ಸಾತ್ವಿಕತೆಯಿಂದ ದೇವರೊಂದಿಗೆ ಸಂಪರ್ಕ ಸಾಧಿಸಿ: ಹೆಗ್ಗಡೆ

ಬೆಳ್ತಂಗಡಿ: ಸಾತ್ವಿಕತೆಯಿಂದ ದೇವರೊಂದಿಗೆ ಸಂಪರ್ಕ ಸಾಧಿಸಬೇಕೇ ಹೊರತು ಹಿಂಸೆಯಿಂದಲ್ಲ ಎಂದು ಧರ್ಮಸ್ಥಳ ಧರ್ಮಾಧಿಕಾರಿ ಡಾ. ವೀರೇಂದ್ರ ಹೆಗ್ಗಡೆ ನುಡಿದರು.

ಅವರು ಶನಿವಾರ ರಾತ್ರೆ ಸುರ್ಯ ಶ್ರೀ ಸದಾಶಿವರುದ್ರ ದೇವಸ್ಥಾನದ ಅಷ್ಟಬಂಧ ಬ್ರಹ್ಮಕಲಶೋತ್ಸವದ ಸಂದರ್ಭ ನಡೆದ ಧಾರ್ಮಿಕ ಸಭೆಯ ಅಧ್ಯಕ್ಷತೆ ವಹಿಸಿ ಮಾತನಾಡಿದರು.

ಅನ್ಯಾಯ, ಅಧರ್ಮಕ್ಕೆ ಶಿಕ್ಷೆ ಖಂಡಿತ. ಭಕ್ತಿಯ ಪೂಜೆ, ಪ್ರಾರ್ಥನೆಗೆ ವಿಶೇಷ ಶಕ್ತಿಯಿದ್ದು ಅದರಿಂದ ಸತ್ಫಲ ಸಿಗುತ್ತದೆ. ದೇಗುಲಗಳಲ್ಲಿ ಪಾವಿತ್ರ್ಯತೆ ಇದ್ದರೆ ಸಾನಿಧ್ಯ ವೃದ್ಧಿಯಾಗುತ್ತದೆ. ಸುರ್ಯದಲ್ಲಂತೂ ವಿಶೇಷ ಸಾನಿಧ್ಯ ವೃದ್ಧಿ ಆಗಿದೆ ಎಂದರು.

ರಾಜ್ಯ ಕ್ರೀಡಾ ಸಚಿವ ಅಭಯಚಂದ್ರ ಜೈನ್ ಅವರು ಕಷ್ಟಗಳ ನಿವಾರಣೆಗೆ ದೇವಸ್ಥಾನಗಳು ಸಹಕಾರಿ. ನಾವು ನಿರಂತರವಾಗಿ ದೇಗುಲಗಳಿಗೆ ಭೇಟಿಯಿತ್ತಲ್ಲಿ ನಮ್ಮಲ್ಲಿನ ಶ್ರದ್ಧಾ, ಭಕ್ತಿಗಳು ಇಮ್ಮಡಿಯಾಗುತ್ತವೆ ಎಂದರು.

ಜಿಲ್ಲಾ ಉಸ್ತುವಾರಿ ಸಚಿವ ಬಿ.ರಮಾನಾಥ ರೈ ಅವರು ಮನುಷ್ಯರನ್ನು ಪ್ರೀತಿಸದವ ದೇವರನ್ನು ಪ್ರೀತಿಸಲು ಅಸಮರ್ಥ. ಮನಸ್ಸಿನ ಶುದ್ಧೀಕರಣವಾದಲ್ಲಿ ಸಮಾಜ ಸ್ವಸ್ಥವಾಗುತ್ತದೆ ಎಂದ ಅವರು ಇಂದು ಪತ್ರಿಕೆಗಳಲ್ಲಿ ಒಂದು ಪುಟದಲ್ಲಿ ದೇವರು, ಧರ್ಮದ ಬಗ್ಗೆ ಲೇಖನಗಳಿದ್ದರೆ ಇನ್ನೊಂದು ಬದಿಯಲ್ಲಿ ಅಪರಾಧ ಸುದ್ದಿಗಳು ವಿಜೃಂಭಿಸುತ್ತವೆ ಎಂದು ವಿಷಾದಿಸಿದರು.

ವೇದಿಕೆಯಲ್ಲಿ ಬ್ರಹ್ಮಕಲಶೋತ್ಸವ ಸಮಿತಿ ಅಧ್ಯಕ್ಷ ಯು. ವಿಜಯರಾಘವ ಪಡ್ವೆಟ್ನಾಯ, ಜಿ.ಪಂ.ಸದಸ್ಯ ಶೈಲೇಶ್‌ಕುಮಾರ್ ಕುರ್ತೋಡಿ, ನಡ ಗ್ರಾ.ಪಂ.ಅಧ್ಯಕ್ಷ ಪ್ರವೀಣ್ ವಿ.ಜಿ., ದೇವಳದ ಅನುವಂಶೀಯ ಆಡಳಿತ ಮೊಕ್ತೇಸರ ಸುಭಾಶ್ಚಂದ್ರ ಸುರ್ಯಗುತ್ತು ಇದ್ದರು.

ಬ್ರಹ್ಮಕಲಶೋತ್ಸವದ ನೇತೃತ್ವ ವಹಿಸಿದ್ದ ಆಲಂಪಾಡಿ ಶ್ರೀ ಪದ್ಮನಾಭ ತಂತ್ರಿಗಳನ್ನು ಡಾ. ಹೆಗ್ಗಡೆ ಸಮ್ಮಾನಿಸಿದರು. ಸಚಿವದ್ವಯರನ್ನು ಗೌರವಿಸಲಾಯಿತು.

ಬ್ರಹ್ಮಕಲಶೋತ್ಸವ ಸಮಿತಿ ಪ್ರಧಾನ ಕೋಶಾಧಿಕಾರಿ ಸತೀಶ್ಚಂದ್ರ ಸುರ್ಯಗುತ್ತು ಸ್ವಾಗತಿಸಿದರು. ಕಾರ್ಯಾಧ್ಯಕ್ಷ ಬಿ.ರಾಜಶೇಖರ ಅಜ್ರಿ ಪ್ರಸ್ತಾವಿಸಿದರು. ಪ್ರಧಾನ ಕಾರ್ಯದರ್ಶಿ ಬಿ.ಮುನಿರಾಜ ಅಜ್ರಿ ಬೊಳಿಯೆಂಜಿ ವಂದಿಸಿದರು. ಡಾ. ಪ್ರದೀಪ್ ಕಾರ್ಯಕ್ರಮ ನಿರ್ವಹಿಸಿದರು.