ದುರ್ಗಾದೇವಿಯನ್ನು ಸ್ತುತಿಸುವ ವಂದೇ ಮಾತರಂ ಸಾಲು ಕತ್ತರಿಸಿದ್ದ ನೆಹರು

ನವದೆಹಲಿ: ಭಾರತದ ಮೊದಲ ಪ್ರಧಾನಿ ಜವಾಹರಲಾಲ್ ನೆಹರು ಅವರು ದುರ್ಗಾದೇವಿಯನ್ನು ಸ್ತುತಿಸುವ ವಂದೇ ಮಾತರಂನ ಕೆಲವು ಭಾಗಗಳನ್ನು ಕತ್ತರಿಸುವ ಮೂಲಕ “ಐತಿಹಾಸಿಕ ಪಾಪ” ಮಾಡಿದ್ದಾರೆ ಎಂದು ಬಿಜೆಪಿ ಆರೋಪಿಸಿದೆ.

X ಪೋಸ್ಟ್‌ ಮಾಡಿರುವ ಬಿಜೆಪಿ ವಕ್ತಾರ ಸಿ.ಆರ್. ಕೇಶವನ್ ಅವರು, ನೆಹರು ಅವರ ಅಧ್ಯಕ್ಷತೆಯಲ್ಲಿ ಕಾಂಗ್ರೆಸ್ 1937 ರ ಫೈಜ್‌ಪುರ ಅಧಿವೇಶನದಲ್ಲಿ ಪಕ್ಷದ ರಾಷ್ಟ್ರೀಯ ಗೀತೆಯಾಗಿ ಕತ್ತರಿಸಿದ ವಂದೇ ಮಾತರಂ ಅನ್ನು ಮಾತ್ರ ಅಳವಡಿಸಿಕೊಂಡಿದೆ ಎಂದಿದ್ದಾರೆ.

“ನೆಹರು ಅವರು ಸುಭಾಷ್ ಚಂದ್ರ ಬೋಸ್‌ಗೆ ಬರೆದ ಪತ್ರವನ್ನು ಸಹ ಉಲ್ಲೇಖಿಸಿರುವ ಅವರು, ವಂದೇ ಮಾತರಂಗೂ ದುರ್ಗಾದೇವಿಗೂ ಯಾವುದೇ ಸಂಬಂಧವಿಲ್ಲ ಎಂದು ನೆಹರು ಹೇಳಿದ್ದರು ಮತ್ತು ವಂದೇ ಮಾತರಂ ರಾಷ್ಟ್ರೀಯ ಗೀತೆಯಾಗಿ ಸೂಕ್ತವಲ್ಲ ಎಂದು ಅಭಿಪ್ರಾಯಪಟ್ಟಿದ್ದರು. ನಮ್ಮ ಯುವ ಪೀಳಿಗೆಗೆ ತಿಳಿದಿರಬೇಕಾದ ಅಂಶವೆಂದರೆ, ನೆಹರೂ ಅವರ ಅಧ್ಯಕ್ಷತೆಯಲ್ಲಿ ಕಾಂಗ್ರೆಸ್ ಪಕ್ಷವು ತನ್ನ ಕೋಮುವಾದಿ ಕಾರ್ಯಸೂಚಿಯನ್ನು ಹೇಗೆ ಲಜ್ಜೆಗೆಟ್ಟು ಓಲೈಸಿತು, 1937 ರ ಫೈಜ್‌ಪುರ ಅಧಿವೇಶನದಲ್ಲಿ ಕೇವಲ ಚಿಕ್ಕದಾದ ವಂದೇ ಮಾತರಂ ಅನ್ನು ಮಾತ್ರ ಪಕ್ಷದ ರಾಷ್ಟ್ರೀಯ ಗೀತೆಯಾಗಿ ಅಳವಡಿಸಿಕೊಂಡಿತು, ಆದರೆ ಪ್ರಧಾನಿ ನರೇಂದ್ರ ಮೋದಿ ಇಂದು 150 ನೇ ವರ್ಷದ ಸ್ಮರಣಾರ್ಥ ದೇಶಾದ್ಯಂತ ನಮ್ಮ ಅದ್ಭುತವಾದ ವಂದೇ ಮಾತರಂನ ಪೂರ್ಣ ಆವೃತ್ತಿಯ ಸಾಮೂಹಿಕ ವಾಚನದಲ್ಲಿ ಭಾಗವಹಿಸಲಿದ್ದಾರೆ” ಎಂದು ಕೇಶವನ್ ಹೇಳಿದ್ದಾರೆ.

“ವಂದೇ ಮಾತರಂ ನಮ್ಮ ದೇಶದ ಏಕತೆ ಮತ್ತು ಒಗ್ಗಟ್ಟಿನ ಧ್ವನಿಯಾಯಿತು, ನಮ್ಮ ಮಾತೃಭೂಮಿಯನ್ನು ಆಚರಿಸಿತು, ರಾಷ್ಟ್ರೀಯತಾವಾದಿ ಮನೋಭಾವವನ್ನು ಹುಟ್ಟುಹಾಕಿತು ಮತ್ತು ದೇಶಭಕ್ತಿಯನ್ನು ಬೆಳೆಸಿತು. ಅದನ್ನು ಪಠಿಸುವುದನ್ನು ಬ್ರಿಟಿಷರು ಕ್ರಿಮಿನಲ್ ಅಪರಾಧವನ್ನಾಗಿ ಮಾಡಿದರು. ವಂದೇ ಮಾತರಂ
ಯಾವುದೇ ನಿರ್ದಿಷ್ಟ ಧರ್ಮ ಅಥವಾ ಭಾಷೆಗೆ ಸೇರಿಲ್ಲ. ಆದರೆ ಕಾಂಗ್ರೆಸ್ ಹಾಡನ್ನು ಧರ್ಮದೊಂದಿಗೆ ಲಿಂಕ್ ಮಾಡುವ ಐತಿಹಾಸಿಕ ಪಾಪ ಮತ್ತು ಪ್ರಮಾದವನ್ನು ಮಾಡಿದೆ. ವಂದೇ ಮಾತರಂನ ಸಾಲುಗಳನ್ನು ಉದ್ದೇಶಪೂರ್ವಕವಾಗಿ ತೆಗೆದುಹಾಕಲಾಗಿದೆ” ಎಂದಿದ್ದಾರೆ.