ಈ ಬಾಲಕನಿಗೆ ಆಟಿಕೆಗಳೇ ಸಂಶೋಧನಾ ಉಪಕರಣಗಳು

ಸಾಮಾನ್ಯವಾಗಿ ಪೇಪರ್, ಪ್ಲಾಸ್ಟಿಕ್, ಕಬ್ಬಿಣ ಮತ್ತಿತರ ವಸ್ತುಗಳನ್ನು ಮರುಬಳಕೆ ಮಾಡುವುದನ್ನು ಕೇಳಿದ್ದೇವೆ. ಆದರೆ ಮಕ್ಕಳ ಆಟಿಕೆ ವಸ್ತುಗಳು ಕೆಟ್ಟು ಹೋದಲ್ಲಿ ಅದರ ಉಪಯೋಗವಾದರೂ ಏನು ಎನ್ನುತ್ತಾ ನೇರವಾಗಿ ಕಸದ ತೊಟ್ಟಿಗೆ ಎಸೆಯುತ್ತಾರೆ. ಅಂತಹದ್ದರಲ್ಲಿ ಈ ಪೋರ ತನ್ನ ಹಳೆಯ ಆಟಿಕೆ ವಸ್ತುಗಳಿಂದ ಹೊಸ ಸಂಶೋಧನೆಗಳನ್ನು ಮಾಡುತ್ತಿರುವುದು ಎಲ್ಲರ ಕುತೂಹಲ ಕೆರಳಿಸಿದೆ.

ಮಹಾರಾಷ್ಟ್ರದ ಮೀರಾ ರಸ್ತೆಯ ಶಾಂತಿನಗರ ಶಾಲೆಯ 6ನೇ ತರಗತಿಯ ಬಾಲಕ ವೇದಾಂತ ಧೀರನ್ ಠಾಕರ್. ಈತ ಉಳಿದವರಂತೆ ಸಾಮಾನ್ಯನಲ್ಲ. ಇತರ ಮಕ್ಕಳು ತಮ್ಮ ಕೆಟ್ಟು ಹೋದ ಆಟಿಕೆಗಳನ್ನು ಎಸೆದರೆ, ಈತ ಮಾತ್ರ ಹಾಗೆ ಮಾಡದೆ ತನ್ನ ಆಟಿಕೆಗಳ ತುಣುಕುಗಳ ಸಹಾಯದಿಂದ ಹೊಸತಾದ ಉಪಕರಣಗಳನ್ನು ತಯಾರಿಸುವುದೇ ಈತನ ಹವ್ಯಾಸ. ರಿಮೋಟ್ ಕಂಟ್ರೋಲ್, ಬ್ಯಾಟರಿ, ಅಯಸ್ಕಾಂತಗಳ ಸಹಾಯದಿಂದ ವಿಭಿನ್ನ ಆಟಿಕೆಗಳನ್ನೇ ತಯಾರಿಸುತ್ತಾನೆ ವೇದಾಂತ್.

ತನ್ನ ಹಳೆಯ ರಿಮೋಟ್ ಕಂಟ್ರೋಲ್ (ಆರ್‌ಸಿ) ಚಾಲಿತ ಕಾರು ಕೆಟ್ಟು ಹೋಗಿದ್ದ ಸಂದರ್ಭ ಆತನಿಗೆ ಹೊಳೆದದ್ದು ಮನೆ ಬಾಗಿಲಿನ ಬೀಗ ತೆರೆಯಲು ಸಹಾಯವಾಗುವ ರಿಮೋಟ್ ಕಂಟ್ರೋಲ್. ರಜಾ ದಿನಗಳಲ್ಲಿ ಹತ್ತುಹಲವು ಸ್ನೇಹಿತರು ಮನೆಗೆ ಬರುತ್ತಿದ್ದು, ಅಮ್ಮನಿಗೆ ಆಗುವ ಕಿರಿಕಿರಿ ತಪ್ಪಿಸಲು ತನ್ನ ಆಟಿಕೆ ಕಾರ್‌ನ ರಿಮೋಟ್, ಮೋಟಾರ್ ಡ್ರೈವ್ ಯಾಂತ್ರಿಕ ಸರ್ಕ್ಯೂಟ್, ರೀಚಾರ್ಜ್ ಬ್ಯಾಟರಿ, ರಿಮೋಟ್ ಕಂಟ್ರೋಲ್ ಸರ್ಕ್ಯೂಟ್ ಇವುಗಳಿಂದ ಬಾಗಿಲಿನ ಬೀಗ ತೆರೆಯುವ ಸಾಧನ ರೂಪಿಸಿದ್ದಾನೆ. ಇದರಿಂದ ಮನೆಯ ಯಾವುದೇ ಮೂಲೆಯಿಂದ ಬೀಗವನ್ನು ತೆರೆಯಲು ಸಾಧ್ಯವಾಗಿದೆ.

