ಕರ್ತವ್ಯವನ್ನು ನಿರ್ವಹಿಸುವುದೇ ಧರ್ಮ

ಬೆಳ್ತಂಗಡಿ: ನಾವು ಜೀವನದಲ್ಲಿ ಗಳಿಸಿದ ಅನುಭವ ಅಪೂರ್ವವಾದ ಸಂಪತ್ತೇ ಹೊರತು ಆರ್ಥಿಕ ಗಳಿಕೆಯೊಂದೇ ಅಲ್ಲ. ಪಾಲಿಗೆ ಬಂದ ಕರ್ತವ್ಯವನ್ನು ನಿರ್ವಹಿಸುವುದೇ ಧರ್ಮ ಎಂದು ಧರ್ಮಾಧಿಕಾರಿ ಡಾ| ಡಿ. ವೀರೇಂದ್ರ ಹೆಗ್ಗಡೆ ಹೇಳಿದರು.

ಅವರು ಗುರುವಾರ ಉಜಿರೆ ಎಸ್‌ಡಿಎಂ ಕಾಲೇಜಿನ ಇಂದ್ರಪ್ರಸ್ಥ ಸಭಾಂಗಣದಲ್ಲಿ ನಡೆದ ಕಾಲೇಜಿನ ಪ್ರಾಚಾರ್ಯ ಡಾ| ಬಿ. ಯಶೋವರ್ಮ ಅವರು ಸೇವಾ ನಿವೃತ್ತಿ ಹೊಂದಿದ ಹಿನ್ನೆಲೆಯಲ್ಲಿ ನಡೆದ ಕೃತಜ್ಞತಾ ಸಭೆಯಲ್ಲಿ ಆಶೀರ್ವಚನ ನೀಡಿದರು.

ಜೀವನದ ಪ್ರತೀ ಕ್ಷಣವನ್ನು ನಾವು ಹೇಗೆ ಸದುಪಯೋಗಪಡಿಸಿಕೊಂಡಿದ್ದೇವೆ ಮತ್ತು ಬದುಕಿನಲ್ಲಿ ಏನನ್ನು ಸಾಧಿಸಿದ್ದೇವೆ ಎಂಬುದನ್ನು ಆತ್ಮಾವಲೋಕನ ಮಾಡಿಕೊಂಡು ಮುಂದುವರಿಯಬೇಕು. ಯಾರೂ ಸಣ್ಣವರಲ. ಪಾಲಿಗೆ ಬಂದ ಕೆಲಸವನ್ನು ನಿರ್ವಹಿಸುವುದೇ ಧರ್ಮ. ಧರ್ಮವನ್ನು ಕರ್ಮವನ್ನಾಗಿಸಿ ಪ್ರೀತಿಸಿ ಮಾಡುವ ಕಾರ್ಯ ಅಭಿನಂದನೀಯ ಎಂದರು.

ಪ್ರೀತಿ, ವಿಶ್ವಾಸದಿಂದ ಒಲಿಸಿ ಸಂಸ್ಥೆಯ ಕೆಲಸ ಕಾರ್ಯಗಳನ್ನು ಮಾಡಬೇಕೆ ಹೊರತು ಯಾರನ್ನೂ ಒತ್ತಡ, ಬಲಾತ್ಕಾರದಿಂದ ದುಡಿಸಲು ಸಾಧ್ಯವಿಲ್ಲ. ಈ ನೀತಿಯನ್ನು ಅಳವಡಿಸಿಕೊಂಡು ಟೀಮ್ ವರ್ಕ್‌ನಿಂದಾಗಿ ಈ ಕಾಲೇಜು ಪ್ರಸಿದ್ಧಿ ಹೊಂದಿದೆ ಎಂದು ಶ್ಲಾಘಿಸಿದ ಅವರು ಪ್ರೋ. ಪ್ರಭಾಕರ್ ಅವರು ಹಾಕಿದ ಹಾದಿಯಲ್ಲೇ ಯಶೋವರ್ಮ ಅವರು ಮುನ್ನಡೆದು ಆಧುನಿಕತೆಯ ಮತ್ತು ನೂತನ ತಂತ್ರಜ್ಞಾನವನ್ನು ಉಪಯೋಗಿಸಿಕೊಂಡು ಇನ್ನಷ್ಟು ಪರಿವರ್ತನೆ ತಂದಿದ್ದಾರೆ. ನಿವೃತ್ತಿ ದುಃಖದಾಯಕ ಸಂಗತಿಯಲ್ಲ. ನಿವೃತ್ತಿಯಿಂದ ಪ್ರವೃತ್ತಿ ಆರಂಭಿಸಲು ಸಾಧ್ಯ ಎಂದರು.

ಕಾಲೇಜಿನ 50 ವರ್ಷದ ಇತಿಹಾಸದಲ್ಲಿ ಗುಣಮಟ್ಟದ ಶಿಕ್ಷಣ, ಸಾಮೂಹಿಕ ಶಿಸ್ತು, ಜವಾಬ್ದಾರಿ ಗಳಿಂದ ಸಂಸ್ಥೆಯು ಅತ್ಯುತ್ತಮ ಸಾಧನೆಯನ್ನು ಮಾಡಿದೆ ಎಂದರು.

ಎಸ್.ಡಿ.ಎಂ. ಶಿಕ್ಷಣ ಸಂಸ್ಥೆ ಉಪಾಧ್ಯಕ್ಷ ಪ್ರೊ. ಎಸ್. ಪ್ರಭಾಕರ್ ಅವರು ಚಿಗುರು ಸಂಚಿಕೆಯನ್ನು ಬಿಡುಗಡೆಗೊಳಿಸಿದರು.

