’ಸಾಕಪ್ಪೋ ಸಂಸಾರ’ವೆಂದ ಆರು ವರ್ಷದ ಬಾಲಕಿ

ಹುಬ್ಬಳ್ಳಿ: ಭಂಡ ಬದುಕಿನ ಮರ್ಮ ಅರಿಯುವ ಮುನ್ನವೇ ’ಸಾಕಪ್ಪೋ ಸಂಸಾರ’ ನಾಟಕಕ್ಕೆ ಬಣ್ಣ ಹಚ್ಚಿಸಿಕೊಂಡು, ಭೇಷ್ ಎನಿಸಿಕೊಂಡ ಬಾಲ ಕಲಾವಿದೆಗೆ ಆಗಿನ್ನೂ ಆರು ವರ್ಷ. ರಂಗಭೂಮಿಯನ್ನು ವೈಭವಯುತವಾಗಿ ಮೆರೆಸಿದ ಶಿರಹಟ್ಟಿ ವೆಂಕೋಭರಾಯರ ಮೊಮ್ಮಗಳು ಅವಳು. ರಂಗ ಪ್ರಪಂಚದ ಕುಸುಮಕ್ಕೆ ಅವಳೊಂದು ಪರಿಮಳ.

ಕರ್ನಾಟಕದ ಷೇಕ್ಸ್‌ಪಿಯರ್ ಎಂದೇ ಖ್ಯಾತರಾದ ದಿ.ಕಂದಗಲ್ ಹಣಮಂತರಾಯರ ರಕ್ತರಾತ್ರಿ, ಸತ್ಯ ಸತ್ತಿತು, ಜಗಜ್ಯೋತಿ ಬಸವೇಶ್ವರ, ಛತ್ರಪತಿ ಶಿವಾಜಿ, ಗೌಡರ ಗಂಗಿ ಮುಂತಾದ ಸಾವಿರಾರು ನಾಟಕಗಳಲ್ಲಿ ಬಣ್ಣ ಹಚ್ಚಿದ ರಂಗ ಕಲಾವಿದೆ ಪರಿಮಳಾ ಕಲಾವಂತ ತಮ್ಮ ಮನೋಜ್ಞ ಅಭಿನಯದಿಂದ ನಿಜಕ್ಕೂ ರಂಗಾಸಕ್ತರ ಮನಸೂರೆಗೊಂಡ ರಂಗನಾಯಕಿ.

ಶಿರಹಟ್ಟಿಯ ಉಮಾ ಮಹೇಶ್ವರ ನಾಟ್ಯ ಸಂಘ, ಗುಡಗೇರಿಯ ಸಂಗಮೇಶ್ವರ ನಾಟ್ಯ ಸಂಘ, ದಾವಣಗೆರೆಯ ಕೆಬಿಆರ್ ಕಂಪೆನಿ, ಮಂಡಲಗಿರಿಯ ಶ್ರೀ ಗುರು ತೋಂಟದಾರ್ಯ ನಾಟ್ಯ ಸಂಘ, ಬೆಂಗಳೂರಿನ ಜಿ.ವಿ.ಕೃಷ್ಣ ಮಿತ್ರ ಮಂಡಳಿ ಮುಂತಾದ ಕಂಪನಿಗಳಲ್ಲಿ ಹಾಗೂ ಅಮೆಚ್ಯೂರ್ ನಾಟಕಗಳಲ್ಲಿ 4 ದಶಕಗಳಿಂದ ರಂಗಸೇವೆ ಸಲ್ಲಿಸುತ್ತಿರುವ ಪರಿಮಳ ಬಹುದೊಡ್ಡ ಕಲಾವಿದೆ.

ಹವ್ಯಾಸಿ ರಂಗ ತಂಡಗಳೊಂದಿಗೆ ಜೋಕುಮಾರ ಸ್ವಾಮಿ, ಹಯವದನ, ಪುರುಷ, ಇತಿಹಾಸ ಚಕ್ರ, ಹಿಟ್ಟಿನ ಹುಂಜ ಬೇಲಿ ಮತ್ತು ಹೊಲ ಹೀಗೆ ಅನೇಕ ಅಸಂಗತ ನಾಟಕಗಳಲ್ಲಿ ಅಭಿನಯಿಸಿದ ಹಿರಿಮೆ ಹೊಂದಿರುವ ಇವರು, ಧಾರವಾಡದ ಆಕಾಶವಾಣಿ ನಿಲಯದಲ್ಲಿ, ಕಳೆದ 30 ವರ್ಷಗಳಿಂದ ಬಿ.ಹೈ ಗ್ರೇಡ್ ಕಲಾವಿದೆಯಾಗಿ ಗುರುತಿಸಿಕೊಂಡು, ಅನೇಕ ರಂಗನಾಟಕಗಳನ್ನು ಆಕಾಶವಾಣಿಗೆ ನಿರ್ದೇಶಿಸುವಲ್ಲಿ ಮಹತ್ತರ ಪಾತ್ರವಹಿಸಿರುವುದು, ಅವರು ರಂಗಭೂಮಿಯನ್ನು ಆರಾಧಿಸುವ ದ್ಯೋತಕ.