ರೀಮೋಟ್‌ನಿಂದ ಹೊರಡುವ ತರಂಗಗಳು ಆರ್‌ಸಿ ಸರ್ಕ್ಯೂಟ್‌ನ ಆಂಟೆನಾಗೆ ತಲುಪುತ್ತದೆ. ಬ್ಯಾಟರಿ ಸಹಾಯದಿಂದ ಮೋಟಾರ್‌ನ ಶ್ಯಾಫ್ಟ್ ತಿರುಗುತ್ತಿದ್ದಂತೆ ಶ್ಯಾಫ್ಟ್ ಮತ್ತು ಬೀಗಕ್ಕೆ ಅಳವಡಿಸಲಾದ ನೈಲಾನ್ ದಾರ ಎಳೆಯಲ್ಪಟ್ಟು ಬಾಗಿಲಿನ ಬೀಗ ತೆರೆಯುತ್ತದೆ. ರಿಮೋಟ್‌ನ ಸ್ವಿಚ್ ಬಿಡುತ್ತಿದ್ದಂತೆ ಮತ್ತೆ ಬಾಗಿಲಿನ ಬೀಗ ಬೀಳುತ್ತದೆ. ಇದು ಆತ ನಿರ್ಮಿಸಿರುವ ರಿಮೋಟ್ ಕಂಟ್ರೋಲ್ ಚಾಲಿತ ಬೀಗ.

ಇದರ ಜೊತೆಗೆ ತನ್ನ ತಂದೆಯ ಲ್ಯಾಪ್‌ಟಾಪ್ ಬ್ಯಾಟರಿ ಸಹಾಯದಿಂದ ಎಲ್‌ಇಡಿ ಉಪಕರಣವನ್ನೂ ತಯಾರಿಸಿದ್ದಾನೆ. ಸೋಲಾರ್ ಪ್ಯಾನೆಲ್‌ನ ಸಹಾಯದಿಂದ ಬ್ಯಾಟರಿಯು ಚಾರ್ಜ್ ಆಗಿ ಎಲ್‌ಇಡಿ ಬಲ್ಬ್‌ಗಳು ಉರಿಯುತ್ತವೆ. ದೇಶಾದ್ಯಂತ ಉಚಿತ ವಿದ್ಯುತ್ ತಯಾರಿಸಲು ಮೂಲ ಉಪಕರಣ ಸಿದ್ಧಪಡಿಸುವುದು ಈತನ ಕನಸಾಗಿದೆ. ರಜಾ ದಿನಗಳಲ್ಲಿ ಅರವಳ್ಳಿಯ ಟಿಂತೋಯ್ ಗ್ರಾಮದಲ್ಲಿರುವ ತನ್ನ ತಾತನ ಮನೆಗೆ ತೆರಳುವ ವೇದಾಂತ್ ವಿದ್ಯುತ್ ಸರಬರಾಜು ಇಲ್ಲದ ಈ ಪರಿಸರದಲ್ಲಿ ಗೆಳೆಯರು ವಿದ್ಯಾಭ್ಯಾಸ ನಡೆಸಲು ಪಡುವ ಸಮಸ್ಯೆ ಈ ಬಗ್ಗೆ ಚಿಂತಿಸುವಂತೆ ಮಾಡಿದೆ.

ಇದಲ್ಲದೇ ಇಲೆಕ್ಟ್ರಾನಿಕ್ ಬೋಟ್, ವಿದ್ಯುತ್ ಉಪಕರಣ, ಸಿಡಿಮದ್ದುಗಳನ್ನೂ ವೇದಾಂತ್ ತಯಾರಿಸಿದ್ದಾನೆ.