ಅಂತರ್‌ಕಾಲೇಜು ಪಂದ್ಯಗಳಲ್ಲಿ ಶಾರದಾ ಕಾಲೇಜಿನ ದಾಖಲೆ

ವಾಲಿಬಾಲ್ ಕ್ರೀಡಾಳುಗಳಿಗೆ ವಾರ್ಷಿಕ ಅಭಿನಂದನೆ

ಮಂಗಳೂರು :  ಜಾಗತಿಕ ಕ್ರೀಡಾಕ್ಷೇತ್ರಕ್ಕೆ ಭಾರತೀಯ ಆಟಗಾರರ ಕೊಡುಗೆ ಅಸಾಧಾರಣವಾದುದು. ಅದರಲ್ಲೂ ತುಳುವರ ಕೊಡುಗೆ ಸಾಮಾನ್ಯವೇನಲ್ಲ. ವಾಸ್ತವಿಕ ಶಿಕ್ಷಣದೊಂದಿಗೆ ಕ್ರೀಡಾಕ್ಷೇತ್ರಕ್ಕೆ ಸಮಾನ ಸ್ಥಾನಮಾನ ಕೊಡುತ್ತಾ ಬಂದಿರುವ ನಗರದ ಶಾರದಾ ಕಾಲೇಜು ಮೌಲ್ಯಧಾರಿತ ಶಿಕ್ಷಣ ಕ್ರಮಕ್ಕೆ ಮಾದರಿಯಾಗಿದೆ. ವಾಲಿಬಾಲ್ ಪಂದ್ಯಾಟದಲ್ಲಿ ಹನ್ನೆರಡು ವರ್ಷಗಳಿಂದ ಸತತವಾಗಿ ಗೆಲುವನ್ನು ಸಾಧಿಸುತ್ತಾ ಬಂದಿರುವ ಆಳ್ವಾಸ್ ಕ್ರೀಡಾರ್ಥಿಗಳನ್ನು ಸೋಲಿಸುವುದು ಸುಲಭದ ಮಾತೇನಲ್ಲ. ಇತ್ತೀಚಿನ ದಿನಗಳಲ್ಲಿ ಸತತವಾಗಿ ವಿಜಯಧ್ವಜವನ್ನು ತನ್ನ ಮುಡಿಗಿರಿಸಿಕೊಂಡು ಕ್ರೀಡಾ ಜಗತ್ತಿನಲ್ಲಿ ದಾಪುಗಾಲು ಹಾಕುತ್ತಿರುವ ಶಾರದಾ ಕಾಲೇಜಿನ ವಿದ್ಯಾರ್ಥಿಗಳು ಅಭಿನಂದನಾರ್ಹರು ಎಂದು ಶಿಕ್ಷಣ ತಜ್ಞ ಪ್ರೊ. ಎಂ.ಬಿ. ಪುರಾಣಿಕ್ ಅಭಿಪ್ರಾಯ ಪಟ್ಟರು.

ಅವರು ನಗರದ ಶಾರದಾ ಕಾಲೇಜು ಏರ್ಪಡಿಸಿದ ‘ವಾಲಿಬಾಲ್ ಕ್ರೀಡಾರ್ಥಿಗಳ ವಾರ್ಷಿಕ ಅಭಿನಂದನಾ’ ಕಾರ್ಯಕ್ರಮದಲ್ಲಿ ಮಾತಾನಾಡಿದರು. ಕಾರ್ಯಕ್ರಮದಲ್ಲಿ – ‘ಕ್ರೀಡಾಭಾರತಿ’ಯವರು ಆಯೋಜಿಸಿದ್ದ ಅಂತರ್‌ಕಾಲೇಜು ಮಟ್ಟದ ವಾಲಿಬಾಲ್ ಪಂದ್ಯಾಟದಲ್ಲಿ ಮತ್ತು ಸಂತ ಅಲೋಸಿಯಸ್ ಕಾಲೇಜು ಆಯೋಜಿಸಿದ್ದ ಅಂತರ್‌ಕಾಲೇಜು ಮಟ್ಟದ ವಾಲಿಬಾಲ್ ಪಂದ್ಯಾಟದಲ್ಲಿ ಪ್ರಥಮ ಬಹುಮಾನ, ಎಮ್.ಉ.ಐ.ಸಿ ಪುರುಷರ ವಾಲಿಬಾಲ್ ಪಂದ್ಯಾಟದಲ್ಲಿ ದ್ವಿತೀಯ ಬಹುಮಾನ, ಮಂಗಳೂರು ವಿಶ್ವ ವಿದ್ಯಾನಿಲಯ ಮಟ್ಟದ ಪ್ರಾಂತೀಯ ಪಂದ್ಯಾಟದಲ್ಲಿ ದ್ವಿತೀಯ ಹಾಗೂ ಮಂಗಳೂರು ವಿಶ್ವ ವಿದ್ಯಾನಿಲಯ ಆಯೋಜಿಸಿದ್ದ ’ಕ್ಯಾಂಪಸ್ ಟ್ರೋಪಿ-2018’ ರಲ್ಲಿ ಪ್ರಥಮ ಬಹುಮಾನ ಪಡೆದ ಶಾರದಾ ಕಾಲೇಜಿನ ಕ್ರೀಡಾ ವಿದ್ಯಾರ್ಥಿಗಳನ್ನು ಅಭಿನಂದಿಸಲಾಯಿತು.

ಕಾರ್ಯಕ್ರಮದಲ್ಲಿ ಕಾಲೇಜಿನ ಪ್ರಾಂಶುಪಾಲ ’ಅಷ್ಟಾವದಾನಿ’ ಡಾ. ಕಬ್ಬಿನಾಲೆ ಬಾಲಕೃಷ್ಣ ಭಾರದ್ವಾಜ್ ಶುಭ ಹಾರೈಸಿದರು. ವೇದಿಕೆಯಲ್ಲಿ ಕಾಲೇಜಿನ ಉಪಪ್ರಾಂಶುಪಾಲ ಪ್ರೊ. ಮಾಧವ ಕೆ. ದೈಹಿಕ ತರಬೇತುದಾರ ಶ್ರೀ ಸುಧಾಕರ ಶೆಟ್ಟಿ. ಉಪನ್ಯಾಸಕ ಶ್ರೀ. ಅಶ್ವತ್ ಡಿ. ಪೂಜಾರಿ ಉಪಸ್ಥಿತರಿದ್ದರು. ವಿದ್ಯಾರ್ಥಿಗಳಾದ ಮನುರಾಜ್ ಎಸ್. ಶೆಟ್ಟಿ ಸ್ವಾಗತಿಸಿದರು. ನಿಶಾಂತ್‌ರಾಜ್ ವಂದಿಸಿದರು. ಮಧುವಂತ್ ನಿರೂಪಿಸಿದರು.