ಇಂಗ್ಲೀಷ್ ಮಾಧ್ಯಮ ಶಿಕ್ಷಣದದಿಂದಾಗಿ ಪಾರಂಪಾರಿಕ ಜೀವನಧರ್ಮ ಶಿಥಿಲವಾಗುತ್ತಿದೆ

ಬೆಳ್ತಂಗಡಿ : ಇಂಗ್ಲೀಷ್ ಮಾಧ್ಯಮ ಶಿಕ್ಷಣದ ಭ್ರಮಾಲೋಕದಿಂದಾಗಿ ಪಾರಂಪಾರಿಕ ಜೀವನಧರ್ಮ ಶಿಥಿಲವಾಗುತ್ತಿರುವ ಆತಂಕವನ್ನು ಕ.ಸಾ.ಪ. ಜಿಲ್ಲಾಧ್ಯಕ್ಷ ಪ್ರದೀಪ್ ಕುಮಾರ್ ಕಲ್ಕೂರ ವ್ಯಕ್ತಪಡಿಸಿದ್ದಾರೆ.

ಅವರು ಮಂಗಳವಾರ ವೇಣೂರಿನ ವಿದ್ಯೋದಯಅನುದಾನಿತ ಹಿರಿಯ ಪ್ರಾಥಮಿಕ ಶಾಲೆಯಲ್ಲಿ ನಡೆದ ಕಸಾಪ ಜಿಲ್ಲಾಘಟಕ, ಬೆಳ್ತಂಗಡಿ ತಾಲೂಕು ಪ್ರೌಢಶಾಲೆಗಳ ಮುಖ್ಯಶಿಕ್ಷಕರ ಸಂಘ, ಕರ್ನಾಟಕರಾಜ್ಯ ಪ್ರೌಢಶಾಲಾ ಸಹಶಿಕ್ಷಕರ ಸಂಘ ಮತ್ತು ಪ್ರಾ.ಶಾ.ಶಿಕ್ಷಕರ ಸಂಘದ ಸಹಯೋಗದಲ್ಲಿ ನಡೆದ ಶತಮಾನಕಂಡ ಹಾಗೂ ಶೇ.100ಫಲಿತಾಂಶ ಪಡೆದ ತಾಲೂಕಿನ ಕನ್ನಡ ಮಾಧ್ಯಮಶಾಲೆಗಳಿಗೆ ಗೌರವಾರ್ಪಣೆ ಕಾರ್ಯಕ್ರಮದಅಧ್ಯಕ್ಷತೆ ವಹಿಸಿ ಮಾತನಾಡಿದರು.

ಅವಿಭಜಿತದ.ಕ.ಜಿಲ್ಲೆಯ ಹಿರಿಯರು ಪಾರಂಪಾರಿಕ ಚಿಂತನೆಗಳೊಂದಿಗೆ ಅಭಿವೃದ್ಧಿಯ ಕಲ್ಪನೆಯನ್ನಿಟ್ಟುಕೊಂಡು ಶಾಲೆಗಳನ್ನು ಸ್ಥಾಪಿಸಿದರು. ಆಧುನಿಕ ಶಿಕ್ಷಣದಿಂದ ರಾಷ್ಟ್ರೀಯ, ಅಂತರಾಷ್ಟ್ರೀಯ ಮಟ್ಟದಲ್ಲಿ ಗುರುತಿಸಲು ಸಹಕಾರಿ ಎಂಬುದು ಇದರ ಉದ್ದೇಶವಾಗಿತ್ತು. ಪ್ರಗತಿಯೊಡನೆ ಹೆಜ್ಜೆ ಹಾಕುತ್ತ ಹೋದ ಶಾಲೆಗಳು ಪಾರಂಪಾರಿಕ ಜೀವನಧರ್ಮವನ್ನು ಬಿಟ್ಟುಕೊಟ್ಟಿಲ್ಲ. ಆದರೆ ಇಂದು ಇಂಗ್ಲೀಷ್ ಮಾಧ್ಯಮ ಶಾಲೆಯ ಭ್ರಮೆಯಿಂದ ನಮ್ಮ ಪ್ರಾದೇಶಿಕ ಭಾಷೆಗಳು ಅಡಿಗೆ ಮನೆಗೆ ಸೀಮಿತವಾಗಲಿವೆ ಎಂಬ ಕಳವಳವನ್ನು ಅವರು ವ್ಯಕ್ತಪಡಿಸಿದರು.ನಮ್ಮ ಬದುಕನ್ನು ವಿಸ್ಮೃತಿ ಮಾಡುವ ಶಿಕ್ಷಣ ಬೇಡ.ಶಾಲೆಗಳ ಉಳಿವಿಗೆ ಸರಕಾರ ಪರ್ಯಾಯ ವ್ಯವಸ್ಥೆ ನಿರ್ಮಿಸಬೇಕು ಎಂದ ಅವರು ರಾಷ್ಟ್ರೀಯ ಶಿಕ್ಷಣದ ನೀತಿಯನ್ನು ರೂಪಿಸುವ ಬಗ್ಗೆ ಒತ್ತಾಯಿಸಿದರು.

