ರಾಜಸ್ಥಾನದಲ್ಲಿ ʼಲವ್‌ ಜಿಹಾದ್‌ʼ ಗ್ಯಾಂಗ್‌: ಅಪ್ರಾಪ್ತೆಯರ ಬ್ಲ್ಯಾಕ್‌ಮೇಲ್‌, ಮತಾಂತರಕ್ಕೆ ಯತ್ನ

ಜೈಪುರ: ರಾಜಸ್ಥಾನದ ಬೀವರ್ ಜಿಲ್ಲೆಯಲ್ಲಿ ಲವ್‌ ಜಿಹಾದ್‌ ಪ್ರಕರಣವೊಂದು ಹೊರಬಂದಿದ್ದು ಎಲ್ಲರನ್ನೂ ಬೆಚ್ಚಿ ಬೀಳಿಸಿದೆ.  ಐದು  ಅಪ್ರಾಪ್ತ ಬಾಲಕಿಯರ ಮೇಲೆ ಅತ್ಯಾಚಾರ ನಡೆಸಿ ಅವರನ್ನು ಮತಾಂತರಕ್ಕೆ ಯತ್ನಿಸಲಾಗಿದೆ. ಈ ಘೋರ ಅಪರಾಧದ ಹಿಂದೆ ಒಂದು ಗ್ಯಾಂಗ್‌ನ ಕೈವಾಡವಿದೆ ಎಂದು ಕುಟುಂಬ ಸದಸ್ಯರು ಹೇಳಿದ್ದಾರೆ. ಹುಡುಗಿಯರ ಅಶ್ಲೀಲ ಫೋಟೋಗಳು ಮತ್ತು ವೀಡಿಯೊಗಳನ್ನು ತೆಗೆದುಕೊಂಡು ಅವರನ್ನು ಬ್ಲ್ಯಾಕ್‌ಮೇಲ್ ಮಾಡಲಾಗಿತ್ತು ಮತ್ತು ಕಲ್ಮಾ ಪಠಿಸಲು, ಉಪವಾಸ ಆಚರಿಸಲು ಮತ್ತು ಇಸ್ಲಾಂ ಧರ್ಮವನ್ನು ಸ್ವೀಕರಿಸಲು ಒತ್ತಡ ಹೇರಲಾಗಿತ್ತು ಎಂಬ ಆರೋಪ ಕೇಳಿಬಂದಿದೆ. ಪ್ರಕರಣವು ಬಿಜೈನಗರ ಪೊಲೀಸ್ ಠಾಣೆ ಪ್ರದೇಶದಲ್ಲಿ ನಡೆದಿದೆ.

ಪ್ರಕರಣ ಬೆಳಕಿಗೆ ಬಂದ ನಂತರ, ಜನರು ಪೊಲೀಸ್ ಠಾಣೆಗೆ ಘೇರಾವ್ ಹಾಕಿ ಆರೋಪಿಗಳನ್ನು ಬಂಧಿಸುವಂತೆ ಒತ್ತಾಯಿಸಿದರು. ಪರಿಸ್ಥಿತಿ ಉದ್ವಿಗ್ನಗೊಂಡಾಗ 4 ಪೊಲೀಸ್ ಠಾಣೆಗಳಿಂದ ಹೆಚ್ಚುವರಿ ಪೊಲೀಸರನ್ನು ಕರೆಸಲಾಯಿತು ಮತ್ತು ಮಸೂದಾ ಉಪ ಪೊಲೀಸ್ ವರಿಷ್ಠಾಧಿಕಾರಿ (ಡಿಎಸ್‌ಪಿ) ಸಜ್ಜನ್ ಸಿಂಗ್ ಪ್ರತಿಭಟನಾಕಾರರನ್ನು ಸಮಾಧಾನಪಡಿಸಿ ಆರೋಪಿಗಳ ಬಂಧನದ ಭರವಸೆ ನೀಡಿದರು.

ಆರೋಪಿಗಳನ್ನು  ರಿಹಾನ್ ಮೊಹಮ್ಮದ್ (20), ಸೋಹೈಲ್ ಮನ್ಸೂರಿ (19), ಲುಕ್ಮಾನ್ ಅಲಿಯಾಸ್ ಸೋಹೇಬ್ (20), ಲುಕ್ಮಾನ್ (20), ಸಾಹಿಲ್ ಖುರೇಷಿ (19) ಎಂದು ಗುರುತಿಸಲಾಗಿದೆ. ಇಬ್ಬರು ಬಾಲಾಪರಾಧಿಗಳನ್ನೂ ಬಂಧಿಸಲಾಗಿದೆ.

ಮೂವರು ಅಪ್ರಾಪ್ತ ಬಾಲಕಿಯರ ಕುಟುಂಬ ಸದಸ್ಯರು ಈ ವಿಷಯವನ್ನು ವಿಜಯನಗರ ಪೊಲೀಸ್ ಠಾಣೆಗೆ ವರದಿ ಮಾಡಿ ಫೆಬ್ರವರಿ 16 ರಂದು ದೂರು ಸಲ್ಲಿಸಿದರು. ಅಪರಾಧಿಗಳು ಹೆಣ್ಣುಮಕ್ಕಳನ್ನು ತಮ್ಮೊಂದಿಗೆ ಮಾತನಾಡಲು ಒತ್ತಡ ಹೇರುತ್ತಿದ್ದರು. ಅವರಿಗೆ ಚೀನೀ ಮೊಬೈಲ್ ಫೋನ್‌ಗಳನ್ನು ನೀಡಲಾಗುತ್ತಿತ್ತು ಮತ್ತು ಅವರನ್ನು ಲೈಂಗಿಕವಾಗಿ ಬಳಸಿಕೊಳ್ಳಲಾಗುತ್ತಿತ್ತು, ಅಪರಾಧಿಗಳೊಂದಿಗೆ ಚಾಟ್ ಮಾಡಲು ಅಪ್ರಾಪ್ತ ವಯಸ್ಸಿನ ಸ್ನೇಹಿತರನ್ನು ಹುಡುಕಿಕೊಡುವಂತೆಯೂ ಒತ್ತಾಯಿಸಲಾಗುತ್ತಿತ್ತು ಎಂದು ಕುಟುಂಬಸ್ಥರು ಆರೋಪಿಸಿದ್ದಾರೆ.