ಹಾಕಿ : ಗೆಲುವಿನ ನಗೆ ಬೀರಿದ ಆರ್‌ಡಬ್ಲುಎಫ್, ಎಸ್‌ಎಐ

ಧಾರವಾಡ: ರಾಜ್ಯ ಓಲಂಪಿಕ್ ಕ್ರೀಡಾಕೂಟದ ಮೊದಲ ದಿನ ಶುಕ್ರವಾರ ಕರ್ನಾಟಕ ವಿಶ್ವವಿದ್ಯಾಲಯ ಆವರಣದ ರಾಣಿ ಚೆನ್ನಮ್ಮ ಮೈದಾನದಲ್ಲಿ ನಡೆದ ಹಾಕಿ ಪಂದ್ಯಗಳಲ್ಲಿ ಆರ್‌ಡಬ್ಲುಎಫ್ (ರೇಲ್ ವ್ಹೀಲ್ ಫ್ಯಾಕ್ಟರಿ) ಹಾಗೂ ಎಸ್‌ಎಐ(ಸ್ಪೋರ್ಟ್ಸ್ ಅಥಾರಿಟಿ ಆಫ್ ಇಂಡಿಯಾ) ತಂಡ ಜಯ ಸಾಧಿಸಿದವು.

ರಾಜ್ಯಮಟ್ಟ 2ನೇ ವಿಭಾಗದಲ್ಲಿ ರನ್ನರ್ ಅಪ್ ಆಗಿ ಹೊರಹೊಮ್ಮಿದ್ದ ಆರ್‌ಡಬ್ಲುಎಫ್ , ಡಿಪಾರ್ಟ್‌ಮೆಂಟ್ ಆಫ್ ಯೂಥ್ ಎಂಪಾವರ್‌ಮೆಂಟ್ ಆಂಡ್ ಸ್ಪೋರ್ಟ್ಸ್ (ಡಿವೈಇಎಸ್)5-2 ಗೋಲುಗಳಿಂದ ಮಣಿಸುವ ಮೂಲಕ ಗೆಲುವಿನ ನಗೆ ಬೀರಿತು.

ಪಂದ್ಯದುದ್ದಕ್ಕೂ ಆರ್‌ಪಿಎಫ್‌ನವರೇ ಚೆಂಡಿನ ಮೇಲೆ ಸಂಪೂರ್ಣ ಹಿಡಿತ ಸಾಧಿಸಿದ್ದರು. ಇವರ ಪರವಾಗಿ ಉಮೇಶ, ಸುಶೀಲ್, ಜಯರಾಜ ತಲಾ ಒಂದೊಂದು ಹಾಗೂ ಕುಶಾ 2 ಗೋಲು ಬಾರಿಸುವ ಮೂಲಕ ಗೆಲುವಿಗೆ ಕಾರಣರಾದರು. ಡಿವೈಇಎಸ್ ಪರವಾಗಿ ದಿಶಾಂತ್ ಹಾಗೂ ರೋಹನ್ ಗೋಲು ಬಾರಿಸಿದ್ದರು. ದಿನದ ಹೀರೋ ಆಗಿ ಕುಶಾ ಮಿಂಚಿದರು.

ಗದಗ ತಂಡದ ವಿರುದ್ಧ ಗೆಲುವು
ಬಿ ಗುಂಪಿನಲ್ಲಿ ಎಸ್‌ಎಐ (ಸ್ಪೋರ್ಟ್ಸ್ ಅಥಾರಿಟಿ ಆಫ್ ಇಂಡಿಯಾ) ಜಾಗರೂಕವಾಗಿ ಆಡಿದ ಪರಿಣಾಮ ಗದಗಿನ ಹನುಮಾನ್ ಬ್ಲೆಸ್ಸಿಂಗ್ ಸ್ಪೋರ್ಟ್ಸ್ ಕ್ಲಬ್ನ ತಂಡವನ್ನು ಪರಾಭವಗೊಳಿಸಿತು.

ಪಂದ್ಯದ ಆರಂಭದ 11ನೇ ನಿಮಿಷಕ್ಕೆ ರಾಹಿಲ್ ಖಾತೆ ತೆರೆದರು. ಆದರೆ ಪೆನಾಲ್ಟಿ ಕಾರ್ನರ್‌ನ್ನು ಗೋಲಾಗಿ ಪರಿವರ್ತಿಸಿದ ಗದಗ ತಂಡದ ಹರೀಶ ಸಮ ಬಲ ಸಾಧಿಸುವಲ್ಲಿ ನೆರವಾದರು. ಆದರೂ 24 ನೇ ನಿಮಿಷದಲ್ಲಿ ಎಸ್‌ಎಐ ತಂಡದ ಅಬ್ರಾನ್ ಗೋಲು ಬಾರಿಸಿದರು. ಅದರಿಂದ ಎಸ್‌ಎಐ 2-1 ರ ಮುನ್ನಡೆ ಸಾಧಿಸಿತು. ನಂತರ ಗದಗ ತಂಡದ ಲೋಕೇಶ ಒಂದು ಗೋಲು ಬಾರಿಸಿದರು. ಆದರೆ ಮುಂದೆ ಸೋಮಯ್ಯ, ಮಚೈಯ್ಯಾ ಹಾಗೂ ರಹೀಲ್ ಅವರು ಮತ್ತೆ ಒಂದೊಂದು ಗೋಲು ಬಾರಿಸುವ ಮೂಲಕ ತಂಡವನ್ನು ಗೆಲುವಿನ ದಡ ಸೇರಿಸಿದರು.

ಮಹಿಳಾ ವಿಭಾಗ

ಮೈಸೂರಿನ ವುಮೆನ್ ಸ್ಪೋರ್ಟ್ಸ್ ಹಾಸ್ಟಲ್ ಬಳ್ಳಾರಿ ತಂಡದ ವಿರುದ್ಧ 10-1 ಗೋಲುಗಳ ಅಂತರದಿಂದ ಗೆಲುವು ಸಾಧಿಸಿತು. ಮೂರು ಗೋಲು ಬಾರಿಸಿದ ಕೋಮಲಾ ದಿನದ ಗೌರವಕ್ಕೆ ಪಾತ್ರರಾದರು. ಸಂಧ್ಯ-2. ರಂಜಿತಾ-2 ತನ್ಸುರಿ-2, ಭಾಗ್ಯಾ-2 ಹಾಗೂ ರೋಶಿನಿ 1 ಗೋಲು ಬಾರಿಸಿ ಭಾರಿ ಅಂತರದಿಂದ ವಿಜಯ ಸಾಧಿಸಲು ಕಾರಣರಾದರು. ಬಳ್ಳಾರಿ ತಂಡದ ಪರವಾಗಿ ಸಯೀದಾ ಎಂಬುವವರು ಒಂದು ಗೋಲನ್ನು ಹೊಡೆದಿದ್ದರು.