ಸಮಾರಂಭದ ಉದ್ಘಾಟನೆಯನ್ನು ಶಾಸಕ ಕೆ. ವಸಂತ ಬಂಗೇರ ನೆರವೇರಿಸಿ ಶತಮಾನೋತ್ಸವ ಕಂಡ ಸರಕಾರಿ ಹಿ.ಪ್ರಾ. ಶಾಲೆಗಳಾದ ಗೇರುಕಟ್ಟೆ ಸನಿಹದಕೊರೆಂಜ, ಬೆಳ್ತಂಗಡಿ ಮಾದರಿ ಶಾಲೆ, ಗುರುವಾಯನಕೆರೆ, ನಾರಾವಿ, ಮಚ್ಚಿನ, ಬಂಗಾಡಿ, ವೇಣೂರು ವಿದ್ಯೋದಯಅನುದಾನಿತ ಶಾಲೆ, ಮಡಂತ್ಯಾರಿನ ಗಾರ್ಡಿಯನ್ ಅನುದಾನಿತ ಹಿ.ಪ್ರಾ.ಶಾಲೆ, ಧರ್ಮಸ್ಥಳದ ಶ್ರೀಮಂಜುನಾಥ ಸ್ವಾಮಿ ಅನುದಾನಿತ ಹಿರಿಯ ಪ್ರಾಥಮಿಕ ಶಾಲೆಯನ್ನು, ೧೦ ನೇ ತರಗತಿಯಲ್ಲಿ ಶೇ.೧೦೦ ಫಲಿತಾಂಶ ಪಡೆದ ಗುರುವಾಯನಕೆರೆ, ಪೆರ್ಲಬೈಪಾಡಿ, ನೇಲ್ಯಡ್ಕ, ಶಾಲೆತ್ತಡ್ಕ ಸರಕಾರಿ ಪ್ರೌಢಶಾಲೆಗಳನ್ನು ಗುರುತಿಸಿ ಆಯಾ ಶಾಲೆಯ ಮುಖ್ಯೋಪಾಧ್ಯಾಯರ ಮೂಲಕ ಗೌರವಿಸಿದರು.

ವೇದಿಕೆಯಲ್ಲಿ ಕಸಾಪ ತಾಲೂಕು ಘಟಕದ ಅಧ್ಯಕ್ಷ ಡಾ|ಬಿ.ಯಶೋವರ್ಮ, ಕ್ಷೇತ್ರ ಸಂಪನ್ಮೂಲ ಕೇಂದ್ರದ ಸಮನ್ವಯಾಧಿಕಾರಿ ತಾರಾಕೇಸರಿ, ವೇಣೂರು ವಿದ್ಯೋದಯ ಶಿಕ್ಷಣ ಸಂಸ್ಥೆಯ ಅಧ್ಯಕ್ಷ ಶಿವರಾಮ ಹೆಗ್ಡೆ, ಪ್ರಾ.ಶಾಲಾ ಶಿಕ್ಷಕರ ಸಂಘದಅಧ್ಯಕ್ಷ ಪ್ರಭಾಕರ ಹೆಗ್ಡೆ ಇದ್ದರು.

ಕ.ಸಾ.ಪ.ಜಿಲ್ಲಾ ಕಾರ್ಯದರ್ಶಿ ಡಾ|ಶ್ರೀನಾಥ ಎಂ.ಪಿ.ಸ್ವಾಗತಿಸಿದರು. ಪತ್ರಕರ್ತಅಶ್ರಫ್ ಆಲಿ ಕುಂಞ ಶಾಲೆಗಳ ಪಟ್ಟ ವಾಚಿಸಿದರು. ವಿದ್ಯೋದಯ ಶಾಲೆಯ ಮುಖ್ಯೋಪಾಧ್ಯಾಯಿನ ಶೀಲಾ ಎಸ್.ಹೆಗ್ಡೆ ವಂದಿಸಿದರು. ಕಸಾಪ ತಾಲೂಕು ಕಾರ್ಯದರ್ಶಿ ರಾಮಕೃಷ್ಣ ಭಟ್ ಬೆಳಾಲು ಕಾರ್ಯಕ್ರಮ ನೆರವೇರಿಸಿದರು.