ಮಾರಣಾಂತಿಕವಾಗಿ ಪರಿಣಮಿಸುತ್ತಿರುವ ಪಡುಬಿದ್ರಿ-ಬೆಳ್ಮಣ್ ರಸ್ತೆ

ಬೆಳ್ಮಣ್: ಕಾರ್ಕಳ -ಪಡಬಿದ್ರಿಯ ನಡುವಿನ ರಾಜ್ಯ ಹೆದ್ದಾರಿ ದಿನನಿತ್ಯ ಅಪಘಾತಕ್ಕೆ ಕಾರಣವಾಗುತ್ತಿದೆ. ಇದೇ ವ್ಯಾಪ್ತಿಯ ಸುಮಾರು 6 ಕಿ.ಮಿ. ವರೆಗಿನ ರಸ್ತೆಯು ವಾಹನ ಚಾಲಕರಿಗೆ  ದುಃಸ್ವಪ್ನವಾಗಿ ಪರಿಣಮಿಸುತ್ತಿದೆ.

ಪಡುಬಿದ್ರಿಯಿಂದ ಬೆಳ್ಮಣ್‌ಗೆ ಬರುವ ಹೆದ್ದಾರಿಯಲ್ಲಿರುವ ನೀರ್ಚಾಲು ಎಂಬಲ್ಲಿನ ತಿರುವು ಅಪಘಾತಕ್ಕೆ ಕಾರಣವಾಗಿದೆ.  ಇಳಿಜಾರಿನಿಂದ ಮೇಲ್ಮುಖವಾಗಿ ಏರು ತಿರುವು ಹೊಂದಿದ್ದು, ವೇಗವಾಗಿ ಚಲಾಯಿಸುವ ವಾಹನ ಚಾಲಕರನ್ನು ಈ ಕಡಿದಾದ ತಿರುವು ರಸ್ತೆ ತಬ್ಬುಬ್ಬುಗೊಳಿಸುತ್ತಿದೆ. ನಿಯಂತ್ರಣ ತಪ್ಪಿ ವಾಹನಗಳು ಪಲ್ಪಿಯಾಗುತ್ತಿದೆ. ಇಲ್ಲಿ ಬೈಕ್, ಟಿಪ್ಪರ್, ಬಸ್ಸುಗಳು ಅಪಘಾತಕ್ಕಿಡಗುವುದು ಸರ್ವೇಸಾಮಾನ್ಯ. ಅಗಲಿಕರಣಗೊಳ್ಳುವ ಸಮಯದಲ್ಲಿ ನೀರ್ಚಾಲಿನ ತಿರುವುವನ್ನು ಕೂಡ ಅಗಲಗೊಳಿಸಲಾಗಿತ್ತು. ಇಲ್ಲಿನ ತಿರುವುವನ್ನು ನೇರಗೊಳಿಸುವುದಕ್ಕೆ ಅವಕಾಶವಿದ್ದರೂ ಅವೈಜ್ಞಾನಿಕವಾಗಿ ಅಗಲ ಮಾಡಿದ ಹೆದ್ದಾರಿ ಇಲಾಖೆಯ ಎಡವಟ್ಟು ಕೆಲಸದಿಂದ ಅಪಘಾತಕ್ಕೆ ಮುಕ್ತಿ ಸಿಗುವ ಲಕ್ಷಣ  ಕಾಣುತ್ತಿಲ್ಲ.

ಇಲ್ಲಿ ಹಲವು ವರ್ಷಗಳಿಂದ ನೂರಕ್ಕೂ ಮಿಕ್ಕಿ ಅಪಘಾತದಿಂದ ಸಾವು, ನೋವು ಸಂಭವಿಸಿವೆ. ಈ ಹಿಂದೆ ಹಾಳೆಕಟ್ಟೆಯ ನಿವಾಸಿ ಸುರೇಶ್ ಅಧಿಕಾರಿ ಸಹಿತ 3 ಜನರನ್ನು ಇದೇ ರಸ್ತೆ ಬಲಿ ತಗೆದುಕೊಂಡಿದೆ. ಬೆಳುವಾಯಿ ಖ್ಯಾತ ವೈದ್ಯರಾದ ಡಾ. ಪಾಂಡುರಂಗ ಶೆಟ್ಟಿಯವರು ಇದೇ ಜಾಗದಲ್ಲಿ ಪ್ರಾಣ ಕಳೆದುಕೊಂಡಿದ್ದರು. ಬಸ್ಸುಗಳು ಹೊಂಡಕ್ಕೆ ಬಿದ್ದು ಡ್ರೈವರ್‌ಗಳು ಸ್ಥಳದಲ್ಲಿ ಮೃತಪಟ್ಟ ಘಟನೆಗಳು ನಡೆದಿವೆ. ಇದಕ್ಕೆ ಮೂಲ ಕಾರಣ ಕಡಿದಾದ ತಿರುವಿನಿಂದ ಕೂಡಿದ ಇಲ್ಲ್ಲಿನ ರಸ್ತೆಯ ಇಳಿಜಾರು ಮತ್ತು ಏರುಮುಖ.

