ಕೊಂಕಣಿ ಭಾಷೆ ಸಮಾಜಕ್ಕೆ ಅಪಾರ ಕೊಡುಗೆ ನೀಡಿದೆ: ಸೊರಕೆ

ಬೈಂದೂರು: ಕೊಂಕಣಿ ಭಾಷೆ ತನ್ನದೇ ಆದ ಅಪಾರ ಕೊಡುಗೆಯನ್ನು ಈ ಸಮಾಜಕ್ಕೆ ನೀಡಿದೆ. ಕರ್ನಾಟಕ, ಗೋವಾ, ಮಹಾರಾಷ್ಟ್ರ ಮೊದಲಾದ ರಾಜ್ಯಗಳಲ್ಲಿ ಅನೇಕ ಕೊಂಕಣಿ ಭಾಷೆಯ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಲಾಗುತ್ತಿದ್ದು, ಕೊಂಕಣಿ ಭಾಷೆಗೆ ರಾಷ್ಟ್ರ ಮಟ್ಟದಲ್ಲಿ ಶಾಸ್ತ್ರೀಯ ಸ್ಥಾನಮಾನ ದೊರೆತಿದೆ. ಕೊಂಕಣಿ ಭಾಷೆ ಕಲೆ ಹಾಗೂ ಸಾಹಿತ್ಯ ಇತರ ಭಾಷೆಗಳಿಗೆ ಸ್ಫೂರ್ತಿ ಪ್ರೇರಣೆ ನೀಡುವ ಮೂಲಕ ಇತರ ಭಾಷೆಗಳ ಮೇಲೆ ಬಹಳಷ್ಟು ಪ್ರಭಾವ ಬೀರಿದೆ ಎಂದು ರಾಜ್ಯ ನಗರಾಭಿವೃದ್ಧಿ ಸಚಿವ ವಿನಯಕುಮಾರ್ ಸೊರಕೆ ಹೇಳಿದರು.

ಅವರು ಶುಕ್ರವಾರ ಖಂಬದಕೋಣೆ ನಿರ್ಮಲ ಸಭಾಭವನದಲ್ಲಿ ಕರ್ನಾಟಕ ರಾಜ್ಯ ಕೊಂಕಣಿ ಸಾಹಿತ್ಯ ಅಕಾಡೆಮಿ ಮತ್ತು ರಂಗ ತರಂಗ ಉಪ್ಪುಂದ ಇವರ ಜಂಟಿ ಆಶ್ರಯದಲ್ಲಿ ಆಯೋಜಿಸಲಾಗಿದ್ದ ಮೂರು ದಿನಗಳ ಕೊಂಕಣಿ ರಂಗೋತ್ಸವ, ರಂಗ ಪ್ರಶಸ್ತಿ ಪ್ರದಾನ ಸಮಾರಂಭ ಉದ್ಘಾಟಿಸಿ ಮಾತನಾಡಿದರು.

ಕೊಂಕಣಿ ಸಾಹಿತ್ಯ ಅಕಾಡೆಮಿ ಮೂಲಕ ನಡೆಯುವ ಕಾರ್ಯಕ್ರಮಗಳ ಮೂಲಕ ಕೊಂಕಣಿ ಭಾಷೆಯ ತಿರುಳು ಎಲ್ಲಾ ಸಮಾಜಕ್ಕೆ ತಿಳಿಯುವಂತಾಗಬೇಕು. ಎಲ್ಲಾ ವರ್ಗದ ಜನರ ಜೊತೆ ಅನ್ಯೋನ್ಯತೆ, ಸೌಹಾರ್ದತೆ, ಸಾಮರಸ್ಯ ಬೆಳೆಸುವ ಕಾರ್ಯಕ್ರಮಗಳು ನಡೆಯಬೇಕು. ರಾಜ್ಯ ಸರಕಾರ ಇಂತಹ ಉದ್ದೇಶಗಳಿಗೆ ಅಕಾಡೆಮಿ ಮೂಲಕ ಬಹಳಷ್ಟು ಸಹಕಾರ ನೀಡುತ್ತಿದೆ ಎಂದು ಅವರು ಹೇಳಿದರು.

