ಗಡಿಯಲ್ಲಿ ಬಾಂಗ್ಲಾದೇಶಿಯರ ಅಕ್ರಮ ನಿರ್ಮಾಣಗಳ ವಿರುದ್ಧ ಬಿಎಸ್‌ಎಫ್ ಕ್ರಮ

ನವದೆಹಲಿ: 4,096 ಕಿ.ಮೀ ಉದ್ದದ ಭಾರತ-ಬಾಂಗ್ಲಾದೇಶ ಅಂತರರಾಷ್ಟ್ರೀಯ ಗಡಿಯಲ್ಲಿ ನಿಯೋಜಿಸಲಾದ ತನ್ನ ಫೀಲ್ಡ್ ಕಮಾಂಡರ್‌ಗಳಿಗೆ ಬಿಎಸ್‌ಎಫ್‌ ಮಹತ್ವದ ಸೂಚನೆ ನೀಡಿದೆ. ಬಾಂಗ್ಲಾದೇಶದ ನಾಗರಿಕರು ಅಥವಾ ಗಡಿ ಪಡೆಗಳು ಗಡಿ ಮುಂಭಾಗ ಪ್ರದೇಶಗಳಲ್ಲಿ ಅಕ್ರಮ ನಿರ್ಮಾಣ ಕಾರ್ಯಗಳನ್ನು ಕೈಗೊಂಡರೆ ಬಲವಾದ ಕ್ರಮ ತೆಗೆದುಕೊಳ್ಳುವಂತೆ ನಿರ್ದೇಶಿಸಿದೆ ಎಂದು ಅಧಿಕೃತ ಮೂಲಗಳು ತಿಳಿಸಿವೆ.

2024 ರಲ್ಲಿ ಈ ಗಡಿಯುದ್ದಕ್ಕೂ ಸುಮಾರು 80 ಅಕ್ರಮ ನಿರ್ಮಾಣ ಘಟನೆಗಳು ವರದಿಯಾಗಿವೆ ಎಂದು ಗಡಿ ನಿರ್ವಹಣಾ ಸಂಸ್ಥೆಯ ಮೂಲಗಳು ತಿಳಿಸಿವೆ.

ಪಶ್ಚಿಮ ಬಂಗಾಳದ ಸಿಲಿಗುರಿಯಲ್ಲಿ ಪ್ರಧಾನ ಕಚೇರಿಯನ್ನು ಹೊಂದಿರುವ ಬಿಎಸ್‌ಎಫ್‌ನ ನಾರ್ತ್‌ ಬೆಂಗಾಳ್‌ ಫ್ರಾಂಟಿಯರ್ ಸುಮಾರು 932 ಕಿ.ಮೀ.‌ ಉದ್ದದ ಗಡಿಯನ್ನು ಕಾವಲು ಕಾಯುವ ಜವಾಬ್ದಾರಿ ಹೊತ್ತಿದೆ. ಈ ಪ್ರದೇಶದಲ್ಲಿ ಬಾಂಗ್ಲಾದೇಶಿಗರ ಉಪಟಳಗಳು ಇತ್ತೀಚಿನ ದಿನಮಾನಗಳಲ್ಲಿ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಕಣ್ಗಾವಲನ್ನು ವೃದ್ಧಿಸಲಾಗಿದೆ.

ಫೆಬ್ರವರಿ 4-5ರ ರಾತ್ರಿ ದಕ್ಷಿಣ ದಿನಾಜ್‌ಪುರ ಜಿಲ್ಲೆಯ ಮಲಿಕ್‌ಪುರದ ಗಡಿ ಗ್ರಾಮಕ್ಕೆ ಅಕ್ರಮವಾಗಿ ಪ್ರವೇಶಿಸಿದ ಭಾರೀ ಶಸ್ತ್ರಸಜ್ಜಿತ ಬಾಂಗ್ಲಾದೇಶಿ ದುಷ್ಕರ್ಮಿಗಳ ಗುಂಪು ಬಿಎಸ್‌ಎಫ್ ತಂಡದ ಮೇಲೆ ದಾಳಿ ನಡೆಸಿದೆ ಎಂದು ಪಡೆ ಹೇಳಿಕೆಯಲ್ಲಿ ತಿಳಿಸಿದೆ. ದಾಳಿಯಿಂದಾಗಿ ಒಬ್ಬ ಯೋಧ ಗಾಯಗೊಂಡಿದ್ದಾರೆ.

“ದುಷ್ಕರ್ಮಿಗಳು ಕಳ್ಳಸಾಗಣೆ ಮತ್ತು ದರೋಡೆಗಾಗಿ ಭಾರತಕ್ಕೆ ಅಕ್ರಮವಾಗಿ ಪ್ರವೇಶಿಸಿದರು. ಅವರ ಬಳಿ  ಕೋಲುಗಳು ಮತ್ತು ವೈರ್ ಕಟ್ಟರ್ ಕೂಡ ಇತ್ತು. ಬಿಎಸ್‌ಎಫ್ ತಂಡ ಅವರನ್ನು ತಡೆದಾಗ ದುಷ್ಕರ್ಮಿಗಳು ಪಡೆಗಳ ಮೇಲೆ ಆಕ್ರಮಣಕಾರಿಯಾಗಿ ದಾಳಿ ಮಾಡಿದರು.ಈ ವೇಳೆ ಪಡೆ ಬಾಂಗ್ಲಾದೇಶಿಗಳನ್ನು ತಡೆಯಲು ಮಾರಕವಲ್ಲದ ಗುಂಡುಗಳನ್ನು ಹಾರಿಸಿತು ಆದರೆ ಅವರು ತಮ್ಮ ಆಕ್ರಮಣವನ್ನು ಮುಂದುವರೆಸಿದರು ಮತ್ತು ಬಿಎಸ್‌ಎಫ್ ತಂಡವನ್ನು ಸುತ್ತುವರೆದರು” ಎಂದು ಹೇಳಿಕೆಯಲ್ಲಿ ತಿಳಿಸಲಾಗಿದೆ..

ದುಷ್ಕರ್ಮಿಗಳು ಬಿಎಸ್‌ಎಫ್ ಜವಾನನ ಆಯುಧವನ್ನು “ಕಿತ್ತುಕೊಳ್ಳಲು” ಪ್ರಯತ್ನಿಸಿದರು ಮತ್ತು ಅವರು ಆತ್ಮರಕ್ಷಣೆಗಾಗಿ ಗುಂಡು ಹಾರಿಸಿದರು, ನಂತರ ದಾಳಿಕೋರರು ಗಡಿಯ ಬದಿಗೆ ಓಡಿಹೋದರು ಎಂದು ವಕ್ತಾರರು ಹೇಳಿದ್ದಾರೆ.

ಗಡಿ ಘಟಕಗಳ ಎಲ್ಲಾ ಬಿಎಸ್‌ಎಫ್ ಕಮಾಂಡರ್‌ಗಳಿಗೆ ತೀವ್ರ ನಿಗಾ ಇಡಲು ಮತ್ತು ಐಬಿಯ 150 ಗಜಗಳ ಉದ್ದಕ್ಕೂ ಅಕ್ರಮ ನಿರ್ಮಾಣ ಕಾರ್ಯಗಳನ್ನು ನಿಲ್ಲಿಸಲು ಬಲವಾದ ಕ್ರಮ ಕೈಗೊಳ್ಳಲು ಸೂಚಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.