವಾಡಿ ಎಂಬ ಸಣ್ಣ ಗ್ರಾಮದಲ್ಲಿ ಈ ‘ಕ್ರಾಂತಿ ವನ’ ಇದೆ. ಇಲ್ಲಿನ ಪ್ರತಿಯೊಂದು ಮರಕ್ಕೂ ಸ್ವಾತಂತ್ರ್ಯ ವೀರರ ಹೆಸರುಗಳನ್ನು ಇಡಲಾಗಿದೆ. 77 ವರ್ಷದ ಸಂಪತ್ ರಾವ್ ಪವಾರ್ ಈ ಕ್ರಾಂತಿ ವನದ ನಿರ್ಮಾತೃ ಆಗಿದ್ದಾರೆ.

‘ಕ್ರಾಂತಿ ವನ’ ಹುತಾತ್ಮರಿಗೆ ಜೀವಂತ ಸ್ಮಾರಕವಾಗಿದೆ, ಹುತಾತ್ಮರು ಎಂದಿಗೂ ಸಾವನ್ನಪ್ಪುವುದಿಲ್ಲ’ ಎನ್ನುವ ಸಂಪತ್ ರಾವ್, ಈ ಜೀವಂತ ಸ್ಮಾರಕವನ್ನು ಸ್ಥಾಪನೆ ಮಾಡಲು 36 ವರ್ಷಗಳನ್ನು ತೆಗೆದುಕೊಂಡಿದ್ದಾರೆ. 1992ರ ಕ್ವಿಟ್ ಇಂಡಿಯಾ ಚಳುವಳಿಯ ದಿನದಂದು ಅವರು ಈ ಕಾರ್ಯ ಆರಂಭಿಸಿದ್ದರು, ಇಂದು 700 ಮರಗಳು 700 ಹುತಾತ್ಮರ ಹೆಸರುಗಳನ್ನು ಪಡೆದುಕೊಂಡಿದೆ.

ಮಂಗಲ್ ಪಾಂಡೆ, ಚಂದ್ರಶೇಖರ್ ಆಜಾದ್, ಭಗತ್ ಸಿಂಗ್, ಗಾಂಧೀಜಿ, ಸುಭಾಷ್ ಚಂದ್ರ ಬೋಸ್ ಸೇರಿದಂತೆ ಬಹುತೇಕ ಹುತಾತ್ಮರು ಈ ಮರಗಳ ಮೂಲಕ ಈ ಕ್ರಾಂತಿ ವನದಲ್ಲಿ ಜೀವಂತವಾಗಿದ್ದಾರೆ.

ತಮ್ಮ ಕುಟುಂಬಕ್ಕೆ ಜೀವನಾಧಾರವಾಗಿದ್ದ ಕಬ್ಬು ಬೆಳೆಯುವ ಭೂಮಿಯಲ್ಲಿ ಅವರು ಈ ಮರಗಳನ್ನು ನೆಟ್ಟಿದ್ದಾರೆ, ಈ ಮರಗಳಿಗಾಗಿ ಬಾವಿ ತೋಡುವಾಗ ಮಗನನ್ನು ಕಳೆದುಕೊಂಡಿದ್ದಾರೆ. ಇದರಿಂದ ಕುಟುಂಬದವರ, ಗ್ರಾಮಸ್ಥರ ಟೀಕೆಗಳನ್ನು ಕೇಳ ಬೇಕಾಗಿ ಬಂದಿತ್ತು. ಆದರೂ ಎದೆಗುಂದದೆ ಕಾರ್ಯವನ್ನು ಮುಂದುವರೆಸಿ ಇಂದು ಎಲ್ಲರಿಗೂ ಆದರ್ಶಪ್ರಾಯರಾಗಿದ್ದಾರೆ. ಇವರು ನಿರ್ಮಿಸಿರುವ ಕ್ರಾಂತಿವನವನ್ನು ನೋಡುವುದಕ್ಕೆಂದೇ ಶಾಲಾ ಮಕ್ಕಳು, ದೂರದ ಊರಿನ ಜನರು ಇಲ್ಲಿಗೆ ಬರುತ್ತಿರುತ್ತಾರೆ.