ಬೆಳ್ತಂಗಡಿ: ಗಾಳಿ-ಮಳೆ-ಸಿಡಿಲಿನಿಂದ ಲಕ್ಷಾಂತರ ರೂ. ನಷ್ಟ

ಬೆಳ್ತಂಗಡಿ : ಭಾನುವಾರ ಸಂಜೆ ಧಾರಾಕಾರವಾಗಿ ಸುರಿದ ಮಳೆ, ಅದರೊಂದಿಗೆ ಬೀಸಿದ ಸುಂಟರಗಾಳಿಗೆ ೩೦ಕ್ಕೂ ಅಧಿಕ ಮನೆಗಳಿಗೆ ಹಾನಿ, ಎರಡು ಕೋಳಿ ಫಾರಂಗಳು ಧರೆಗೆ ಉರುಳಿದ್ದು, 164 ವಿದ್ಯುತ್ ಕಂಬಗಳು, 16 ಟ್ರಾನ್ಸ್‌ಫಾರ್ಮರ್, ಅಡಿಕೆ, ತೆಂಗು, ಬಾಳೆ ಸೇರಿದಂತೆ ಒಂದು ಕೋಟಿ ಮಿಕ್ಕಿ ನಷ್ಟ ಸಂಭವಿಸಿದೆ.

ತಾಲೂಕಿನಲ್ಲಿ ಕಳೆದ ಮೂರ್‍ನಾಲ್ಕು ದಿನಗಳಿಂದ ತಾಲೂಕಿನಾದ್ಯಂದ ಗಾಳಿ, ಸಿಡಿಲು, ಮಳೆಯಾಗಿದೆ. ಶುಕ್ರವಾರ ನಿಡ್ಲೆ, ಚಾರ್ಮಾಡಿ, ನೆರಿಯಾ ಪ್ರದೇಶಗಳಲ್ಲಿ, ಶನಿವಾರ ಬಂಗಾಡಿ, ಇಂದಬೆಟ್ಟು, ಮುಂಡಾಜೆ ಪ್ರದೇಶದಲ್ಲಿ, ಭಾನುವಾರ ಬೆಳ್ತಂಗಡಿ, ಗೇರುಕಟ್ಟೆ, ನಾಳ, ಓಡಿನ್ನಾಳ ಪ್ರದೇಶಗಳಲ್ಲಿ ಮನೆಗಳು ಹಾನಿಗೊಂಡಿದೆ. ಕಳಿಯ ಗ್ರಾಪಂ ವ್ಯಾಪ್ತಿಯ ರೇಶ್ಮೆರೋಡ್ ಜನತಾ ಕಾಲೋನಿಯಲ್ಲಿ ಶ್ರೀಧರ್ ಆಚಾರ್ ಮನೆಯ ಛಾವಣಿ ಗಾಳಿಗೆ ಹಾರಿ ಹೋಗಿದೆ. ಸರಸ್ವತಿ, ಜಯಂತಿ ಎಂಬವರ ಮನೆಗೆ ಹಾನಿಯಾಗಿದೆ. ಪರುಷೋತ್ತಮ ಎಂಬವರ ಕೋಳಿ ಫಾರಂ ಧರೆಗುರುಳಿದೆ.

