ಕುಟುಂಬ ಯೋಜನೆಗೆ ಒಳಪಟ್ಟವರಿಗೆ ಮಾತ್ರ ಮತದಾನದ ಹಕ್ಕಿರಬೇಕು

ನವದೆಹಲಿ: ವಿವಾದಾತ್ಮಕ ಹೇಳಿಕೆಗಳನ್ನು ನೀಡುವುದರಲ್ಲಿ ನಿಸ್ಸೀಮರಾದ ಬಿಜೆಪಿಯ ಸಂಸದ ಸಾಕ್ಷಿ ಮಹಾರಾಜ್ ಇದೀಗ ಮತ್ತೊಂದು ಹಾಸ್ಯಾಸ್ಪದ ಹೇಳಿಕೆಯನ್ನು ನೀಡಿದ್ದಾರೆ. ಅದು ಕೂಡ ಕುಟುಂಬ ಯೋಜನೆಯ ಬಗೆಗೆ.

’ದೇಶದ ಜನಸಂಖ್ಯೆಯನ್ನು ನಿಯಂತ್ರಿಸಲು ಕಠಿಣ ಕುಟುಂಬ ಯೋಜನೆ ಕಾನೂನನ್ನು ತರಬೇಕು. ಯಾರು ಕುಟುಂಬಯ ಯೋಜನೆಗೆ ಒಳಪಡುವುದಿಲ್ಲವೋ ಅವರನ್ನು ಮತದಾನದ ಹಕ್ಕಿನಿಂದ ವಂಚಿತಗೊಳಿಸಬೇಕು. ಹಿಂದೂಗಳು ಸಂತಾನಹರಣ ಶಸ್ತ್ರಚಿಕಿತ್ಸಗೆ ಒಳಪಟ್ಟಂತೆ ಮುಸ್ಲಿಮರೂ ಸಂತಾನಹರಣ ಶಸ್ತ್ರಚಿಕಿತ್ಸೆಗೆ ಒಳಪಡಬೇಕು. ಎಲ್ಲರಿಗೂ ಸಮಾನ ಕಾನೂನುಗಳಿರಬೇಕು. ನಮ್ಮ ಆಡಳಿತದಲ್ಲಿ ಯಾರ ಓಲೈಕೆಯೂ ಇಲ್ಲ’ ಎಂದು ಸಾಕ್ಷಿ ಮಹಾರಾಜ್ ಹೇಳಿದ್ದಾರೆ.

‘ನಾನು ನಾಲ್ಕು ಮಕ್ಕಳನ್ನು ಹೊಂದಿ ಎಂದು ಕರೆಕೊಟ್ಟಾಗ ಎಲ್ಲರೂ ಬೊಬ್ಬೆ ಹೊಡೆದರು. ಆದರೆ ಅವರು ನಾಲ್ಕು ಹೆಂಡತಿಯರನ್ನು ಹೊಂದಿ 40 ಮಕ್ಕಳನ್ನು ಹೆರುವಾಗ ಯಾರೊಬ್ಬರೂ ಮಾತನಾಡುವುದಿಲ್ಲ. ಸ್ವಾತಂತ್ರ್ಯದ ಸಂದರ್ಭ ನಮ್ಮ ಜನಸಂಖ್ಯೆ 30 ಕೋಟಿ ಇತ್ತು, ಈಗ 130 ಕೋಟಿಯಾಗಿದೆ. ಇದಕ್ಕೆ ಯಾರು ಜವಾಬ್ದಾರರು? ಹಿಂದೂ, ಮುಸ್ಲಿಂ, ಕ್ರೈಸ್ಥ, ಸಿಖ್ ಎಲ್ಲರಿಗೂ ಸಮಾನ ಕಾನೂನುಗಳಿರಬೇಕು’ ಎಂದಿದ್ದಾರೆ.

ಮುಸ್ಲಿಮರನ್ನು ಮತದಾನದ ಹಕ್ಕಿನಿಂದ ವಂಚಿತಗೊಳಿಸಬೇಕು ಎಂದು ಶಿವಸೇನೆ ಮುಖಂಡ ಸಂಜಯ್ ರಾವತ್ ನೀಡಿದ ಹೇಳಿಕೆಯನ್ನು ಸಮರ್ಥಿಸಿಕೊಂಡು ಸಾಕ್ಷಿ ಮಹಾರಾಜ್ ಈ ಹೇಳಿಕೆ ನೀಡಿದ್ದಾರೆ.