ತಮ್ಮ ವಿಶಿಷ್ಟ ಅಭಿನಯದಿಂದ ಕಿರುತೆರೆಯ ಕಣ್ಣಿಗೂ ಕಾಣಿಸಿದ ಪರಿಮಳ, ಮೂಡಲಮನೆ, ಮೌನ ಕ್ರಾಂತಿ, ಎಂಥಾ ಲೋಕವಯ್ಯ, ನಾಕು ತಂತಿ, ತಕಧಿಮಿತಾ, ಆ ಊರು ಈ ಊರು, ಇದ್ದರ ಇರಬೇಕು ನಿನ್ಹಂಗ ಮುಂತಾದ ಅನೇಕ ಧಾರಾವಾಹಿಗಳಲ್ಲಿ ಅಭಿನಯಿಸಿ ಅಸಂಖ್ಯ ಪ್ರೇಕ್ಷಕರ ಪ್ರಶಂಸೆಗೆ ಪಾತ್ರರಾದ ಇವರು, ಮೂಡಲಮನೆಯ ಭಾಮಾವೈನಿಯೆಂದೇ ಗುರುತಿಸಿಕೊಂಡವರು.

ಸರಿ ಸುಮಾರು 50ಕ್ಕೂ ಹೆಚ್ಚು ಸಿ.ಡಿ.ರಂಗನಾಟಕಗಳಲ್ಲಿ ಅಭಿನಯಿಸಿ, 80ಕ್ಕೂ ಹೆಚ್ಚು ನಾಟಕದ ಧ್ವನಿ ಸುರುಳಿಗಳ ನಿರ್ದೇಶಕಿಯಾಗಿ, 150ಕ್ಕೂ ಹೆಚ್ಚು ನಾಟಕದ ಧ್ವನಿ ಸುರುಳಿಗಳಿಗೆ ಧ್ವನಿ ದಾನಗೈದ ಅಪರೂಪದ ರಂಗ ಕಲಾವಿದೆ ಪರಿಮಳಾ.

ಮೈಸೂರು, ಬೆಂಗಳೂರು, ಬಳ್ಳಾರಿ, ಧಾರವಾಡ, ದೆಹಲಿ ಮುಂತಾದ ಕಡೆಗೆಲ್ಲ, ಇವರ ಅಭಿನಯ ಮೆಚ್ಚಿ ಸನ್ಮಾನಿಸಿ, ಪ್ರಮಾಣ ಪತ್ರ ಸಲ್ಲಿಸಿರುವುದು ಕಲಾವಿದೆಗೆ ಸಂದ ಗೌರವ.

ಉತ್ತರ ಕರ್ನಾಟಕ ರಂಗಭೂಮಿ ಕಲಾವಿದರ ಸಂಘದ ಕಾರ್ಯದರ್ಶಿಯಾಗಿ, ಶ್ರೀ ರಾಘವೇಂದ್ರ ಕೃಪಾಪೋಷಿತ ಸ್ತ್ರೀ ನಾಟಕ ಮಂಡಳಿಯ ಸಂಚಾಲಕಿಯಾಗಿ ಹಾಗೂ ಕರ್ನಾಟಕ ನಾಟಕ ಅಕಾಡಮಿಯ ಸದಸ್ಯರಾಗಿ ಸೇವೆ ಸಲ್ಲಿಸುತ್ತಿರುವ ಪರಿಮಳಾ ಕಲಾವಂತಗೆ, ಬಾಳ ಸಂಗಾತಿಯಾಗಿರುವ ಬಸವರಾಜ ತಿರ್ಲಾಪುರ ಕೂಡಾ ಅದ್ಭುತ ಅಭಿನಯದ ಹಿರಿಯ ಹೆಸರಾಂತ ಕಲಾವಿದ ಎಂಬುದು ವಿಶಿಷ್ಟ.