ಹಾಲು ಕರೆಯುತ್ತಿದ್ದ ಸಿಕ್ಕಿಂ ಯುವತಿಯರು ಚಾಂಪಿಯನ್‌ಗಳಾದರು

ದೇಶದ ಹಲವಾರು ಕ್ರೀಡಾಪಟುಗಳ ವಿಶೇಷ ಯಶೋಗಾಥೆಗಳನ್ನು ನಾವು ಕೇಳಿದ್ದೇವೆ. ಇವುಗಳು ನಮಗೆ ಸ್ಫೂರ್ತಿ, ಪ್ರೇರಣೆಗಳನ್ನು ನೀಡುತ್ತವೆ. ಅದೇ ರೀತಿ ಸಿಕ್ಕಿಂನ ಬಾಸ್ಕೆಟ್ ಬಾಲ್ ತಂಡದ ಕಥೆ ಕ್ರೀಡಾ ಪ್ರೇರಣೆ ಮಾತ್ರವಲ್ಲ ಜೀವನೋತ್ಸಾಹವನ್ನೂ ನೀಡುತ್ತದೆ.

ಈ ತಂಡದಲ್ಲಿ ಇರುವವರೆಲ್ಲಾ ಬಡ ಕುಟುಂಬದ ಯುವ ತರುಣಿಯರೇ. ಬಹುತೇಕರು ಬದುಕನ್ನು ಗೋವುಗಳನ್ನು ಸಾಕುತ್ತಾ, ಹಾಲು ಕರೆಯುತ್ತಾ ಕಳೆದವರು. ಆದರೆ ಶಾಲಾ ಪ್ರಾಂಶುಪಾಲರೊಬ್ಬರು ಇವರ ಜೀವನದ ದಿಕ್ಕನ್ನೇ ಬದಲಿಸಿಬಿಟ್ಟರು. ಹೀಗಾಗಿ ಇವರಿಂದು ಬಾಸ್ಕೆಟ್ ಬಾಲ್ ಚಾಂಪಿಯನ್ಸ್ ಎಂಬ ಖ್ಯಾತಿ ಗಳಿಸಿದ್ದಾರೆ.

ಏಕಲವ್ಯ ಮಾಡೆಲ್ ರೆಸಿಡೆನ್ಸಿಯಲ್ ಸ್ಕೂಲ್‌ನ ಪ್ರಾಂಶುಪಾಲ ಯಾನ್‌ಝೋನ್ ಅವರು ತಮ್ಮ ಶಾಲೆಯಲ್ಲಿ ಮೂಲಸೌಕರ್ಯದ ಕೊರತೆಯಿದ್ದರೂ ಈ ತರುಣಿಯರಿಗೆ ಬಾಸ್ಕೆಟ್ ಬಾಲ್ ಆಡುವಂತೆ ಪ್ರೇರೇಪಿಸಿ, ಅವರಿಗೆ ಉಚಿತವಾಗಿ ತರಬೇತಿ ದೊರೆಕಿಸಿಕೊಟ್ಟರು. ಮನೆಯಲ್ಲಿನ ಎಲ್ಲಾ ತೊಂದರೆಗಳನ್ನು ಮೆಟ್ಟಿನಿಂತು ಈ ಹುಡುಗಿಯರು ಬಾಸ್ಕೆಟ್ ಬಾಲ್‌ನತ್ತ ಆಕರ್ಷಿತರಾದರು, ಎಷ್ಟರ ಮಟ್ಟಿಗೆ ಎಂದರೆ ತಾವೇ ಸ್ವತಃ ಸಿಮೆಂಟ್, ಕಲ್ಲು ಹಾಕಿ ಕೋರ್ಟ್ ನಿರ್ಮಿಸಿದರು. ಕಷ್ಟಪಟ್ಟು ಅಭ್ಯಾಸ ನಡೆಸಿದರು.

ಒಂದು ದಿನ ಈ ಯುವತಿಯರ ಪ್ರಯತ್ನಕ್ಕೆ ಫಲ ಸಿಕ್ಕಿತು. 2011ರಲ್ಲಿ ನ್ಯಾಷನಲ್ ಚಾಂಪಿಯನ್‌ಶಿಪ್‌ನ್ನು ಇವರ ಶಾಲಾ ತಂಡ ಗೆದ್ದುಕೊಂಡಿತು. ತಂಡದ ನಿಮ ದೋಮ ಭುಟಿಯಾ ಮೋಷ್ಟ್ ವ್ಯಾಲ್ಯುವೇಬಲ್ ಪ್ರಶಸ್ತಿ ಪಡೆದುಕೊಂಡರು.

ಅವರ ರಾಷ್ಟ್ರಮಟ್ಟದ ಈ ಸಾಧನೆ ಸಿಕ್ಕಿಂನ ಬಾಸ್ಕೆಟ್ ಬಾಲ್ ಫೆಡರೇಶನನ್ನು ಆಶ್ಚರ್ಯಚಕಿತಗೊಳಿಸಿತು. ತನ್ನೆಲ್ಲಾ ಸಹಕಾರವನ್ನು ಯುವತಿಯರಿಗೆ ನೀಡಿತು. ಇದರ ಫಲವಾಗಿ ಈ ತಂಡ 2013ರಲ್ಲೂ ನ್ಯಾಷನಲ್ ಚಾಂಪಿಯನ್‌ಶಿಪ್‌ನ್ನು ತನ್ನದಾಗಿಸಿಕೊಂಡಿತು.

ಈಶಾನ್ಯ ಭಾಗದಲ್ಲಿ ನಿರಂತರವಾಗಿ ಈ ತಂಡ ತನ್ನ ಛಾಪನ್ನು ಮೂಡಿಸುತ್ತಾ ಬಂದಿದೆ. ದನ ಕರೆಯುತ್ತಾ, ಹಾಲು ಮಾರಿ ಬದುಕು ಸಾಗಿಸುವ ಕುಟುಂಬದ ಯುವತಿಯರು ಚಾಂಪಿಯನ್‌ಗಳಾಗಿ ಮೆರೆದ ಕಥೆ ನಿಜಕ್ಕೂ ಜೀನದಲ್ಲಿ ಏನಾದರು ಸಾಧಿಸಬೇಕೆಂಬ ಛಲವನ್ನು ಎಲ್ಲರಿಗೂ ನೀಡುತ್ತದೆ.