ಶಾಸಕ ಕೆ. ಗೋಪಾಲ ಪೂಜಾರಿ ಅಧ್ಯಕ್ಷತೆ ವಹಿಸಿದ್ದರು. ಈ ಸಂದರ್ಭದಲ್ಲಿ ರಂಗಭೂಮಿ ನಟ, ನಿರ್ದೇಶಕರಾದ ಸತೀಶ್ ಪೈ ಕುಂದಾಪುರ, ಅಲ್ವಿನ್ ಅಂದ್ರಾದೆ, ಕೃತಿಕಾರ, ನಟ ಪಾಂಡುರಂಗ ಮಡಿವಾಳ ಗಂಗೊಳ್ಳಿ ಇವರಿಗೆ ರಂಗರತ್ನ ಪ್ರಶಸ್ತಿ ನೀಡಿ ಗೌರವಿಸಲಾಯಿತು. ಕೊಂಕಣಿ ಸಾಹಿತ್ಯ ಅಕಾಡೆಮಿ ಅಧ್ಯಕ್ಷರು ಪ್ರಾಸ್ತಾವಿಕ ಮಾತನಾಡಿದರು. ಬೈಂದೂರು ಹೋಲಿಕ್ರಾಸ್ ಚರ್ಚ್‌ನ ಧರ್ಮಗುರು ರೊನಾಲ್ಡ್ ಮಿರಿಂದಾ ಶುಭಸಂಸನೆಗೈದರು.

ಭಟ್ಕಳ ರಿಬ್ಕೋ ಸಂಸ್ಥೆಯ ಪ್ರಭಂಧಕ ಕುರ್ಷೀದ್ ಆಲಂ ಹಬಿಬುಲ್ಲ, ಶಿರೂರು ಗ್ರಾಪಂ ಅಧ್ಯಕ್ಷ ರಾಮ ಮೇಸ್ತ, ನಾಗೂರು ನೂರ್‌ಜಮಿಯಾ ಮಸ್ಚಿದ್ ಅಧ್ಯಕ್ಷ ಎಂ. ಎಸ್.ಫಾರೂಕ್, ಜನಗಣತಿ ಪ್ರಶಸ್ತಿ ಪುರಸ್ಕೃತ ನಾಯ್ಕನಕಟ್ಟೆ ರಮಾನಂದ ಭಟ್, ಕಂಚಿಕಾನ ಶ್ರೀದುರ್ಗಾ ಪರಮೇಶ್ವರಿ ದೇವಸ್ಥಾನ ಜೀರ್ಣೋದ್ಧಾರ ಸಮಿತಿ ಅಧ್ಯಕ್ಷ ಕೆ. ರವೀಂದ್ರ ಕಿಣಿ, ರೋಜರಿ ಕೋ-ಆಪರೇಟಿವ್ ಸೊಸೈಟಿ ನಿರ್ದೇಶಕ ಮಾರ್ಟಿನ್ ಡಯಾಸ್ ಬೈಂದೂರು, ನಾಯ್ಕನಕಟ್ಟೆ ಹಾಲು ಉತ್ಪಾದಕರ ಸಹಕಾರಿ ಸಂಘದ ಅಧ್ಯಕ್ಷ ರಮೇಶ ಪೈ, ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ರಿಜಿಸ್ಟಾರ್ ಡಾ. ಈ.ದೇವಿದಾಸ ಪೈ ಉಪಸ್ಥಿತರಿದ್ದರು.

ಉಪ್ಪುಂದ ರಂಗತರಂಗ ಅಧ್ಯಕ್ಷ ಓಂಗಣೇಶ್ ಸ್ವಾಗತಿಸಿ, ಗಿರೀಶ್ ಶ್ಯಾನುಭಾಗ್ ವಂದಿಸಿದರು. ಪ್ರಕಾಶ್ ಭಟ್ ಕರ್ಯಕ್ರಮ ನಿರೂಪಿಸಿದರು. ಅನಂತರ ಕುಂದಾಪುರ ಶ್ರೀಲಕ್ಷ್ಮೀ ವೆಂಕಟೇಶ ಕೊಂಕಣಿ ನಾಟಕ ಸಭಾ ತಂಡದ ಕಲಾವಿದರು ’ತೀನಿ ರತ್ನ’ ಕೊಂಕಣಿ ನಾಟಕ ಪ್ರದರ್ಶಿಸಿದರು.