ಸ್ವರನಮನ ಕಾರ್ಯಕ್ರಮ

ಧಾರವಾಡ : ಪಂಡಿತ ಪಂಚಾಕ್ಷರಿಸ್ವಾಮಿ ಮತ್ತಿಗಟ್ಟಿಯವರು ಶ್ರೇಷ್ಠ ಸಂಗೀತ ಕಲಾವಿದರು. ಅವರಿಗೆ ಹೆಚ್ಚಿನ ಪುರಸ್ಕಾರ, ಪ್ರಶಸ್ತಿಗಳು ಸಿಗದಿರುವುದು ವಿಶಾದಕರ ಎಂದು ಮಾಜಿ ಶಾಸಕರಾದ ಸನ್ಮಾನ್ಯ ಶ್ರೀ ಚಂದ್ರಕಾಂತ ಬೆಲ್ಲದ ಅವರು ನುಡಿದರು. ಅವರು ಸ್ವರ ಸಾಮ್ರಾಟ ಹಾಗೂ ಜೈಪೂರ -ಅತ್ರೌಲಿ ಘರಾಣೆಯ ಅದ್ವಿತೀಯ ಗಾಯಕರಾದ ಪಂಡಿತ ಪಂಚಾಕ್ಷರಿಸ್ವಾಮಿ ಮತ್ತಿಗಟ್ಟಿಯವರ ನಾಲ್ಕನೇಯ ಸ್ವರನಮನ ಕಾರ್ಯಕ್ರಮವನ್ನು ಉದ್ಘಾಟಿಸಿ ಮಾತನಾಡಿದ ಅವರು ಮುಂದಿನ ದಿನಗಳಲ್ಲಿ ಸಂಗೀತವನ್ನು ಉಳಿಸಿ ಬೆಳೆಸುವ ಕಾರ್ಯ ನಡೆಯಬೇಕೆಂದು ನುಡಿದರು.

ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ ಶ್ರೀ ಶಂಕರ ಕುಂಬಿ ಅವರು ಮಾತನಾಡಿ, ಮತ್ತಿಗಟ್ಟಿಯವರ ಶಿಷ್ಯರು ಗುರುಗಳ ಸ್ಮರಣೆಯನ್ನು ಆಚರಿಸಿ ಆ ಮೂಲಕ ಜೈಪೂರ ಅತ್ರೌಲಿ ಘರಾಣೆಯ ಪರಂಪರೆಯನ್ನು ಪ್ರಚಾರ- ಪ್ರಸಾರ ಮಾಡುತ್ತಿರುವುದು ಶ್ಲ್ಯಾಘನೀಯ ಎಂದು ನುಡಿದರು.

ಅತಿಥಿಗಳನ್ನು ಸ್ವಾಗತಿಸಿ ಪ್ರಾಸ್ತಾವಿಕವಾಗಿ ಮಾತನಾಡಿದ ಉಪನ್ಯಾಸಕರಾದ ಶ್ರೀ ಉಮೇಶ ಮುನವಳ್ಳಿಯವರು ಮಾತನಾಡಿ, ದೇಶದ ಉತ್ಕೃಷ್ಥ ಗಾಯಕರಲ್ಲಿ ಒಬ್ಬರೆನಿಸಿದ ಮತ್ತಿಗಟ್ಟಿ ಅವರು ಅನೇಕ ಶಿಷ್ಯ ವೃಂದವನ್ನು ಬೆಳೆಸಿದ ಕೀರ್ತಿ ಅವರಿಗೆ ಸಲ್ಲುತ್ತದೆ. ತಮ್ಮ ಎಪ್ಪತ್ತರ ಇಳಿವಯಸ್ಸಿನಲ್ಲೂ ಕೊಲ್ಹಾಪುರಕ್ಕೆ ಹೋಗಿ ಬಂದಿಶ್ ಕಲಿತು ಬರುವ ಅವರ ಸಂಗೀತ ಆಸಕ್ತಿ ಯುವಕರಿಗೆ ಸ್ಪೂರ್ತಿದಾಯಕ ಎಂದು ನುಡಿದರು.

ನಂತರ ನಡೆದ ಸಂಗೀತ ಕಾರ್ಯಕ್ರಮದಲ್ಲಿ ಶ್ರೀಮತಿ ಡಾ.ಮುಕ್ತಾ ಮುಜುಮದಾರ ರಾಗ ನಂದ ಹಾಗೂ ಪೀಲು ಠುಮರಿ ಪ್ರಸ್ತುತಪಡಿಸಿದರು. ಶ್ರೀ ಉಮೇಶ ಮುನವಳ್ಳಿಯವರು ರಾಗ ಬಿಹಾಗ ಹಾಗೂ ಹಿಂದಿ ಭಜನ್ ಪ್ರಸ್ತುತಪಡಿಸಿದರು. ಶ್ರೀಮತಿ ಸರಳಾ ದೇಸಾಯಿ ತಮ್ಮ ಗಾಯನದಲ್ಲಿ ರಾಗ ಶಾಮ್ ಕಲ್ಯಾಣ ಹಾಗೂ ಖಮಾಜ್ ಠುಮರಿ ಪ್ರಸ್ತುತಪಡಿಸಿದರೆ ಕೊನೆಯಲ್ಲಿ ಪಂಡಿತ ಬಿ.ಎಸ್. ಮಠ ಹಾಗೂ ಅಕ್ಕಮಹಾದೇವಿ ಮಠ ತಮ್ಮ ದ್ವಂದ್ವ ವಾಯಲಿನ್ ವಾದನದಲ್ಲಿ ರಾಗ ಹಂಸಧ್ವನಿ ಹಾಗೂ ಭೈರವಿ ಧುನ್ ನುಡಿಸಿದರು.

ಶ್ರೀಮತಿ ಮುಕ್ತಾ ಮುಜುಮದಾರ ವಂದಿಸಿದರು, ಕುಮಾರಿ ಅಮೃತಾ ಕಾರ್ಯಕ್ರಮ ನಿರೂಪಿಸಿದರು.