ಕುವೆಟ್ಟು ಗ್ರಾಪಂ ವ್ಯಾಪ್ತಿಯ ಓಡಿಲ್ನಾಳ ಗ್ರಾಮದ ಪ್ರಭಾನಂದ ಎಂಬವರ ಮನೆಯ ಛಾವಣಿ ಹಾರಿದೆ. ರವಿಪೂಜಾರಿ, ಪುಷ್ಪವತಿ ಶೆಟ್ಟಿ, ಅಪ್ಪಿ ಶೆಟ್ಟಿ, ಪೂರ್ಣಿಮ ಕೊಂಡೆ, ಲೋಕಯ್ಯ ಪೂಜಾರಿ ಕಟ್ಟದಬೈಲು, ಸದಾಶಿವ ಶೆಟ್ಟಿ ಮನೆಗೆ ಹಾನಿಯಾಗಿದೆ. ಜಗದೀಶ್ ಎಂಬವರ ಕೋಳಿ ಫಾರಂ ಸಂಪೂರ್ಣ ನಾಶ ಆಗಿದೆ. ಬೆಳ್ತಂಗಡಿ ಚರ್ಚ್ ಶಾಲೆ, ಚರ್ಚ್‌ರೋಡ್‌ನ ಗ್ಯಾರೇಜ್, ಪ್ಲೆವೀಯ ಎಂಬವರ ಮನೆಗೆ ಹಾನಿಯಾಗಿದೆ. ಕಳಿಯ ಗ್ರಾಪಂ ಅಧ್ಯಕ್ಷ ಶರತ್ ಕುಮಾರ್, ಗ್ರಾಮಕರಣಿಕ, ಮಾಜಿ ಶಾಸಕ ಪ್ರಭಾಕರ ಬಂಗೇರ, ಜಿಪಂ ಸದಸ್ಯೆ ಮಮತಾ ಶೆಟ್ಟಿ, ತಾಪಂ ಸದಸ್ಯ ಗೋಪಿನಾಥ್ ನಾಯಕ್, ಕುವೆಟ್ಟು ಗ್ರಾಪಂ ಅಧ್ಯಕ್ಷ ಅಶೋಕ್ ಕೋಟ್ಯಾನ್, ಉಪಾಧ್ಯಕ್ಷೆ ಅಕ್ಷತಾ ಶೆಟ್ಟಿ, ಸದಸ್ಯರಾದ ಸದಾನಂದ ಮೂಲ್ಯ, ಗೋಪಾಲ ಬನ, ವೃಷಭ ಆರಿಗ, ಕಂದಾಯ ಅಧಿಕಾರಿಗಳು ಭೇಟಿ ನೀಡಿದರು.

ಮೆಸ್ಕಾಂ ಸುಮಾರು 55 ಲಕ್ಷ ರೂ. ನಷ್ಟ : ಬೆಳ್ತಂಗಡಿ ತಾಲೂಕಿನ ಉಜಿರೆ ಹಾಗೂ ಬೆಳ್ತಂಗಡಿ ಮೆಸ್ಕಾಂ ವಿಭಾಗದಲ್ಲಿ ಅಪಾರ ನಷ್ಟ ಉಂಟಾಗಿದೆ. ಬೆಳ್ತಂಗಡಿ ವಿಭಾಗದಲ್ಲಿ 110 ವಿದ್ಯುತ್ ಕಂಬಗಳು, 8 ಟ್ರಾನ್ಸ್‌ಫಾರ್ಮರ್‌ಗಳು ಸೇರಿದಂತೆ ಅಂದಾಜು ಸುಮಾರು 35 ಲಕ್ಷ ರೂ. ನಷ್ಟ ಉಂಟಾಗಿದೆ. ಉಜಿರೆ ವಿಭಾಗದಲ್ಲಿ 54 ವಿದ್ಯುತ್ ಕಂಬಗಳು, 8 ಟ್ರಾನ್ಸ್‌ಫಾರ್ಮರ್‌ಗಳು ಸೇರಿದಂತೆ 20 ಲಕ್ಷ ರೂ. ನಷ್ಟ ಆಗಿದೆ. ಒಟ್ಟು ಅಂದಾಜು 55 ಲಕ್ಷ ರೂ. ಮೆಸ್ಕಾಂ ಇಲಾಖೆ ಕಳೆದ ಮೂರು ದಿನಗಳಿಂದ ಮಳೆ, ಗಾಳಿ, ಸಿಡಿಲಿನಿಂದ ನಷ್ಟ ಆಗಿದೆ. ನಗರ ಪ್ರದೇಶದಲ್ಲಿ ವಿದ್ಯುತ್ ವ್ಯತ್ಯಯ ಆಗಿದ್ದರೂ ಸರಿಪಡಿಸಿ ಕೊಡಲಾಗುತ್ತಿದೆ. ಗ್ರಾಮೀಣ ಭಾಗದಲ್ಲಿ ವಿದ್ಯುತ್ ಕಂಬ ತುಂಡಾಗಿ ಬಿದ್ದಿದ್ದು ಸರಿಪಡಿಸಲು ಮೂರು ದಿನಗಳು ಬೇಕಾಗಬಹುದು. ಈಗಾಗಲೇ ಮುರಿದು ಬಿದ್ದ ಕಂಬ ಬದಲಾವಣೆಯನ್ನು ಮಾಡಲಾಗುತ್ತಿದೆ ಎಂದು ಮೆಸ್ಕಾಂನ ಕಾರ್ಯಪಾಲಕ ಅಭಿಯಂತರ ರಾಮಚಂದ್ರ ಹಾಗು ಸಹಾಯಕ ಕಾರ್ಯಪಾಲಕ ಅಭಿಯಂತರ ಶಿವಶಂಕರ್ ತಿಳಿಸದ್ದಾರೆ.