ಚೆಸ್: ಜಿ.ಎ. ಸ್ಟಾನಿ ಪ್ರಥಮ

ಮಣಿಪಾಲ: ಮಣಿಪಾಲ ವಿವಿ ವತಿಯಿಂದ ಕೆ.ಎಂ.ಸಿ.ಯ ಡಾ.ಟಿ.ಎಂ.ಎ.ಪೈ ಸಭಾಂಗಣದಲ್ಲಿ ಇಂದು ಮುಕ್ತಾಯಗೊಂಡ ಡಾ. ಟಿಎಂಎ ಪೈ ಸ್ಮಾರಕ ಮೊದಲ ರಾಷ್ಟ್ರೀಯ ಫೆಡೇರೇಟೆಡ್ ಚೆಸ್ ಟೂರ್ನಿಯಲ್ಲಿ ಕರ್ನಾಟಕವನ್ನು ಪ್ರತಿನಿಧಿಸುತ್ತಿರುವ ಶಿವಮೊಗ್ಗದ ಜಿ.ಎ. ಸ್ಟಾನಿ ಚಾಂಪಿಯನ್ ಆಗಿ ಮೂಡಿಬಂದರು.

ಸ್ಪರ್ಧಾಕಣದಲ್ಲಿರುವ ಅತ್ಯಂತ ಕಿರಿಯ ವಯಸ್ಸಿನ ಅಂತಾರಾಷ್ಟ್ರೀಯ ಮಾಸ್ಟರ್ ಎನಿಸಿರುವ ಜಿ.ಎ. ಸ್ಟಾನಿ 9 ಸುತ್ತಿನ ಪಂದ್ಯಗಳಲ್ಲಿ ಅಜೇಯರಾಗುಳಿಯುವ ಮೂಲಕ ಒಟ್ಟು 8.5 ಅಂಕಗಳನ್ನು ಗಳಿಸಿ ಅಗ್ರಸ್ಥಾನಿಯಾದರು. ಇಂದು ನಡೆದ 9ನೇ ಸುತ್ತಿನ ಪಂದ್ಯದಲ್ಲಿ ಸ್ಟಾನಿ ತನ್ನ ಎದುರಾಳಿ ಇಂಡಿಯನ್ ಆಯಿಲ್‌ನ ಎ.ಐ. ಮುತ್ತಯ್ಯ ಅವರ ವಿರುದ್ಧ ಡ್ರಾದಲ್ಲಿ ಪಂದ್ಯವನ್ನು ಮುಕ್ತಾಯಗೊಳಿಸಲು ಒಪ್ಪಿಕೊಂಡು ಏಕಾಂಗಿಯಾಗಿ ಅಗ್ರಸ್ಥಾನವನ್ನು ಖಚಿತಪಡಿಸಿಕೊಂಡರು.

ಇದರಿಂದ ಮುತ್ತಯ್ಯ ಕೂಡ ಅರ್ಧ ಅಂಕ ಸಂಪಾದಿಸಿ ತನ್ನ ಒಟ್ಟು ಅಂಕಗಳನ್ನು 7.5ಕ್ಕೆ ಏರಿಸಿಕೊಂಡು ಉಳಿದ ಏಳು ಮಂದಿಯೊಂದಿಗೆ ದ್ವಿತೀಯ ಸ್ಥಾನವನ್ನು ಹಂಚಿಕೊಂಡರು.

ಆದರೆ ಉತ್ತಮ ಟೈಬ್ರೇಕ್ ಆಧಾರದಲ್ಲಿ ತಮಿಳುನಾಡಿನ ಮುತ್ತಯ್ಯರಿಗೆ ಮೊದಲ ರನ್ನರ್‌ಅಪ್ ಸ್ಥಾನ ದಕ್ಕಿತು. ಉಳಿದಂತೆ ಕರ್ನಾಟಕದ ಬಾಲಕಿಶನ್ ಎ., ರೈಲ್ವೆಯ ಐ.ಎಂ. ಗಿರಿನಾಥ್ ಪಿಡಿ ಎಸ್, ಕರ್ನಾಟಕದ ಗಹನ್ ಎಂ.ಜಿ., ಅರವಿಂದ ಶಾಸ್ತ್ರಿ, ಪಶ್ಚಿಮ ಬಂಗಾಳದ ಎಫ್‌ಎಂ ರಾಜದೀಪ್ ಸರ್ಕಾರ್, ಕರ್ನಾಟಕದ ವಿವೇಕ್ ನಂಬಿಯಾರ್ ಹಾಗೂ ವಿಜಯ ಕೀರ್ತಿ ಕೆ. ತಲಾ ೭.೫ ಅಂಕಗಳನ್ನು ಸಂಪಾದಿಸಿದರೂ ಬಾಲಕಿಶನ್ ಎ. ಅವರಿಗೆ ಎರಡನೇ ರನ್ನರ್ ಅಪ್ ಸ್ಥಾನ ದೊರೆಯಿತು.

ಸ್ಟಾನಿ ಜಿ.ಎ. ಟ್ರೋಫಿಯೊಂದಿಗೆ 50,000 ರೂ. ಮೊತ್ತದ ಚೆಕ್‌ನ್ನು ಸ್ವೀಕರಿಸಿದರೆ, ಮೊದಲ ರನ್ನರ್ ಅಪ್ ಆದ ಮುತ್ತಯ್ಯರಿಗೆ 30,000 ರೂ. ಮೊತ್ತದ ಚೆಕ್ ನೀಡಲಾಯಿತು.
ಸಂಜೆ ನಡೆದ ಬಹುಮಾನ ವಿತರಣಾ ಸಮಾರಂಭದಲ್ಲಿ ಮುಖ್ಯ ಅತಿಥಿಯಾಗಿ ಭಾಗವಹಿಸಿದ ಮಣಿಪಾಲ ವಿವಿಯ ರಿಜಿಸ್ಟ್ರಾರ್ ಡಾ. ನಾರಾಯಣ ಸಭಾಹಿತ್ ವಿಜೇತರಿಗೆ ಬಹುಮಾನಗಳನ್ನು ವಿತರಿಸಿದರು. ವಿವಿಯ ಕುಲಪತಿ ಡಾ.ಎಚ್.ವಿನೋದ್ ಭಟ್ ಸಮಾರಂಭದ ಅಧ್ಯಕ್ಷತೆ ವಹಿಸಿದ್ದರು.

ಸೌಂದರ್ಯ ಕುಮಾರ್‌ಗೆ ಪ್ರಶಸ್ತಿ
ಅಂಧರ ರಾಷ್ಟ್ರೀಯ ಬಿ- ಚೆಸ್ ಚಾಂಪಿಯನ್‌ಶಿಪ್‌ನಲ್ಲಿ ಒಡಿಶಾದ ಸೌಂದರ್ಯ ಕುಮಾರ್ ಪ್ರಸಾದ್ ಚಾಂಪಿಯನ್ ಆಗಿ ಮೂಡಿಬಂದರು. ಅವರು ಟ್ರೋಫಿಯೊಂದಿಗೆ 15,000 ರೂ. ನಗದು ಬಹುಮಾನ ಗಳಿಸಿದರು. ಕರ್ನಾಟಕದ ಕಿಷನ್ ಗಂಗೊಳ್ಳಿ 7.5 ಅಂಕಗಳೊಂದಿಗೆ ದ್ವಿತೀಯ ಸ್ಥಾನ ಗಳಿಸಿದರು. ಅವರಿಗೆ 8,000 ರೂ. ನಗದು ಬಹುಮಾನ ದೊರಕಿತು.