ಅಭಿನಂದನೆಯನ್ನು ಸ್ವೀಕರಿಸಿ ಮಾತನಾಡಿದ ಡಾ| ಬಿ. ಯಶೋವರ್ಮ ಅವರು, ಪ್ರಾಚಾರ್ಯನಾಗಿ 23 ವರ್ಷ ಸೇವೆ ಸಲ್ಲಿಸಲು ಎಲ್ಲರೂ ನೀಡಿದ ಬೆಂಬಲ, ಪ್ರೋತ್ಸಾಹವೇ ಕಾರಣವಾಗಿದೆ. ಎಲ್ಲರ ಸಾಂಘಿಕ ಪ್ರಯತ್ನವೇ ಯಶಸ್ಸಿಗೆ ಕಾರಣ. ನಾನೇನಾದರೂ ಸಾಧನೆ ಮಾಡಿದ್ದರೆ ಅದಕ್ಕೆ ರೋಲ್ ಮಾಡೆಲ್ ಡಾ| ಹೆಗ್ಗಡೆಯವರು ಮತ್ತು ಹೇಮಾವತಿ ಹೆಗ್ಗಡೆಯರು. ಸದಾ ಚಟುವಟಿಕೆಯಿಂದಿದ್ದರೆ ದಿನ ಹೋಗುವುದರ ಬಗ್ಗೆ ಅರಿವಾಗದು ಎಂದು ತಮ್ಮ ಸೇವಾವಧಿಯಲ್ಲಿನ ಅನೇಕ ವಿಚಾರಗಳನ್ನು ಮೆಲುಕು ಹಾಕಿದರು.

ಯಶೋವರ್ಮ ಅವರ ಪತ್ನಿ ಸೋನಿಯಾ ವರ್ಮಾ ಅನಿಸಿಕೆ ವ್ಯಕ್ತಪಡಿಸಿದರು. ಜೆಎಸ್‌ಎಸ್ ಧಾರವಾಡ ಇದರ ವಿಶ್ರಾಂತ ಪ್ರಾಚಾರ್ಯ ಎಸ್.ಎನ್.ಹೆಗ್ಡೆ, ಉಜಿರೆ ಎಸ್.ಡಿ.ಎಂ. ಕಾಲೇಜಿನ ಪ್ರಾಧ್ಯಾಪಕರಾದ ಪ್ರೊ. ದಿನೇಶ್ ಚೌಟ, ಡಾ| ಬಿ.ಎ.ಕುಮಾರ್ ಹೆಗ್ಡೆ, ಡಾ| ಮಂಜುಳಾ ಎಂ.ವೈ., ಸಿಬ್ಬಂದಿ ಯುವರಾಜ ಪೂವಣಿ, ವಿದ್ಯಾರ್ಥಿಗಳಾದ ಪ್ರಶಾಂತ ಯು.ಜಿ, ಮೆರ್‍ಲಿನ್ ಪಿರೇರಾ, ರಾಹುಲ್ ಅವರು ಯಶೋವರ್ಮ ಅವರ ಬಗ್ಗೆ ಅನಿಸಿಕೆಗಳನ್ನು ವ್ಯಕ್ತಪಡಿಸಿದರು.

ಯಶೋವರ್ಮರ ಬಗ್ಗೆ ಹಿತೈಷಿಗಳ 60 ಲೇಖನಗಳು ಹಾಗೂ ಛಾಯಾಚಿತ್ರಗಳುಳ್ಳ ಮನದ ಮಾತು @ 60 ಎಂಬ ಹೊತ್ತಗೆಯನ್ನು ಶ್ರದ್ಧಾ ಅಮಿತ್ ಬಿಡುಗಡೆಗೊಳಿಸಿದರು. ಉಪನ್ಯಾಸಕ ಪ್ರಸನ್ನ ಐತಾಳ್ ಅವರು ಸ್ವರಚಿತ ಕವನವನ್ನು ವಾಚಿಸಿ ಅದನ್ನು ಯಶೋವರ್ಮರಿಗೆ ಅರ್ಪಿಸಿದರು.

ಕಾಲೇಜಿನ ನಿಯೋಜಿತ ಪ್ರಾಚಾರ್ಯ ಪ್ರೊ. ಮೋಹನ ನಾರಾಯಣ ಸ್ವಾಗತಿಸಿದರು. ಪ್ರೊ. ಪ್ರಕಾಶ್ ಪ್ರಭು ಮತ್ತು ತಂಡದವರು ಶುಭಾಶಯ ಗೀತೆ ಹಾಡಿದರು. ಅಭಿನಂದನಾ ಪತ್ರವನ್ನು ಡಾ| ಪಿ. ವಿಶ್ವನಾಥ್ ವಾಚಿಸಿದರು. ಪ್ರೊ. ಭಾಸ್ಕರ ಹೆಗಡೆ ಚಿಗುರು ಸಂಚಿಕೆಯ ಬಗ್ಗೆ ಪ್ರಸ್ತಾವಿಸಿದರು. ಡಾ| ಬಿ.ಪಿ.ಸಂಪತ್‌ಕುಮಾರ್ ಕಾರ್ಯಕ್ರಮ ನಿರ್ವಹಿಸಿದರು. ಡಾ| ಶ್ರೀಧರ್ ಭಟ್ ವಂದಿಸಿದರು.