ಡಿ. 7 ರಿಂದ 14 ರವರೆಗೆ ಕಲಘಟಗಿಯಲ್ಲಿ ದತ್ತ ಜಯಂತಿ ಉತ್ಸವ

ಕಲಘಟಗಿ : ಕಲಘಟಗಿ ತಾಲೂಕಾ ಬ್ರಾಹ್ಮಣ ಸಂಘದ ವತಿಯಿಂದ ಡಿ. 7 ರಿಂದ 14 ರವರೆಗೆ ಶ್ರೀದತ್ತ ಜಯಂತಿ ಉತ್ಸವದ ಕಾರ್ಯಕ್ರಮಗಳು ಪಟ್ಟಣದ ದತ್ತಾತ್ರೇಯ ದೇವಸ್ಥಾನದಲ್ಲಿ ಜರುಗಲಿದೆ.

ಡಿ. 7 ರಿಂದ ದತ್ತನ ದೇವಸ್ಥಾನದಲ್ಲಿ ವಿವಿಧ ಕಾರ್ಯಕ್ರಮಗಳು ಶುರುವಾಗುವವು. ದಿ.೮ರಂದು ರಾತ್ರಿ 8ಕ್ಕೆ ವಾಣಿ ಉಪಾಧ್ಯೆ ಅವರಿಂದ ಭಕ್ತಿಸಂಗೀತ ಸೇವೆ ನಡೆಯುವುದು, ಡಿ.  9 ರಂದು ಸಾಯಂಕಾಲ 4-30 ಕ್ಕೆ ಲಕ್ಷ್ಮೀ ಶೋಭಾನ ರಾತ್ರಿ ೮ಕ್ಕೆ ಶಾರದಾ ಭಜನಾ ಮಂಡಳಿಯಿಂದ ಭಕ್ತಿಸಂಗೀತ ಸೇವೆ ನಡೆಯಲಿದೆ. ಡಿ. 10 ರಂದು ರಾತ್ರಿ 7-30 ಕ್ಕೆ ಮಾಧುರಿ ಪೂಜಾರ, ದೀಪಾ ಪಂಡಿತ, ಆರುಂಧತಿ ಕುಲಕರ್ಣಿ ಸಂಗಡಿಗರಿಂದ ಗೀತಾವಾಚನವಾದ ನಂತರ ವೇ.ಮೂ. ಪಂ.ರಮೇಶಭಟ್ಟ ಜೋಶಿ ಇವರಿಂದ ಪ್ರವಚನ ನಡೆಯುವುದು.

ಡಿ. 11 ರಂದು ಬೆ.9 ಕ್ಕೆನೂತನ ರಥದ ಪ್ರತಿಷ್ಠಾ ಹೋಮದ ಸಂಕಲ್ಪವಾದ ನಂತರ 11.30 ಕ್ಕೆ ಶ್ರೀಶ್ರೀಶ್ರೀ ಪ್ರಣವಾನಂದ ತೀರ್ಥ ಮಹಾಸ್ವಾಮಿಗಳು ಅದ್ವೈತ ಆಶ್ರಮ ಹುಬ್ಬಳ್ಳಿ ಇವರನ್ನು ಪೂರ್ಣಕುಂಭ ಮೆರವಣಿಗೆಯಿಂದ ಸ್ವಾಗತಿಸಲಾಗುವುದು. ಹೋಮ ಪೂರ್ಣಾಹುತಿ ನಂತರ ರಥದ ನಿರ್ಮಾತೃಗಳಾದ ಮುರುಳೀಧರ ಬಡಿಗೇರ ಅವರಿಗೆ ಸಂಘದಿಂದ ಸನ್ಮಾನಿಸಲಾಗುವುದು. ಸಂಜೆ 7ಕ್ಕೆ ಪ್ರಣವಾನಂದ ಮಹಾಸ್ವಾಮಿಗಳಿಂದ ಪ್ರವಚನ ನಡೆಯುವುದು.

ಡಿ. 12 ರಂದು ಬೆ.10.30ಕ್ಕೆ ಸತ್ಯನಾರಾಯಣ ಪೂಜಾ ನೆರವೇರಿಸಿದ ನಂತರ 12ಕ್ಕೆ ವಟುಭಿಕ್ಷಾ ಕಾರ್ಯಕ್ರಮ ನಡೆಯಲಿದೆ, ರಾತ್ರಿ 8ಕ್ಕೆ ವೇಣುಗೋಪಾಲ ಭಜನಾ ಮಂಡಳಿ ವತಿಯಿಂದ ಭಕ್ತಿಸಂಗೀತ ಸೇವೆ ನಡೆಯಲಿದೆ. ಡಿ. 13 ರಂದು ಬೆ. 7ಕ್ಕೆ ಶ್ರೀದತ್ತನಿಗೆ ರುದ್ರಾಭಿಷೇಕ ನಂತರ ಶ್ರೀ ಗುರುಚರಿತ್ರೆ ಪಾರಾಯಣ ನಡೆದು ಮಂಗಳವಾದ ನಂತರ ಸಂಜೆ 6ಕ್ಕೆ ದತ್ತ ಜನ್ಮೋತ್ಸವದ ನಿಮಿತ್ತ ದತ್ತನ ತೊಟ್ಟಿಲೋತ್ಸವ ಮತ್ತು ದೀಪಾರಾಧನೆ ನಡೆಯಲಿದೆ. ಡಿ. 14 ರಂದು ಕೊನೆಯದಿನ ಬೆ.9ಕ್ಕೆ ದತ್ತಯಾಗ ಹಾಗೂ ಬುತ್ತಿಪೂಜೆ ನಡೆಯಲಿದ್ದು, ಪೂರ್ಣಾಹುತಿ ಹೋಮದ ನಂತರ ಬುತ್ತಿಪೂಜಾ ದರ್ಶನ, ಮಹಾಮಂಗಳಾರತಿ ಹಾಗೂ ಮಹಾಪ್ರಸಾದ ನಡೆಯಲಿದೆ. ಸಾಯಂಕಾಲ ಮಂತ್ರಪುಷ್ಪ ಹಾಗೂ ಅಷ್ಟಾವಧಾನ ಸೇವೆ ನಡೆದು ಕಾರ್ಯಕ್ರಮಗಳು ಮಂಗಲವಾಗುವವು ಎಂದು ಅಧ್ಯಕ್ಷ ನಿತಿನ್ ಶೇವಡೆ ಹಾಗೂ ಕಾರ್ಯದರ್ಶಿ ಚಿದಂಬರ ಜೋಶಿ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.