ವಾಹನ ಚಾಲಕರು ಎರಡೂ ಕಡೆಯಿಂದ ಅತಿ ವೇಗದಲ್ಲಿ ಬರುವಾಗ ಇಬ್ಬರಿಗೂ ವಾಹನಗಳು ಗೋಚರಕ್ಕೆ ಬಾರದ ಎದರು-ಬದುರಾದಗ ನಿಯಂತ್ರಣ ತಪ್ಪಿ ನೇರವಾಗಿ ಪಕ್ಕದ ಹೊಂಡಕ್ಕೆ ಬಿದ್ದು, ಇಲ್ಲ ಪಲ್ಟಿಯಾಗಿ ಅಪಘಾತವಾಗುತ್ತಿದೆ. ಇಲ್ಲಿ ಹಲವು ವರ್ಷಗಳಿಂದ ನಡೆಯುತ್ತಿದ್ದ ಅಪಘಾತಕ್ಕೆ ಇಲ್ಲಿನ ಸ್ಥಳಿಯರು ರಸ್ತೆಯ ಪಕ್ಕದಲ್ಲಿ ಇರುವ ಮಹಾಮ್ಮಯಿಯ ಮಾರಿಗುಡಿಯ ಕಡೆ ಬೆಟ್ಟು ಮಾಡಿ ತೋರಿಸುತ್ತಾರೆ. ಅ ಜಾಗ ಮಾರಿಗುಡಿಯ ಗಡು ಪ್ರದೇಶವಾದ ಕಾರಣ ಬಲಿ ಪಡೆದುಕೊಳ್ಳುತ್ತಿದೆ ಎಂಬುದೇ ಇಲ್ಲಿವರ ನಂಬಿಕೆ.

ಶಿರ್ವದಿಂದ ಬರುವ ಏರುಮುಖ ರಸ್ತೆ, ಕಾರ್ಕಳ- ಪಡುಬಿದ್ರೆ ಕಡೆಯಿಂದ ಬರುವ ರಸ್ತೆ, ಒಂದಕ್ಕೊಂದು ಕೂಡುವುದು ಪೇಟೆಯ ಮುಖ್ಯ ಜಂಕ್ಷನ್‌ನಲ್ಲಿ ಮೂರು ಕಡೆಯ ವಾಹನಗಳು ಮುಖಾಮುಖಿಯಾಗುವ ಸಂದರ್ಭದಲ್ಲಿ ಅಪಘಾತಕ್ಕೆ ತುತ್ತಾಗುತ್ತಿವೆ. ಪೇಟೆಯ ರಸ್ತೆ ಸಾಕಷ್ಟು ಅಗಲಿಕರಣಗೊಳ್ಳದೆ ಕಿರಿದಾಗಿರುವುದರಿಂದ ಕಾರಣ ಡಿವೈಡರ್ ನಿರ್ಮಿಸಲು ಜಾಗನೇ ಇಲ್ಲದಂತಾಗಿದೆ. ಜನನಿಬಿಡ ಬಸ್ಸು ನಿಲ್ದಾಣ, ಅಲ್ಲದೆ ಹೆದ್ದಾರಿಯಾದ್ದರಿಂದ ಇಲ್ಲಿ ಹಂಪ್ ನಿರ್ಮಿಸುವಂತಿಲ್ಲ. ಅದರಿಂದ ವೇಗ ಮಿತಿ‌ ಇಲ್ಲದಿರುವುದರಿಂದ ಜಂಕ್ಷನಲ್ಲಿ ಅಪಘಾತಕ್ಕೆ ನಡೆಯುವುದಕ್ಕೆ ಕಾರಣವಾಗಿದೆ.

ಪೇಟೆಯ ಜಂಕ್ಷನ್‌ಗೆ ಬರುವಲ್ಲಿ ಹಂಪ್‌ಗಳನ್ನು ಹಾಕಬೇಕು, ಶಿರ್ವದ ಕಡೆಯಿಂದ ಬರುವ ಏರು ರಸ್ತೆಯ ಕೆಳಭಾಗದಲ್ಲಿ ಸಣ್ಣ ಸರ್ಕಲ್ ನಿರ್ಮಿಸಿದರೆ ಅಪಘಾತವನ್ನು ತಡೆಯಬಹುದು. ಕಿರಿದಾದ ರಸ್ತೆಯಲ್ಲಿ ಅಡ್ಡದಿಡ್ಡಿ ವಾಹನ ಪಾರ್ಕಿಂಗ್ ಮಾಡುವುದನ್ನು ನಿರ್ಬಂಧಿಸಬೇಕು. ಈ ಹಿಂದೆ ಬೆಳ್ಮಣ್‌ನಲ್ಲಿ ಪೊಲೀಸ್ ಔಟ್‌ಪೋಸ್ಟ್ ಕಾರ್ಯಾಚರಿಸುತ್ತಿತ್ತು. ಕಾರಣಾಂತರದಿಂದ ನಿಂತಿದ್ದು, ಇದೀಗ ಪುನಾರಂಬಿಸಬೇಕಾಗಿದೆ. ಕಾರ್ಕಳ, ಪಡುಬಿದ್ರೆ ರಾಜ್ಯ ಹೆದ್ದಾರಿಯನ್ನು ಮೇಲ್ದರ್ಜೆಗೇರಿಸಿ ಉತ್ತಮ ರಸ್ತೆ ನಿರ್ಮಾಣಕ್ಕೆ ಪ್ರಯತ್ನಪಟ್ಟಿದ್ದು ಶ್ಲಾಘನೀಯ. ದುರದೃಷ್ಟವಶಾತ್ ಹೆದ್ದಾರಿಯ ಅನೇಕ ಕಡೆ ಕಡಿದಾದ ತಿರುವುಗಳು ಇಲಾಖೆಗೆ ಅವೈಜ್ಞಾನಿಕವಾಗಿ ಪರಿಗಣಿಸಿದೆ.